Aımaqtar • 25 Mamyr, 2020

Almaty: Karantınde Kókjaılaý shatqalynda toılatqandar túgel jazalanady

303 ret kórsetildi

Búgin Almaty qalasy óńirlik kommýnıkasııalar qyzmetiniń alańynda ótken onlaın brıfıngte Almaty qalasy ákiminiń birinshi orynbasary Erlan Qojaǵapanov osy Ulttyq parkke baryp, konsert uıymdastyryp, artynan qoqystaryn jaıratyp ketken týrısterge shara qoldanylatynyn eskertti. Qazirgi tańda bul keleńsizdikpen quqyq qorǵaý organdary aınalysyp jatyr.

Qysqasy, ákimdik tıym salynǵanyna qaramaı, Kókjaılaý shatqalyna shyqqan týrısterdiń bárine shara qoldanbaq. Ile-Alataý ulttyq saıabaǵynda ruqsatsyz adamdardy aparǵandar qylmystyq jaýapkershilikke tartylýy da múmkin.

«Karantın kezinde kópshiliktiń jappaı jınalýyna tyıym salynǵan. Biraq ókinishke oraı bul máseleniń qaýiptiligin adamdar túsinbeıdi, halyqty jınaıdy. Biz osy  máseleni qolǵa aldyq. Qala ákimi PD basshysyna naqty tapsyrma berdi, prokýratýrada aınalysyp jatyr. Biz osy azamattardyń ústinen ákimshilik is qozǵaımyz. Eger qajet bolsa uıymdastyrýshylardyń ústinen qylmystyq  is qozǵaımyz. Ol ulttyq park, oǵan ruqsatsyz kirýge bolmaıdy. Jınalǵandar konsert ótkizip, qoqystaryn shashyp,  ketip qalǵan. Adamdar maskasyz júrgen», – dedi Erlan Qojaǵapanov.

Esterińizge sala keteıik, 24 mamyrda Kókjaılaýda biraz adam jınalyp, karantınge qaramastan merekelik  shara ótkizgen. Tipten erekshe qorǵaýdaǵy ekologııalyq saıabaq sanalatyn taý shatqalyna týrıster  qymbat kólikterin de aparǵan. Buǵan deıin  Ekologııa, geologııa jáne tabıǵı resýrstar mınıstrliginiń ókilderi karantın kezinde Almatydaǵy Kókjaılaý shatqalynda bolǵan zańsyzdyqqa baılanysty málimdeme jasaǵan edi. Mınıstrlik ókilderi Kókjaılaý  shatqalynda shattanyp júrgen kóliktiń ıesine 100 AEK mólsherinde (277 800 teńge) aıyppul salynǵanyn habarlady. Al tergeýmen qazir Medeý aýdandyq polısııasy aınalysyp jatyr.  

«Bul jaıt boıynsha qazir Medeý aýdandyq polısııasy tekserý júrgizip jatyr. Polısııaǵa osy oqıǵa boıynsha 102 pýltine jedel qońyraý der kezinde túsken joq. Bul jaıtty áleýmettik jeliler arqyly bildik. Qoqys tastaǵany úshin jáne karatın kezinde osyndaı shara uıymdastyrǵany úshin adamdar mindetti túrde zań aldynda jaýap beredi», – dedi Almaty qalasy PD resmı ókili Saltanat Ázirbek. 

 

ALMATY

Sońǵy jańalyqtar

Jetinshi maýsymnyń jetistigi

Rýhanııat • Keshe

Uqsas jańalyqtar