Facebook basshysynyń beısenbide jasaǵan málimdemesi bıznes kóshbasshylarynyń daǵdarysqa beıimdelýiniń jaqsy mysaly boldy. Kompanııa menedjerleri qazirde jumys ornynan bastap strategııasyna deıin oılastyrýda. Jańa ózgerister aldymen AQSh-ta qoldanysqa enbek, ázirge bul jańalyq tek jetekshi ınjenerlerge qatysty. Top jetekshileri jańadan qosylǵan qyzmetkerlerdiń jumysyn baǵalaǵannan keıin olarǵa úıden jumys isteý tańdaýy beriledi. Odan keıin álemniń túkpir-túkpirindegi jumysshylar jańa rejimge ótýge ótinish bere alady.
Mark Sýkerberg 10 jyldyń ishinde kompanııadaǵy 45 myńǵa jýyq jumysshynyń jartysy onlaın rejimge kóshedi degen úmitin jetkizdi. Bir qyzyǵy, onlaın kezdesý bir saǵattan keıin aqaýlarǵa baılanysty úzilip ketti. Kompanııa bul aqaý onlaınǵa qosylǵan kórermenderde ǵana bolǵanyn aıtty. Iаǵnı qyzmetkerlerde esh úzilis bolmaǵan. Sýkerberg vıdeonyń tolyq jazbasy jarııalanatynyn jetkizdi.
Basqa kompanııalar pandemııa kezindegi onlaın qyzmetin saralap jatsa, Sýkerberg muny Facebook úshin uzaq merzimdi strategııa retinde belgiledi. Jalpy, Kremnıı alqabyndaǵy kompanııalardyń onlaın rejimge kóshý týraly pikiri ár alýan. Twitter-diń negizin qalaýshy Djek Dorsı kompanııa qyzmetkerleri budan bylaı uzaqtan jumys isteı alatynyn habarlady. Bul qatarda sanfransıskolyq Coinbase Inc. krıptovalıýta aıyrbastaýmen aınalysatyn kompanııa da bar. Bul Ilon Maskty tyǵyryqqa tiregendeı. О́ıtkeni olardyń óz zaýyttary bar. Osy aıda ol Tesla zaýytyn qaıta ashý úshin jergilikti bılikpen janjaldasqan bolatyn.
Onlaın rejim tehnologııalyq kompanııalar úshin tıimdi ári ońaı. Degenmen bul jańalyqtyń da oılandyratyn tustary bar. Máselen, ınnovasııanyń kilti sanalatyn adamı qarym-qatynas sııaqty kúrdeli máseleni týdyrýy múmkin.
