О́ńirde tegin dári-dármek alýǵa muqtaj jandardyń qatary kóp. Arnaıy bosatylymmen beriletin dárilerdiń keıbiriniń baǵasy syrqat jandar úshin tym qymbat ekeni de ras. Ásirese, sozylmaly aýrý dıagnozy qoıylǵandardyń qaltasyna aýyr tıedi.
Kókshetaý qalasyndaǵy №1 emhanada tegin-dári-dármek alatyndardyń tiziminde 19 myńnan astam adam bar. Al, memleket tarapynan tegin úlestiriletin preparattardyń tizimi 14-15 aýrýdyń túri boıynsha beriledi.
– 8500 syrqatqa dári-dármek qan qysymynyń tómendigine baılanysty berilýde. Sondaı-aq ıshemııalyq júrek aýrýy, arterııalyq gıpertonııa, arıtmııa, sozylmaly jáne onkologııalyq aýrý túrleri boıynsha da dári-dármekter tegin bosatylady. Olarǵa baılanysty áldebir qıyndyqtar týyndap otyrǵan joq. Barlyǵy jetkilikti mólsherde, – deıdi №1 qalalyq emhananyń provızory Anna Iýha.
Densaýlyq saqtaý basqarmasy karantın kezinde de tegin dári-dármekterdi jetkizýde esh qıyndyqtyń bolmaǵanyn aıtady. Shetelden shyǵarylǵan preparattar da jetkilikti. Bıyl oblys boıynsha tegin dári-dármek satyp alýǵa qazynadan 5 mlrd teńge bólingen.
