Soǵylmaǵan sońǵy qońyraý

Al bıylǵy sońǵy qońyraý soǵylmady. Álemdi álekke salǵan koronavırýs pandemııasyna baılanysty bıylǵy sońǵy qońyraý erekshe jaǵdaıda ótti. Bul el tarıhynda, bilim salasynda buryn-sońdy bolmaǵan jaǵdaı. Iá, elimizdiń mektepterindegi sońǵy qońyraý sharasy onlaın túrde ótkizildi.

Prezıdent Qasym-Jomart Toqaev Twitter jelisindegi paraq­shasynda mektep túlek­terin «sońǵy qońyraý» kúnimen quttyqtap, «Asyl arman­daryńyz oryndala bersin! Bolashaq­taryńyz jarqyn bolady dep senemin! Jas urpaqty ǵajaıyp bilim álemine jeteleıtin ustaz­dar qaýymyna qajyrly eńbek­teri úshin alǵys aıtamyn!» dep, túlekterge sáttilik tilep, ustaz­darǵa rızashylyǵyn bildirdi.

Jalpy alǵanda bıylǵy oqý jyly 4 mıllıonnan astam oqýshy men stýdenttiń esinde qashyqtan oqytý formatyna kóshýmen saqtalyp qalatyny sózsiz. Elimizde 7 412 mektep bar, onda 3 349 069 bala oqıdy. 9 synyp oqýshylarynyń sany – 266 897, 11 synyp túlekteriniń sany – 144 706. Ádettegideı túlekterdiń sanynyń kóptigi jaǵynan Túrkistan oblysy aldyńǵy orynda tur. Bul aımaqta bıyl 24 myńnan astam túlek mekteppen qosh aıtysty. Al «Altyn belgige» úmitkerler sany – 8 506. Bıyl UBT-ǵa qatysý boıynsha rekordtyq jaǵdaı tirkelip, test­ke 130 myńnan astam túlek qaty­sý­ǵa bel baılap otyr. Onyń ishinde 111 017-si bıylǵy oqý jyly­nyń mektep túlegi bolsa, 20 000-nan astamy kol­ledj jáne ótken oqý jyl­dary­nyń mektep túlegi.

Karantınge baılanysty qazaq­standyq oqýshylar attestatyn 3-4 maýsymda ashyq alańda alady. Onyń da óz tártibi bar.

Degenmende bul jaǵdaı oqýshylardyń da, ustazdardyń da saǵyn syndyrmaıdy, rýhyn túsirmeıdi. Qashyqtan oqytý men sońǵy qońyraýdy onlaın túrde ótkizý qıyn sátte qolǵa alynǵan ýaqytsha sharalar ekenin el jaqsy túsinedi. Biz karantın kezinde temirdeı tártipti saqtaýdyń arqasynda qıyndyqty jeńemiz.

Bul jaǵdaı ásirese, mektep bitirýshi túlekterdiń asyl armanyna, aldaǵy josparyna, jarqyn bolashaǵyna eshqandaı keri áser etpeýi tıis. Bıylǵy mektep bitirýshiler álem tarıhyndaǵy erekshe túlekter. Olardyń oqýǵa, ǵylym-bilimge degen taý­daı talaptaryna eshqandaı da qıyndyq qarsy tura almaıtyny anyq. Endeshe, arman qýǵan túlekterimizdiń alar asýy bıik bolsyn.