Qoǵam • 28 Mamyr, 2020

Týrızm salasy qalypqa kele bastady

30 ret kórsetildi

Bıylǵy týrızm salasynyń toqyraýyna sebep bolǵan COVID-19 pandemııasynyń salqyny bizdi de aınalyp ótken joq. Qoıylǵan shekteýlerdiń saldarynan syrttan keletin týrıster aǵyny 70-80%-ǵa kemigen. Bul týraly keshe Prezıdent janyndaǵy Ortalyq kommýnıkasııalar qyzmeti alańynda ótken jıynda  Mádenıet jáne sport mınıstrligi týrızm ındýstrııasy komıtetiniń tóraǵasy Dastan Ryspekov málimdedi.

Onyń aıtýynsha, tótenshe jaǵdaı kezinde Úkimet týrızm salasyndaǵy sýbektilerdi memlekettik qoldaý boıynsha birqatar shuǵyl sharalar ázirledi. Onyń ishinde týrızm, qoǵamdyq tamaqtaný jáne qonaq úı qyzmeti salasynda kásipkerlik qyzmetti júzege asyratyn zańdy tulǵalar men jeke kásipkerler múlik salyǵynan bosatyldy. Sonymen qatar, aǵymdaǵy jyldyń 1 sáýirinen 1 qazanyna deıin týrıstik qyzmettegi iri kásipkerlik sýbektiler úshin eńbekaqy tóleý qorynan salyq jáne basqa da tólemderdi esepteý men tóleý joıyldy. Shaǵyn jáne orta kásipkerlik sýbektilerine 90 kúntizbelik kúnge deıingi merzimge syıaqy, aıyppul jáne ósimpul esepteý bóliginde jeńildikter engizildi, sondaı-aq banktik qaryz sharttary boıynsha tólemder merzimi uzartyldy.

̶ Tótenshe jaǵdaı aıaqtalǵanymen karantın rejimi ózgergen joq. Dese de, birtindep kóptegen salalar qalypqa kele bastady. Onyń ishinde týrızm salasy da bar. О́ńirler arasynda áýe jáne temir jol qatynasy bir izge túsip keledi. Bul salanyń áli de tolyq jandanýyna birqatar kelergiler týyndap otyr. Onyń ishinde blok-beketterdi alý máselesin erekshe atap ótýge bolady. Bul másele jaqyn arada oń sheshim tabady degen senimdemiz, ̶  dedi D. Ryspekov. Onyń aıtýynsha, bas sanıtarlyq dárigerdiń №37 qaýlysyna sáıkes eńbek ujymynda epıdemııaǵa qarsy rejimniń algorıtmderin saqtaı otyryp, týroperatorlar men týragenttikterdiń qyzmetine ruqsat berilgen.

Sonymen qatar, 1 maýsymǵa qaraı shıpajaılyq-kýrorttyq mekemeler, demalys úıleri jáne týrıstik bazalar sııaqty týrıstik qyzmettiń basqa da obektileriniń jumys algorıtmi bekitiledi. Bul rette basseın, jaǵajaı jáne oıyn-saýyq aımaqtarynyń jumysyna qoıylatyn talaptar da kúsheıtilmek. Aıta keterligi, týrısterdiń demalys oryndarynyń jumysyna qatysty barlyq sheshimderdi jergilikti atqarýshy organdar men óńirdegi bas sanıtarlyq dárigerler birlesip qabyldaıdy.

̶ Byltyrǵy jyl qorytyndysy boıynsha sheteldik týrısterdiń ornalasý kórsetkishi 18% -ǵa ósip, 980 myń adamdy qurasa, jergilikti týrıster sany 12% - ǵa artyp, jalpy 5,3 mln adamdy qurady, ̶ deıdi D. Ryspekov. Onyń aıtýynsha, memlekettik baǵdarlamalar josparly mejede oryndalǵan jaǵdaıda aldaǵy 5 jylda sheteldik týrıster aǵynyn 3 mln adamǵa, otandyq týrısterdi 8 mln-ǵa jetkizý josparlanyp otyr.

COVID-19 pandemııasy jappaı taraǵannan keıin shetelde damalýshylardyń aldyn ala brondalǵan joldamalaryn keri qaıtarýǵa týra keldi. Týrızm ındýstrııasy komıtetiniń tóraǵasy búgingi kúni toqtatylǵan saparlardyń qarajatyn qaıtarý máselesi áli de ózekti ekenin aıtady.

̶  Sheteldik týrıstik paketterdi satyp alǵan otandyq saıahatshylar sapardan bas tartqan jaǵdaıda halyqaralyq tólem júıesi bolǵannan keıin qarajatty qaıtarýǵa uzaq ýaqyt ketedi. Tipti, aqshalaryn qaıtaryp almaýlary da múmkin. Ekinshi másele, qarajatty qaıtarý nemese talap aryz berý boıynsha bir mezgilde ótinishter sany kóp bolǵan jaǵdaıda, týrıstik kompanııalardyń jumysy toqtap, bankrotqa ushyraýyna ákep soǵýy múmkin, ̶  deıdi D. Ryspekov.

Jıynda belgili bolǵandaı, elimizde týrıstik aımaqtardy qajetti ınjenerlik, kommýnıkasııalyq jáne kóliktik ınfraqurylymmen qamtamasyz etý úshin jergilikti oblys ákimdikterimen birlesip respýblıkalyq bıýdjetten jalpy somasy 51,5 mlrd teńgege 44 jobany iske asyrý kózdelmek.

Jyl ortasynda Ortalyq Azııadaǵy eń úlken 500 nómirli kýrorttyq tıptegi qonaq úı kesheni paıdalanýǵa beriledi dep josparlanǵan. Onda kólemdi basseınder, zamanaýı akvaparkter ornalasady. Investısııa kólemi 60 mlrd teńgeni quraıdy.

Sonymen qatar, bıylǵy jazǵy demalysta balalar men jasóspirimderge arnap Nur-sultan qalasynda Bolashaq energııasy murajaıynda, Almaty qalasyndaǵy ulttyq parkte, Túrkistan men Tarazdyń tarıhı-mádenı keshenderinde, sondaı-aq Jıdebaıda sabaqtar ótkizý josparlanyp otyr.

Sońǵy jańalyqtar

Jetinshi maýsymnyń jetistigi

Rýhanııat • Búgin, 19:17

Atyraýda 6 156 adam koronavırýs juqtyrdy

Koronavırýs • Búgin, 18:15

Atyraýda úsh garaj otqa orandy

Aımaqtar • Búgin, 16:51

Atyraýǵa 278 medısına mamany qajet

Medısına • Búgin, 16:43

25 adam ishimdikten ýlanyp qaıtys boldy

Aımaqtar • Búgin, 15:42

Qazaq jáne shet tilin meńgerýge shaqyrady

Rýhanııat • Búgin, 15:27

О́kpeni KT-dan aqysyz ótkizý nege qıyn?

Medısına • Búgin, 12:35

Ilıa Ilın aýrýhanaǵa tústi

Aımaqtar • Búgin, 11:55

Uqsas jańalyqtar