Qazaqstan • 27 Mamyr, 2020

Erlan Qarın Ulttyq keńes músheleriniń atqarǵan jumystary týraly aıtty

51 ret kórsetildi

Ulttyq qoǵamdyq senim keńesiniń 2-otyrysynda aıtylǵan usynystar tolyqtaı oryndaldy. Bul týraly Ulttyq qoǵamdyq senim keńesiniń 3-otyrysynda QR Prezıdentiniń keńesshisi Erlan Karın aıtty.

«Elimizde tótenshe jaǵdaı rejıminiń engizilýine qaramastan Ulttyq qoǵamdyq senim keńesiniń músheleri aýqymdy jumys júrgizdi. Eń aldymen Ulttyq keńestiń músheleri Memleket basshysynyń 2-otyrysta bergen tapsyrmalaryn iske asyrý boıynsha jumystarǵa belsene qatysty. Berilgen tapsyrmalardy iske asyrý maqsatynda Prezıdent Ákimshiliginiń basshysy 21 tarmaqtan turatyn arnaıy is-sharalar josparyn bekitken bolatyn. Osydan keıin memlekettik organdar jáne Ulttyq keńes músheleri birlese otyryp, berilgen baǵyttardy júzege asyrýǵa kiristi. Ásirese, zań jobalary boıynsha jumys toptaryndaǵy talqylaýlarǵa qatysý Ulttyq keńes músheleriniń negizgi jumys bóligin qurady. Erlan Saırov, Muhtar Taıjan, Asylbek Qojahmetov, Ashat Sadyrbaı, Marat Báshimov, Murat Ábenov beıbit jınalystar, saıası partııalar jáne saılaý týraly zań jobalary boıynsha jumys toptarynyń talqylaýlaryna kún saıyn qatysyp, óz usynystaryn engizip otyrdy. Jalpy alǵanda mundaı shamamen 20 talqylaý ótkizildi. Sonymen qatar Ulttyq keńes músheleriniń qatysýymen Parlamentte parlamenttik oppozısııa ınstıtýtyn engizý, Qylmystyq kodekstiń 130-babyn dekrımınılızasııalaý, 174-bapqa ózgerister engizý boıynsha basqa da zań jobalary qarastyryldy», - dedi Erlan Qarın.

Onyń aıtýynsha, Erlan Saırov pen Aıdos Sarym Elbasy N.Nazarbaevtyń bastamasymen koronavrıýsqa qarsy kúres jaǵdaıynda áleýmettik osal toptarǵa qoldaý kórsetý úshin qurylǵan «Birgemiz» qorynyń qamqorshylyq keńesine kirdi. Oǵan qosa, elimizdiń óńirlerinde koronavırsqa qarsy iske asyp jatqan kúres sharalarynyń tıimdiligi Ulttyq keńes músheleriniń tarapynan únemi baqylaýda boldy.

«Marat Shıbutovtyń suranymy negizinde Almaty qalasyndaǵy júk tasymaly boıynsha keıbir máseleler túzetilip, jaqsartyldy. Aıdos Sarym BAQ jumysynyń jekelegen suraqtary jáne turmystyq zorlyq-zombylyq jaǵdaılarynyń ósýi boıynsha másele kóterdi. Al Asylbek Qojahmetov Aqmola oblysyndaǵy jedel shtab jumysymen tanysty. Prezıdent keńesshisi Baǵdat Mýsınniń jetekshiligimen qurylǵan jumys toby mektep oqýshylaryn qashyqtan oqytý prosesin tıimdi uıymdastyrý jumystaryna atsalysty. Tóleýtaı Rahymbekov aýylsharýashylyq taýarlaryn óndirýshilerge arnaıy onlaın keńes ótkizip otyrdy. Sondaı-aq tanymal quqyq qorǵaýshy, advokat Aıman Omarova Sybaılas jemqorlyqqa qarsy is-qımyl agenttigimen birlese otyryp, onlaın rejımde halyqqa quqyqtyq keńes berý boıynsha jobany iske asyra bastady.  Nátıjesinde búgingi kúnge deıin Memleket basshysynyń Ulttyq qoǵamdyq senim keńesiniń 2-otyrysynda bergen tapsyrmalaryn iske asyrý boıynsha is-sharalar josparynyń 11 baǵyty tolyqtaı júzege asty. Oǵan qosa birqatar zańnamalyq aktilerdiń jobalary Parlamentte talqylaýdan ótýde. Sondyqtan Ulttyq keńes músheleri daıyndaǵan usynystardyń negizgi bóligi iske asty deýge bolady», - dedi Prezıdent keńesshisi.

 

 

Sońǵy jańalyqtar

Uqsas jańalyqtar