Aımaqtar • 27 Mamyr, 2020

Jambylda 3603 jas maman «Dıplommen – aýylǵa!» baǵdarlamasynyń qatysýshysy atanǵan

27 ret kórsetildi

Qazaqstan Respýblıkasynyń Tuńǵysh Prezıdenti Nursultan Nazarbaevtyń bastamasymen elimizde júzege asqan «Dıplommen – aýylǵa!» memlekettik baǵdarlamasyna bıyl 10 jyl. Baǵdarlama sheńberinde kóterme járdemaqy jáne turǵyn úıge bıýdjettik kredıt berý túrindegi áleýmettik qoldaý sharalary jáne ózge de jeńildikter qarastyrylǵan. Degenmen, aýyldyq jerlerdegi kadr tapshylyǵyn tolyqtaı joıý áli kúnge deıin múmkin bolmaı otyr.

Jambyl oblysynyń ákimi Berdibek Saparbaev jas mamandardyń jumysqa ornalasýy jóninde jıyn ótkizdi. О́tken jyldan bastap oblystyq ekonomıka jáne bıýdjettik josparlaý basqarmasy bul baǵdarlamanyń úılestirýshisi bolyp tabylady. Atalǵan basqarmanyń basshysy Gúldana Jaýynbekovanyń aıtýynsha, 2010-2019 jyldar aralyǵynda 3603 jambyldyq baǵdarlama qatysýshysy atanyp, olar jalpy kólemi 564,4 mıllıon teńgeniń kóterme járdemaqysyn alǵan. Onyń ishinde 1814 mamanǵa 5,2 mıllıard teńgege jeńildetilgen nesıe berilgen. Bilim berý salasynda 1027, densaýlyq saqtaýda 347, aýyl sharýashylyǵynda 119, mádenıette 51, sportta 40, áleýmettik qamsyzdandyrý salasynda 6 maman jumyspen qamtylǵan.

Sondaı-aq, aǵymdaǵy jyly 101 mamanǵa 27,7 mıllıon teńge mólsherinde kóterme járdemaqy, 10 mamanǵa 38,4 mıllıon teńge kóleminde turǵyn úı nesıesi berilgen. Jalpy bıyl «Dıplommen – aýylǵa!» baǵdarlamasyn iske asyrý úshin 1 mıllıard teńgeden astam qarjy bólinip otyr. Nesıe jeńildetilgen sharttarmen, ıaǵnı 15 jylǵa deıin, jyldyq 0,01 paıyzdyq mólsherlememen berilgenine qaramastan, jyl saıyn boryshkerlerdiń sany artýda. «2019 jyldyń 1 qyrkúıegindegi málimet boıynsha 1814 mamannyń 652-si nesıe boıynsha qaryz ekendikteri anyqtaldy. Olarmen túsindirý jumystary júrgizilýde. Nátıjesinde 2020 jyldyń 1 mamyryndaǵy aqparat boıynsha boryshkerler sany 529-dy qurady. Jalpy, «Dıplommen – aýylǵa!» baǵdarlamasy aýylǵa mamandardy kóptep tartýǵa jáne jumyssyzdyq deńgeıiniń tómendeýine múmkindik beredi», deıdi Gúldana Jaýynbekova. Bul rette Berdibek Saparbaev aýdan ákimdikterine joǵary oqý oryndarymen tyǵyz baılanysta jumys isteýdi jáne óńirdegi mamandardyń jaǵdaıyna taldaý jasaýdy tapsyrdy. «Jergilikti jerde taldaý jasap, qaı salaǵa, qandaı mamandar qajet ekenin anyqtańyzdar. Jyl saıyn suranystaǵy mamandyqtar boıynsha ýnıversıtetterdi qansha stýdent bitiretinin baqylap otyrý kerek. Bıylǵy oqý jyly da aıaqtalyp qaldy, al aýdan ákimderinde ondaı málimetter joq. Bárin az ýaqytta oryndaý kerek. Men árdaıym barlyq salaǵa jas mamandardyń qajet ekenin aıtyp júremin. Aldaǵy ýaqytta olardyń bastamashyl qasıetteri kóptegen máselelerdi sheshýge yqpal etetin bolady. «Dıplommen aýylǵa!» baǵdarlamasynyń múmkindikterin paıdalana otyryp, biz olardy tıisti qajettiliktermen qamtamasyz ete alamyz», dedi Berdibek Saparbaev.

Sondaı-aq, oblystyq jastar saıasaty máseleleri basqarmasynyń basshysy Serikbol Berikqoja jergilikti atqarýshy organdarǵa nesıege bólingen qarjyny paıdalanyp, qyzmetkerler úshin turǵyn úı salýdy usyndy. Basqarma basshysynyń aıtýynsha, eger qyzmettik páterlerdi keıinnen satyp alýǵa múmkindik bolatyn bolsa, ol jastardyń aýylda turaqtaýyna kóp septigin tıgizedi. Berdibek Saparbaev bul máseleniń mindetti túrde qaralatynyn jetkizdi.

 

Jambyl oblysy

Sońǵy jańalyqtar

Jetinshi maýsymnyń jetistigi

Rýhanııat • Keshe

Uqsas jańalyqtar