Infografıkany jasaǵan Amangeldi Qııas, «EQ»
Ras, Atyraýda koronavırýstyń taralýyn toqtatý úshin saqtyq sharalary qolǵa alynyp-aq jatyr. Karantın merzimi 8 maýsymǵa deıin uzartylyp, turǵyndardyń túngi saǵat 23:00-den tańǵy saǵat 6:00-ge deıin júrýine shekteý qoıyldy. Dárigerler, ásirese oblystyq jedel járdem stansasy men №2 ınfeksııalyq aýrýhananyń ujymy otbasyna barmastan kúni-túni indetpen arpalysyp jatyr. Qazir qaýipti indetpen kúreske 650 medısına qyzmetkeri tartylyp otyr. Al Teńiz ken ornyndaǵy merdiger mekemelerdiń jumysshylaryn turǵylyqty mekenjaıyna jetkizý qolǵa alyndy. «Teńizshevroıl» JShS úkimetpen jáne jurtshylyqpen baılanys bóliminiń bas menedjeri Rzabek Artyǵalıevtyń aıtýynsha, naýryz aıynan beri ken ornynan 18,5 myń jumysshy shyǵarylǵan.
– Teńiz kenishinen jumysshylardy shyǵarý úshin 40-tan astam kommersııalyq áýe reısi, «Teńizshevroıldyń» «Dash 8» ushaǵymen 211 arnaıy reıs uıymdastyryldy. Sondaı-aq olar mekenjaılaryna avtobýspen (170) jáne temir jol tasymalymen
(16 poıyz) jetkizildi, – dedi Rzabek Artyǵalıev.
Onyń málim etýinshe, jumysshylardyń 90 paıyzynda indet sımptomsyz bolǵany anyqtalǵan. Teńiz ken ornynda PTR taldaýlarynyń sany 8 myńnan asty. Ortasha eseppen kún saıyn 400-ge jýyq taldaý jasalady. Bul tásil arqyly naýqastarmen baılanysqan tulǵalardy anyqtaý statıstıkaǵa aıtarlyqtaı áser etken. «Nátıjesinde, koronavırýs boıynsha oń nátıjeler sanynyń ósýin kórsetken. Jappaı synaqtar júrgizý barysynda vırýs belgileri joq adamdarda da indet tabylyp otyr.
«Teńizshevroıl» men merdiger uıymdar sanıtarlyq-epıdemıologııalyq qyzmetpen birge nusqaýlarǵa sáıkes testilerdi jınaý, indet juqtyrǵan adamdardy anyqtaý, jeke adamdardy oqshaýlaý boıynsha is-sharalardy jalǵastyra beredi. Teńiz ken ornyndaǵy ınfeksııalyq stasıonar koronavırýs ınfeksııasynyń jumsaq jáne sımptomsyz túrimen aýyratyn naýqastardy qabyldaıdy. Munda, arnaıy qabyldanǵan hattamalarǵa sáıkes 376 adam em qabyldap jatyr. Sondaı-aq oqshaýlaý, áleýmettik qashyqtyq, betperde kııý, jeke gıgıenalyq sharalar qatań saqtalǵan.
– Biz barlyq merdiger men olardyń qyzmetkerlerinen osy sharalardy oryndaýdy suraımyz. Olaı bolmaǵan jaǵdaıda, kelisimsharttar men eńbek sharttaryn buzýǵa deıin baratyn qatań sharalar qoldanylady. TShO-nyń qaýipsizdik qyzmeti Jylyoı aýdanynyń ákimdigimen, oblystyq taýarlar men kórsetiletin qyzmetterdiń sapasy men qaýipsizdigin baqylaý jáne polısııa departamentterimen birlesip, Teńizdegi aýysymdyq lagerlerde osy standarttardyń oryndalýyn únemi qadaǵalap otyrady, – dedi R.Artyǵalıev.
Biraq «Teńizshevroıl» JShS basshylyǵy vahtalyq tásilmen eńbek etetin qyzmetkerlerdiń koronavırýs ınfeksııasyna baılanysty jumysqa shyǵa almaǵanyna qaramastan, olardyń jalaqysy tolyq saqtalatynyna sendirip otyr. Al ken ornyndaǵy vahtalyq jumysy merziminen asqan jumysshylardyń jalaqysyna 1,5 koeffısıent qosylady eken.
Bas menedjer Rzabek Artyǵalıevtyń aıtýynsha, Atyraý oblysynda indettiń qoǵamdyq ortada taralmaýy úshin kómek retinde 4,6 mln dollar bóldi. Sondaı-aq naýryz aıynda jalpy quny 1,3 mlrd teńgege baǵalanǵan medısınalyq quraldar men jabdyqtardy satyp alyp, tıisti oryndarǵa tartý etti. Bul – medısına qyzmetkerlerine arnalǵan bir rettik kostıýmder, betperde, respıratorlar, reanımasııalyq jáne respıratorlyq qurylǵylar, eki jedel járdem kóligi, teplovızorlar, zararsyzdandyrý quraldary jáne bıologııalyq materıaldardy tasymaldaıtyn arnaıy konteınerler. Al «Ulttyq saraptaý ortalyǵynyń» Atyraý fılıalyna COVID-19 vırýsyn anyqtaıtyn qurylǵy men testileýge qajetti materıaldar jetkizildi. Ortalyqqa qaıtarymsyz tartý etilgen qurylǵynyń quny 500 mln teńge turady.
– Áleýmettik jaýapkershilik – TShO-nyń qabyldaıtyn sheshimderiniń ishindegi mańyzdy qaǵıdalarynyń biri. Kez kelgen kásiporyn úshin qalypty jumys yrǵaǵynyń saqtalýy mańyzdy. Sol sebepten kompanııada jumys isteıtin árbir qyzmetkerdiń qaýipsizdigin qamtamasyz etýge nazar aýdardyq. Sonymen birge myńdaǵan adamdy qutqaryp, qaýip-qaterge bas tigip júrgen dárigerlerge kómek kórsetýge de kúsh saldyq, – deıdi ol.
Teginde tórtkúl dúnıeniń tynysyn taryltqan qaýipti indet saqtyq sharalaryn saqtaýmen, áleýmettiń jaýapkershilikti jete sezinetin kompanııalardyń qoldaýymen ǵana toqtaıtyny daýsyz. Biraq karantındik shekteýlerdiń talaby beıqamdyqty da, qydyrympazdyqty da kótermeıdi. Tipti eki jep, bıge shyǵatyn pysyqaılyq ta búgingi talap údesine saı kelmeıdi. Eń mańyzdysy – saqtyq. О́ıtkeni saqtanǵan adam ǵana saý júreri daýsyz.
Atyraý oblysy
