Ekonomıka • 25 Mamyr, 2020

Deldal bank «Delta Bank» salymshylaryna ótem tóleýdi jalǵastyrady

18 ret kórsetildi

«Qazaqstannyń depozıtterge kepildik berý qory» AQ «Delta Bank» AQ salymshylaryna kepildik berilgen ótem tóleıtin agent bank – «Bank SentrKredıt» AQ-men aradaǵy agenttik kelisimniń merzimin 6 aıǵa uzartý týraly sheshim qabyldady. Osylaısha agent bank óz bólimshelerinde «Delta Bank» AQ salymshylaryna kepildik berilgen ótem tóleýdi 2020 jyldyń 22 qarashasyna (qosa alǵanda) deıin jalǵastyratyn bolady.

Agent bankpen arada qaıtadan qol qoıylǵan kelisimniń merzimi aıaqtalǵan soń, salymshylar tikeleı Qorǵa, dálirek onyń Almaty men Nur-Sultan qalalaryndaǵy bólishelerine júgine alady. Elmizdiń basqa óńirlerinde turatyn salymshylar ótinishterin jáne notarıýs kýálandyrǵan qujattaryn poshta arqyly jiberý múmkindigine ıe.

Bul olarǵa qosymsha shyǵyn keltiretini belgili. Sondyqtan Qor salymshylarǵa kepildik berilgen ótemdi alý úshin Agent banktiń bólimshelerine júginýdi usynady. Al bul úshin aldyn ala 505 nómiri (uıaly telefon arqyly habarlasý tegin) 8 (727) 244 30 30 nemese www.bcc.kz.m saıty arqyly bank bólimshesiniń jumys tártibin anyqtap alǵan jón.

Salymshylar ótinishti agent bankke tikeleı nemese senim bildirilgen tulǵa arqyly usyna alady. Jeke ózi kelgen jaǵdaıda salymshy ótemdi tóleý jóninde ótinishti jáne jeke basyn kýálandyratyn qujatty usynady. Al senim artylǵan tulǵa basqa qujattarmen qosa notarıýs kýálandyrǵan senimhat usynady.

Agent bank Qordyń atynan jáne qarajaty esebinen jeke tulǵalar men jeke kásipkerlerdiń «Delta Bank» AQ-ta ornalastyrylǵan depozıtteri, olardyń ishinde kapıtaldanǵan syıaqylardy eskere otyryp, salymdary, aǵymdaǵy shottary jáne tólem kartochkalary boıynsha ótem tóleıdi.   

Kepildik mólsheri ulttyq valıýtadaǵy depozıtter boıynsha – qosa eseptegende 10 mıllıon teńgege deıin, shetel valıýtasyndaǵy depozıtter boıynsha – qosa eseptegende 5 mıllıon teńgege deıin.

Tólemder ulttyq valıýtada kassada qolma-qol aqshamen nemese salymshynyń ótinishinde kórsetilgen bank shotyna aýdarý arqyly júzege asyrylady.       

Eske sala ketelik, «Delta Bank» AQ salymshylaryna kepildik berilgen ótemdi agent bank arqyly tóleý 2018 jyldyń 17 mamyrynan beri júzege asyrylyp keledi. Osy ýaqyt ishinde jalpy somasy 99,7 mln teńgege ótem tólendi. Bul Qor mindettemeleriniń jalpy somasynyń 49,5 paıyzyn quraıdy. Barlyǵy 326 salymshy depozıtteri boıynsha ótem aldy. Bul «Delta Bank» AQ salymshylarynyń jalpy sanynyń 12 paıyzyna teń.

Sońǵy jańalyqtar

Jetinshi maýsymnyń jetistigi

Rýhanııat • Keshe

Uqsas jańalyqtar