Urlanǵan avtokólik qylmystaryn ashý jáne kólikterdi qaıtarý boıynsha TMD-ǵa múshe memleketterdiń kelisimin ratıfıkasııalaý jónindegi zań jobasy Májilis qabyrǵasynda talqylanǵan bolatyn.
– Biz avtokólik júrgizýshisi úshin barlyq qujattardy ózimen birge alyp júrýdiń qajeti joq degen normany zań jobasyna engizgimiz keledi. Jeke kýáligi bolsa jetkilikti, júrgizýshige qatysty qalǵan derekterdi planshet arqyly bilip alamyz. Azamattardyń qandaı kóligi bar ekeni, saqtandyrý polısiniń aıaqtalý merzimi, qansha ret senimhat jazyp bergeni, tehnıkalyq tekserýden qashan ótkeni, qansha aıyppuly bar ekeni, bári kórinip turady. Ol úshin qaltasynda jeke kýáligi bolsa jetkilikti, artyq qujat tasyp júrýdiń qajeti joq, – dedi mınıstr.
Erlan Turǵymbaevtyń aıtýynsha, polıseıler paıdalanatyn planshet kóshede turǵan beınekameralarmen ıntegrasııalanatyn bolady.
– Eger baıqap qarasańyz, qazir nómirsiz júrgen avtokólik joqtyń qasy. Qajettilik týǵan jaǵdaıda, baqylaý kamerasy kezekshige belgi berip, arnaıy patrýl qyzmeti kólikti toqtatady. Nómirdi eshkim búrkeı almaıdy. Ishki ister mınıstrliginiń bazasynda bári tirkelgen. Eger avtokóliktiń túsi, nómiri sáıkes kelmese, onda ekinshi ret belgi beriledi. Osylaısha kólik urlyǵynyń sanyn barynsha azaıtyp jatyrmyz, – dep túsindirdi mınıstr.
Mundaı júıe Eýropanyń birneshe elinde ǵana engizilgen eken. Qazaqstan solardyń tájirıbesin qoldanýǵa kóshpek.
Árıne qujatqa qatysty norma tek Qazaqstan aýmaǵynda ǵana qoldanylady. Eger basqa eldiń terrıtorııasyna ótseńiz, tıisti qujattardyń bárin qaltańyzǵa salyp júrýińiz kerek.
Bul jańalyqqa Sıfrlyq damý, ınnovasııalar jáne aeroǵarysh ónerkásibi mınıstri Asqar Jumaǵalıev te Feısbýktegi áleýmettik paraqshasynda ún qosty.
– Áriptesim Erlan Turǵymbaevtyń azamattarǵa taıaýda júrgizýshi kýáligi men tehpasportty ózimen birge alyp júrýiniń qajeti bolmaıtyny týraly aıtqany basty jańalyq boldy. Bul shyn máninde, kópten kútken sheshim. Memleket pen azamattyń ózara sıfrly is-qımylyn jaqsartýǵa jasalǵan úlken qadam. Polıseılerdiń júrgizýshilerden bul qujattardy talap etpeı-aq, onyń bar-joǵyn JSN arqyly tekserýine tehnıkalyq múmkindikter bar. Qazir Senatta qaralyp jatqan «Sıfrly tehnologııalar týraly» zań jobasy qabyldanǵannan keıin, eGov Mobile mobıldi qosymshasyndaǵy sıfrly qujattar tolyq zańdy kúshke ıe bolyp, qaǵaz qujatpen birdeı qoldanylady. Iаǵnı siz polısııa qyzmetkerine óz kýáligińizdiń sıfrly nusqasyn smartfonnan kórsete alasyz, – dedi Asqar Jumaǵalıev.
Onyń aıtýynsha, ázirge mobıldik qosymshada 4 túrli qujattyń sıfrly nusqasy bar: jeke kýálik, balanyń týý týraly kýáligi, neke qııý jáne buzý, atyn, tegin, ákesiniń atyn aýystyrý týraly. Sıfrlyq damý, ınnovasııalar jáne aeroǵarysh ónerkásibi mınıstrligi memlekettik organdarǵa qosymshada sondaı-aq stýdenttik kýálik, áskerı bılet, múgedektik týraly kýálik, jyljymaıtyn múliktiń tehnıkalyq pasporty jáne taǵy basqalary bolýy úshin qajetti ıntegrasııa júrgizýdi usynǵan.
– Bul qujattardyń mobıldik qosymshada sıfrly nusqalarynyń bolýy azamat úshin óte yńǵaıly bolar edi dep oılaımyn. Sonymen qatar biz memlekettik organdardyń azamattan talap etpeı, ózderi ala alatyn anyqtamalardan bas tartýy jumystaryn júrgizýdemiz. Jospar boıynsha, memlekettik organdar jyl sońyna deıin 24 aqparattyq anyqtamany alyp tastaýǵa ýáde berdi. Ol úshin olar óz ıntegrasııasyn aıaqtaýy, sondaı-aq óz reglamentteri men quqyqtyq-normatıvtik aktilerdi ózgertýge tıis, – dedi Asqar Jumaǵalıev.
Kólik júrgizýshi Aman Berikhannan bul jańalyqqa qatysty pikirin suraǵan edik.
– Mınıstrdiń aıtqanyn estip qýanyp qaldyq. 10 jyldan astam tájirıbemde bir márte ǵana qujatymdy úıde qaldyryp ketkenim úshin jol polısııasynan eskertý alǵanmyn. Degenmen, bir ǵana qujat ustap júrgen yńǵaıly bolady dep oılaımyn. Taǵy bir aıta keterligi, júrgizýshiler endi jol boıynda alǵan eskertýin de, tólemin keshiktirgen aıyppuldy da jasyra almaıdy. Sebebi polıseıler planshetinen bazaǵa kirip, júrgizýshige qatysty barlyq aqparatty sol jerde birden biledi. Bul alǵashqyda yńǵaısyzdaý bolýy múmkin, biraq ýaqyt óte kele bári tártipke úırenetini sózsiz, – deıdi ol.
