Búgin, 30 qyrkúıek kúni Qyzylorda oblystyq prokýratýrasynda kezekti alqa májilisi bolyp ótti. Bul týraly oblystyq prokýratýranyń baspasóz qyzmeti habarlady.
Jıynda oblystyq salyq departamenti men onyń aýmaqtyq basqarmalarynyń 2012 jylǵy jáne 2013 jyldyń birinshi jartysyndaǵy jumystarynyń jaıy talqylandy. Onda birinshi bolyp oblystyq prokýratýranyń basqarma bastyǵy Ǵalym Edigeevtiń baıandamasy tyńdaldy. Baıandamashy óziniń sózinde osy oraıda salada oryn alǵan birqatar kemlshilikterdi atap kórsetti. Aıtalyq, búgingi kúni oblys ortalyǵyndaǵy 776 jer ýchaskeleriniń ıeleri ótken jylǵy jer salyǵyn tólemegeni belgili bolyp otyr. Dvıgatelderiniń kólemi 4000 tekshe santımetrden asatyn 640 avtokólik ıeleriniń turǵylyqty meken-jaılary anyqtalmaǵandyqtan, olardan 2008 jyldan beri 17,8 mln. teńgeniń salyǵy bıýdjet kirisine kirmegen eken.
Otyrysta salyq organdary júrgizgen tekserýlerdiń sapasy da qaraldy. Oǵan baılanysty aıtylǵan syndar jetkilikti. Mysaly, tekserýmen qamtylǵan merzimde sottarda salyq organdarynyń jalpy somasy 19,5 mlrd. teńgeni quraıtyn 26 habarlamanyń kúshin joıý jóninde azamattyq ister qaralsa, onyń 6,8 mlrd. teńgeni quraıtyn 8 habarlamanyń ǵana kúshi joıylǵan. Kórsetilgen máselelermen qatar, alqada salyq organdarynyń qyzmetindegi basqa da kemshilikteri atap ótilip, memlekettik bıýdjetti toltyrý, memleket múddelerin qorǵaý, kásipkerlik sýbektileriniń quqyqtarynyń buzylýyna jol bermeý jáne qyzmetti ońtaılandyrý máseleleri talqylandy.
Ekinshi másele oraı sóz alǵan oblystyq salyq departementi basshysynyń orynbasary Ádilbek Bekishov kemshilikterdi joıý baǵytynda atqarylyp otyrǵan jumystarǵa toqtaldy. Alqa otyrysy nátıjesinde salyq organdarynyń basshylaryna salyqtyq tólemderdiń tolyq túsýin qamtamasyz etý, memlekettik organdarmen ózara baılanysty arttyrý, mindetti zeınetaqy tólemderi boıynsha qalyptasqan qaryzdardy óteý, qyzmetkerlerdiń bilim deńgeıin arttyrý sııaqty usynymdar jasaldy.
Alqa májilisin oblys prokýrorynyń orynbasary Narıman Maqulbekov qorytyndylady.
Qurysh Nurymbet.
