Bıyl alǵashqy úsh aıda kartochkamen jasalǵan tólem kólemi úzdiksiz ósken bolatyn. Sáýir aıynda bul oń dınamıka kúrt tómendep, 18 paıyzǵa, ıaǵnı 1 763,7 mlrd teńgege quldyrady. Soǵan qaramastan, byltyrǵymen salystyrǵanda kórsetkish 2,1 ese joǵary ekenin aıta ketý kerek. Byltyr sáýir aıynda bul 839,7 mlrd teńge bolǵan edi.
Respýblıka boıynsha qolma-qol aqshasyz jasalǵan operasııalar kólemi boıynsha aldyńǵy orynda Almaty qalasy tur. Odan keıingi orynǵa Nur-Sultan men Túrkistan oblysy jaıǵasty. О́sim dınamıkasy boıynsha da osy úsh óńir kósh bastap tur.
– Jalpy, halyqtyń qolma-qol aqshasyz tólegen «ortasha cheginiń» kólemi sáýir aıynda 12 976 teńgeni qurady. Iаǵnı naýryz aıyndaǵy 13,279 teńgeden azdap tómendegeni baıqaldy. Al bankomattan alǵan qarajatynyń ortasha somasy – 50 875 teńge, – delingen qaýymdastyq taratqan aqparatta. Qazaqstandyqtardyń únemdeýge kóshkenin osy kórsetkishterge qarap bilýge bolady.
Sáýir aıynda POS-termınal arqyly jasalǵan tólemderdiń jalpy somasy 35,1 paıyzǵa azaıyp, 292,3 mlrd teńgeni quraǵany anyqtaldy. Al ınternet arqyly tólemder kólemi 12,9 paıyzǵa azaıyp, 1 462,1 mlrd teńge boldy. Osylaısha jalpy qolma-qol aqshasyz jasalǵan tólemderdiń basym bóligi, ıaǵnı 82,9 paıyzy ınternet arqyly jasalsa, 16,6 paıyzy POS-termınal arqyly tólengen.
Qazaqstan qarjygerler qaýymdastyǵynyń habarlaýynsha, ýaqyt ótken saıyn POS-termınal arqyly jasalǵan tranzaksııa kólemi quldyrap barady. Sońǵy 12 aıda 18 paıyzǵa tómendegeni osyny kórsetip otyr.
Halyqtyń tólem qabiletine ulttyq valıýtanyń dollarǵa shaqqandaǵy baǵamy da áser etetini túsinikti.
Keshe Brent barreli 36 dollardan kóterilgen-di. Sáıkesinshe KASE-niń kúndizgi sessııasynda ulttyq valıýtamyz 411,6 teńgeden saýdalana bastady.
