Aımaqtar • 25 Mamyr, 2020

«Nurly jer» arqyly Qyzylorda oblysynda 6400 turǵyn úı salynady

31 ret kórsetildi

Qyzylorda oblysynda bıyl qarjylandyrýdyń barlyq kózderi esebinen 784 myń sharshy metr nemese 6400 turǵyn úı salý mindeti tur dep habarlady IIDM baspasóz qyzmeti.

Bıylǵy I toqsanda salaǵa 6,4 mlrd teńge ınvestısııa baǵyttalyp, jalpy aýdany 130,3 myń sharshy metr bolatyn 922 jeke úı paıdalanýǵa berildi.

Jalpy bıyl «Nurly jer» memlekettik baǵdarlamasy sheńberinde Qyzylorda oblysynda ınjenerlik-kommýnıkasııalyq ınfraqurylym jáne turǵyn úı qurylysyna 9,6 mlrd. teńgege 47 joba iske asyrylyp, 1385 adam jumyspen qamtylady.

Kredıttik nemese jalǵa beriletin 873 páterdi paıdalanýǵa berý josparlanyp otyr.

Onyń ishinde satyp alý quqyǵynsyz jalǵa beriletin turǵyn úı qurylysyna 22 jobany iske asyrý úshin 5,3 mlrd. teńge qarastyrylǵan. I toqsanda bul maqsatqa 60 mln. teńge aýdarylyp, ol tolyqtaı ıgerilgen. Jyl sońyna deıin jalpy aýdany 43,8 myń sharshy metr bolatyn 680 jalǵa beriletin páter paıdalanýǵa beriledi. Halyqtyń az qamtylǵan áleýmettik toptaryna, kóp balaly otbasylarǵa beriletin ol baspanalardyń qurylysyna 825 adam jumysqa tartylady. 

Al kredıttik turǵyn úı qurylysyna 17 jobany iske asyrý úshin 1,9 mlrd. teńge qarastyrylǵan. Oǵan 12 myń sharshy metr turǵyn úı nemese 193 páterdi paıdalanýǵa berý josparlanǵan. Ol jobalardy iske asyrý úshin 301 adam jumyspen qamtylady. 

Sonymen qatar, «Nurly jer» memlekettik baǵdarlamasy aıasynda 2%-ben nesıe beriletin «Baqytty otbasy» baǵdarlamasyn júzege asyrýǵa bıyl respýblıkalyq bıýdjetten 309 turǵyn úı qaryzyna 3 mlrd. teńge qarastyrylyp otyr.

Oblysta turǵyn úı qurylysy aýdandaryna ınjenerlik-kommýnıkasııalyq ınfraqurylym júrgizýge 8 joba iske asyrylady. Ol maqsatqa 2,4 mlrd. teńge bólinedi. Atalǵan jobalar boıynsha 259 jumys orny ashylady. 

 

Sońǵy jańalyqtar

Qazaqstanda dollar qymbattady

Ekonomıka • Keshe

Uqsas jańalyqtar