Batys Qazaqstan oblysynda aýmaǵynda senbi kúni – 16, jeksenbi kúni – 24 adam koronavırýs juqtyryp, óńirde COVID-19 vırýsyn juqtyrǵandardyń sany 414-ke jetti. Indettiń 93 oshaǵy tirkelgen.
– Koronavırýs 100 myń turǵynǵa shaqqanda 63,2 adamdy qurady. 14 jasqa deıingi balalar arasynda 15 jaǵdaı tirkeldi. Oblystyń óńirlerin jiktesek, Aqjaıyq aýdanynda – 5, Bórli aýdanynda – 7, Jánibek aýdanynda – 2, Báıterekte – 5, Syrym aýdanynda – 5, Tasqalada – 11, Terektide – 2, Oral qalasynda – 377 naýqas tirkelip otyr, - deıdi Batys Qazaqstan oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaev.
Sońǵy kúnderi óńirde vırýsty qarym-qatynastan juqtyryp alǵandar kóbeıip barady. Kúni búgin olardyń sany – 162-ge jetti. Sonyń ishinde medısına qyzmetkerleri – 55 adam, 9-y sol salanyń qarapaıym mamandary. Aýrý juqtyrǵandardyń ishinde 5 polısııa qyzmetkeri, 2 balabaqsha, 2 bilim berý bólimi, 2 oqý ortalyǵy, 1 blokpost qyzmetkeri, 1 memlekettik kiris departamenti qyzmetkeri bar. Taǵy 85 adam aýrýdy úı oshaǵynan juqtyrǵan.
Joǵaryda aıtylǵan aýrýdyń 93 oshaǵynda naýqastar 1115 adammen qarym-qatynasta bolǵany anyqtaldy. Onyń ishinde 597 adam jaqyn baılanysta bolǵan. Búginde ınfeksııalyq, provızorlyq jáne karantındik stasıonarlarda – 342 adam, úı oqshaýlaýynda – 1134 adam dárigerler baqylaýynda.
Budan buryn aıtqanymyzdaı, Oral qalasyndaǵy barlyq balabaqsha ýaqytsha jabyldy. Buǵan sebep – sońǵy eki kúnde 2 balabaqshada eki qyzmetkerden koronavırýs juqpasy anyqtalǵan. Ol naýqastar COVID-19 vırýsy anyqtalǵanǵa deıin qaladaǵy №2, 3, 4, 5 emhanalarǵa baryp, dárigerlerge qaralyp júripti. Sondyqtan oblystyq memlekettik bas sanıtarlyq dáriger bul emhanalardyń qyzmetin ýaqytsha toqtatty. Qazir bul jerde naýqaspen qarym-qatynasta bolǵan qyzmetkerler túgel tekserilip, dezınfeksııa sharalary jasalýda. Biraq «Jedel járdem» qyzmetiniń jumysy toqtamaıdy.
- Eger qala turǵyndarynyń boıynda koronavırýs belgilerine uqsas belgileri bolsa, qyzýy kóterilip, jótel bastalsa, emhanaǵa kelmesin, «Jedel járdem» qyzmetin úıge shaqyrýyn suraımyz,- dedi Nurlybek Ermekuly.
Oral qalasynan eń shalǵaı jatqan Jánibek aýdanynda da sońǵy kúnderi eki naýqas tirkeldi. Olardyń biri – Atyraý oblysyndaǵy Teńiz kenishinde vahtalyq ádispen qyzmet etetin jumysshy bolsa, ekinshisi aýylda azyq-túlik dúkenin ustap, Oral qalasyna taýar ákelýge baryp-kelip júrgen jeke kásipker bolyp shyqty. Qazir naýqastar turatyn Borsy jáne Qamysty aýyldarynda karantın shekteýleri engiziledi.
Batys Qazaqstan
