Aımaqtar • 27 Mamyr, 2020

Prezıdent tapsyrmalary Jambyl oblysynda júıeli oryndalýda

73 ret kórsetildi

Búgin Jambyl oblysynyń ákimi Berdibek Saparbaev óńirlik kommýnıkasııalar qyzmetiniń alańynda «Memleket basshysynyń koronavırýsqa qarsy is-qımyl jáne daǵdarysqa qarsy sharalar jónindegi tapsyrmalaryn iske asyrý týraly» taqyrybynda onlaın baspasóz konferensııasyn ótkizdi. Berdibek Saparbaev áýeli Memleket basshysynyń Jarlyǵymen 11 mamyrdan bastap tótenshe jaǵdaı rejımi toqtatylǵanyn,  degenmen, ár óńirdiń koronavırýs boıynsha epıdemıologııalyq jaǵdaıyna baılanysty karantındik sharalar saqtalyp otyrǵanyn jetkizdi.

Búgingi tańda oblysta 358 adam koronavırýs indetin juqtyrǵan. Taraz qalasynda 206, Qordaı aýdanynda 46, Baızaq aýdanynda 34, Talas aýdanynda 12 jaǵdaı tirkelgen. Solardyń ishinde 99 jaǵdaı áskerı, 22 jaǵdaı medısına jáne 7 jaǵdaı polısııa qyzmetkerlerinen anyqtalǵan. «Qazir engizilgen karantındik sharalarǵa qaramastan, turǵyndar qaýipsizdik sharalaryna durys kóńil bólmeı otyr. Bizdiń óńirde jalpy 7 laboratorııa jumys istep tur. Búginde oblysta barlyǵy 23 750 adam tekserildi. Olardyń qatarynda áleýmettik mańyzy bar mekeme qyzmetkerleri, dárigerler, áskerıler, polısııa jáne tótenshe jaǵdaı qyzmetkerleri bar. Bul jumysty odan ári jalǵastyratyn bolamyz. Sonymen qosa óńirge Tengız Shevroıl mekemesinde jumys isteıtin 25 adam jáne ózge kompanııalarda vahtalyq tártippen jumys isteıtin jambyldyqtar kelip jatyr. Olardyń arasynda aýrýdy juqtyrǵandar bar. Máselen, «Úndistan-Taraz» reısimen kelgen adamdardyń arasynan 6 oqıǵa anyqtalǵan. Búginge deıin 173 naýqas tolyq emdelip shyqty. Qalǵan azamattar bekitilgen qaýlyǵa sáıkes em alýda. Naýqastardy emdeý jáne oqshaýlaý úshin 1424 tósek-oryn daıyndaldy. Qosymsha 80 provızorlyq tósek ashyldy. Barlyǵy 1504 tósek-oryn bar. Bul jumystarǵa 867 medısına qyzmetkeri tartylǵan. Qazir jatqyzylǵan naýqastardyń sanyna sáıkes 408 qyzmetker jumyldyryldy. El Prezıdenti medısına salasynyń qyzmetkerlerine qosymsha ústemaqy tóleý boıynsha tapsyrma bergen bolatyn. Búginde oblys boıynsha 2 585 medısına qyzmetkerine 409 mıllıon teńge qarjy tólendi», dedi Berdibek Saparbaev.

Jambyl oblysynyń ákimi budan basqa, aldyńǵy shepte júrgen sala qyzmetkerlerine jaǵdaı jasaý úshin 6 qonaqúıge 246 medısına qyzmetkerleri ornalastyrylǵanyn, olardyń júrip-turýyna arnaıy tasymaldaý jumystarynyń uıymdastyrylǵanyn jáne tańǵy, túski, keshki aspen qamtamasyz etilgenin jetkizdi. Sonymen qatar, ákimniń aıtýynsha, oblysta medısınalyq buıymdar men qajetti preparattar qory jetkilikti. Shuǵyl shyǵyndarǵa jalpy 1,5 mıllıard teńge kóleminde qarajat bólingen.

Sondaı-aq, qajetti medısınalyq maqsattaǵy buıymdar men zerthanalyq quraldaryn, jeke qorǵanysh quraldaryn jáne dári-dármekter satyp alý, olardy jetkizý jumystary uıymdastyrylyp, júrgizilýde ekenin aıtty. Al, kópshilik tarapynan qoıylatyn suraqtar men kóteriletin máselelerge jaýap berý úshin «109 Járdem» Call-ortalyǵynyń bazasynda jyldam áreket etý shtaby qurylyp, kúni búginge deıin ol jerge 24 myń suraq túsken. Munda tıisti mekemelerden jaýapty mamandar kezekshiligi uıymdastyrylǵan. Ákim  turǵyndardyń shalǵan qońyraýlaryna jyldam jaýap berilip, árbir suraq boıynsha sharalar qabyldanatynyn, sondaı-aq, bul ortalyq kúni-túni jumys isteıtinin jetkizdi.

«Bizdiń negizi mindetimiz – vırýstyń taralýyna jol bermeý. Oblys aýmaǵynda ornalastyrylǵan barlyq 25 blok-beket áli de kúsheıtilgen tártipte jumys isteıdi. Munda 221 adam, 60 tehnıka jumyldyryldy. Halyq densaýlyǵynyń qaýipsizdigin qorǵaıtyn negizgi qalqan osy beketter bolyp otyr. Bul jerde medısına, polısııa, áskerı qyzmetkerlerdiń jumysyna alǵysymdy aıtamyn. Sonymen qatar, beketterdegi árbir qyzmetker ózine júktelgen mindetti múltiksiz, algorıtm talaptaryna saı oryndaý kerek. Prezıdent memlekettik komıssııa otyrystarynda únemi halyqtyń áleýmettik áleýetine basa nazar aýdaryp keledi. Osyǵan oraı, oblys aýmaǵynda turǵyndardy áleýmettik qoldaý boıynsha keshendi túrde kómek kórsetilýde.

