Qaı istiń tigisin kókteseń de, aldymen uıytqy bolarlyq alǵashqy qarjy qajet ekenin kásippen aınalyspaǵandardyń ózi de jaqsy biledi. Zerendilik Damıra Bıtenova joǵaryda atalǵan joba boıynsha qyr-syry mol kásipkerlik negizderin táp-táýir meńgerip, jeke kosmetologııalyq kabınetin ashty. Shaǵyn aýdan ortalyǵynda bul aıtarlyqtaı jańalyq. Jalǵyz Damıra ǵana emes, jańa jyldan beri aýdannyń 22 adamy óz isin órge bastyramyz dep umtylyp otyr. Quptarlyq-aq qadam.
– Súıikti isimdi tabys kózine aınaldyrý ońaı sharýa emes. Meniń bilýimshe, eń aldymen kásipkerlik negizderin qapysyz meńgerýiń kerek – deıdi Damıra Bıtenova, – áıtpese, qur umtylys oryndalmaıtyn qııal bolyp qalýy ǵajap emes. Eń aldymen, óziń aınalysatyn istiń qyr-syryn jiligin shaǵyp, maıyn ishken maman bolýyń shart. Eger óziń bilmeseń, onda bul tarapqa qadam basýǵa bolmaıdy.
О́zi medbıke bolyp jıyrma jyl jumys istegen eken. Kosmetologııa kabınetin ashqanda da bilimi men biligine súıengen. Jasaǵan bıznes jospary da qurǵaq qııaldan qurylmaǵan. Naqty, ómirdiń ózinen oıyp alǵan baǵytty qamtıdy. Tabys tetiginiń qulaǵy qyltıyp turǵan soń grant ıegeri atanǵan.
– Negizinde baǵdarlamanyń kóp kómegi tıdi. О́z isiniń has sheberleri qarjylyq saýattylyqqa úıretti. Kásipker adamǵa ol da kerek. Biz buryn tipti salyqty qalaı tóleý kerek ekenin de bilmeıtin edik qoı, – deıdi ol, – jeke kásipker retinde tirkeldim, endi erinbeı eńbek etpekpin.
Grant qarjysyna kosmetologııa kabınetine qajetti jabdyqtardy satyp alypty. Bastapqyda qurqyltaıdyń uıasyndaı kishkentaı kabınet bul kúnde qyzmet kórsetý aıasyn birtindep keńeıtip keledi.
– 2019 jyly 132 adamǵa 51 mln teńgeniń granty berildi. Biz bolashaq kásipkerlerdi bir jyl boıy jumys isteýge úırettik. Onyń ishinde býhgalterlik esep, salyq tóleýdiń tártibi tárizdi esep-qısap bar, – deıdi aýdandyq kásipkerlerdi qoldaý ortalyǵynyń qyzmetkeri Raýshan Omarova.
«Qoly qımyldaǵannyń aýzy qımyldaıdy» degen ataly sóz bar. Bir úmit, bir kúdikpen kásibin bastaǵandardyń isiniń ońynan ońǵarylǵanyn kórgen zerendilikterdiń tarapynan qulshynys ósip keledi. Bıyl «Bastaý bıznes» aıasynda oqyp bilim alýǵa 300-den astam ótinish tústi. Koronavırýs karantınine baılanysty kásipkerlik negizderi boıynsha oqytý onlaın rejiminde ótkizilýde. Umtylǵandardyń utqanyn kórgen qalǵan jurt ta óz kásibimen aınalysatyn ýaqyt alys emes.
Aqmola oblysy,
Zerendi aýdany
