Jasyratyny joq, Tótenshe jaǵdaıdyń aıaqtalyp, karantın talabynyń jeńildeýi keıbir óńirde koronavırýstyń kúrt órship ketýine alyp kelgendeı. 24 mamyr kúni qaýipti indetti juqtyrǵan taǵy 209 naýqas tirkeldi. Naqtyraq aıtsaq, Almaty qalasynda – 37, Qaraǵandy jáne Jambyl oblystarynyń árqaısysynda – 33, Nur-Sultan qalasynda – 32, Batys Qazaqstan oblysynda – 28, Atyraýda – 12, sonymen ınfeksııa bas-aıaǵy 12 oblys pen eki qalanyń turǵyndarynan anyqtaldy. Osyǵan baılanysty Batys Qazaqstan oblysy karantın merzimin 15 maýsymǵa deıin, Atyraý oblysy men Shymkent qalasy 8 maýsymǵa deıin, Shyǵys Qazaqstan oblysy 1 maýsymǵa deıin sozýǵa májbúr boldy. Jambyl oblysynda indettiń ósý qarqyny 12,7 paıyzǵa jetkendikten bul aımaqta da karantın talaptary qaıtadan qatańdatylmaq.
O basta bul indet jasy úlken jandar úshin óte qaýipti ekeni aıtylǵan bolatyn. Sóıtip keıbir mekemeler jasy 65-ten asqan kisilerdi úıde otyryp jumys isteýge jiberdi. Biraq jaqynda Nur-Sultan qalalyq densaýlyq saqtaý basqarmasynyń basshysy Sáýle Qısyqova vırýs juqtyrǵandardyń 76 paıyzy 18 jastan 49 jas aralyǵyndaǵylar ekenin aıtty. 16%-y 50-69 jas shamasyndaǵy kisiler bolsa, 70 jastan asqan qarttar – 2%, al balalar 6%-dy qurap otyr.
Budan Densaýlyq saqtaý mınıstrliginiń ókilderi ótirik aıtqan ba dep qalatynyń anyq. Joq. COVID-19 ınfeksııasynyń qart kisiler úshin óte qaýipti ekenine kúmán joq. Bul bizdiń elde 18 jastan 49 jas aralyǵyndaǵylardyń tártip pen tazalyqty kóbirek buzatynyn, sodan bul indettiń quryǵyna osy jastaǵylardyń kóbirek ilinetinin ańǵartsa kerek. Mysaly, Qaraǵandy oblysynda aýrýdyń 1 jaǵdaıy 18 oshaqtyń paıda bolýyna sebep boldy. Túrkistan oblysynda da 1 pasıent 8 aýrý oshaǵyn paıda qylyp, 20 adamǵa juqtyrǵan. Nur-Sultan qalasynda bir otbasyndaǵy 5 birdeı adam túgel syrqattandy. Iаǵnı aýyzasharǵa barǵan pasıent mańyndaǵylarǵa ınfeksııa taratqan. Bir adamnyń salǵyrttyǵy bútindeı bir otbasynyń, bir áýlettiń osynaý indetke shaldyǵýyna sebep bolýda. Sondyqtan ár adam tártipti ózi ǵana saqtamaı, janyndaǵylardan da talap etýi tıis.
Taǵy bir aıtary, indetti juqtyrǵandardyń 62 paıyzynda aýrýdyń belgileri baıqalmaıdy. Densaýlyq saqtaý mınıstri E.Birtanov: «Vırýs juqtyrǵandardyń sanynyń ósýi halyq arasynda profılaktıkalyq testtiń kóbeıgenimen baılanysty. Test nátıjesinde anyqtalǵan naýqastardyń 80-85 paıyzy aýyrmaǵan, sımptomy joq» deıdi. Iаǵnı el turǵyndary «jótel, dene qyzýym joq, boıymda koronavırýstyń eshqandaı belgileri baıqalmaıdy» dep arqany keńge salýyna bolmaıdy. Kez kelgen adam ınfeksııany taratyp júrgenin ózi de bilmeýi múmkin.
Bul indetke beıjaı qaraýdyń saldary ǵoı, blok-beketterde tártip buzý áli kúnge tyıylmaı keledi. 25 mamyrda tańǵy saǵat 05.26-da BMW markaly kóligin júrgizýshi Almaty oblysy Qarasaı aýdany Kóksaı shaǵyn aýdany Qojabekov kóshesimen soltústik baǵytta kele jatyp, Jańa Ǵasyr kóshesiniń qıylysynda №4 blok-beketke baryp soǵylyp, ınersııamen patrýldik kólikti baryp urǵan. Kóliktegi eki polısııa qyzmetkeri qaıtys boldy. Araq iship, mashına aıdaǵan júrgizýshi qamaýǵa alynyp, sotqa deıingi tergeý bastaldy.
Polıseılerdiń bireýi – 42 jastaǵy aǵa leıtenant Jaras Janǵazıev alǵan jaraqatynan jedel járdem jetkenge deıin qaıtys boldy. Ol – Batys Qazaqstan oblysynyń týmasy, ishki ister organdarynda 2001 jyldan bastap eńbek etken. Úılengen, artynda eki perzenti qaldy. Al 1994 jyly týǵan polısııa serjanty Dastan Ábdiqanov aýrýhanada qaıtys boldy. Úılengen, sońynda týǵanyna bir aı bolǵan qyzy qaldy.
Sońǵy málimetterge qaraǵanda bul indetten jazylǵandardyń sany 4532-ge jetti.
Infografıkany jasaǵan Amangeldi Qııas, EQ