2020 jyly ataýly áleýmettik kómektiń jańa modeli boıynsha 9,5 myń otbasyna, ıaǵnı 52,2 myń adamǵa 1,5  mıllıard teńge tólendi. Jalpy bul maqsatqa 10,9 mıllıard teńge qarastyrylǵan. Kepildendirilgen áleýmettik toptamamen ataýly áleýmettik kómek alýshy otbasyndaǵy 1 jastan 6 jasqa deıingi 18,3 myń balaǵa 1,2  mıllıard teńge qarastyryldy. Tótenshe jaǵdaıǵa baılanysty, 2 aılyq eseptik kórsetkishten tómen emes mólsherde az qamtylǵan jáne áleýmettiń álsiz toptaryna jatatyn turǵyndardyń shotyna mamyr aıynda 79,4 myń adamǵa 442 mıllıon teńge tólenip, 100 paıyzǵa oryndaldy. Tótenshe jaǵdaı kezinde tabysynan aıyrylǵan azamattarǵa 42500 teńge áleýmettik tólem taǵaıyndaýǵa búgingi kúni 300 myńǵa jýyq azamatqa barlyǵy 12,7 mıllıard teńge mólsherinde tólem berildi», dedi Berdibek Saparbaev.

Sondaı-aq, ákim oblys aýmaǵynda tárkilengen azyq-túlik jáne kıim-keshekterdiń muqtaj azamattarǵa taratylyp jatqanyn jetkizdi. Búgingi kúnge deıin quny 484 mıllıon teńgeden asatyn 620 myń halyq tutynatyn taýar balalar úıi, qartar úıi, jasóspirimder úıi, ınternattar sııaqty áleýmettik mekemelerge jáne az qamtylǵan otbasylarǵa tegin taratylǵan. Al, Nur Otan partııasynyń oblystyq fılıaly «BizBirgemiz» aksııasynyń aıasynda jáne demeýshiler men qaıyrymdylyqqa jınalǵan qarajat esebinen 72 myń oblys turǵynyna 1,1 mıllıard teńgeniń kómegi kórsetilgen. Jalpy, oblystyń 400 myń turǵynyna 21 mıllıard teńgege jýyq áleýmettik tólemder tólengen. Búgingi tańda halyq úshin mańyzdy máseleniń biri – tótenshe jaǵdaı kezinde kommýnaldyq qyzmetterdiń shyǵyndaryn óteý bolyp otyr. Bul rette oblys ákimi kommýnaldyq qyzmetterdi óteý jalpy esep-ereje boıynsha, eń kem degende 119 myń turǵynǵa tólenetinin málimdedi. Sondaı-aq, Berdibek Saparbaev Qordaı aýdanyndaǵy ahýal boıynsha da aqparat berdi. «Aýdanda bolǵan tótenshe jaǵdaı kezinde Masanshy, Bular batyr jáne Aýqatty aýyldarynda 39 turǵyn úı men 20 kommersııalyq nysan tolyq búlingen bolatyn. Prezıdent tarapynan azamattarǵa tıisti zań talaptaryna saı kómek kórsetý tapsyryldy. Arnaıy komıssııa arqyly árbir otbasynyń shyǵyny eseptelip, qaıyrymdylyq qorlaryna demeýshilik qarajat aýdaryldy. Aýyldardy qaıta qalpyna keltirý jumystaryn osy jyldyń tamyz aıynda aıaqtaý josparlanyp otyr. Sonymen qatar, ortasha deńgeıde zııan keltirilgen 103 nysan demeýshilerdiń kómegimen jóndeldi. Jalpy, Qordaı aýdanyn damytý aıasynda qurylys-jóndeý jumystaryna bıyldyń ózinde «Jumyspen qamtýdyń jol kartasy» jáne «Aýyl – el besigi» syndy baǵdarlamalar aıasynda qosymsha 20,5 mıllıard teńge bólindi», dedi.

Brıfıng sońynda Berdibek Saparbaev basty mindet – indettiń taralýyna jol bermeý, azamattardyń densaýlyǵyn barynsha qorǵaý ekenin jetkizdi. Sonymen qatar, jergilikti atqarýshy jáne quqyq qorǵaý organdary, densaýlyq saqtaý uıymdary tarapynan indettiń aldyn alý úshin qabyldanyp jatqan sharalarǵa túsinistikpen qarap, karantın rejımin buzbaýǵa shaqyrdy. «Koronavırýs pandemııasynan mindetti túrde ótemiz jáne bizdiń aldymyzda oblysymyzdyń damýy men órkendeýi jolyndaǵy qyrýar jumystar kútip tur», dedi Berdibek Saparbaev.

 

Jambyl oblysy

Sońǵy jańalyqtar

50 keli marıhýanany garajynda saqtaǵan

Aımaqtar • Búgin, 20:09

Elbasy Ahmetjan Esimovti qabyldady

Elbasy • Búgin, 16:35

2020-2021 oqý jylyna daıyndyq qandaı?

Qazaqstan • Búgin, 11:30

42 500 teńgeni alý qalaı júzege asady

Koronavırýs • Búgin, 10:40

Shertershiler qurǵan onlaın-ansambl

Rýhanııat • Búgin, 10:05

Elimizde jazylǵandar sany 35911-ge jetti

Koronavırýs • Búgin, 10:02

Uqsas jańalyqtar