Qoǵam • 29 Mamyr, 2020

Bas kelisim jobasy: kásipodaqtar alǵash ret kúsh biriktirýde

25 ret kórsetildi

Osy jyldyń naýryz aıynda Kásipodaqtar federasııasy Qazaqstan Respýblıkasynyń Úkimeti, jumysshylardyń respýblıkalyq birlestikteri jáne respýblıkalyq jumys berýshiler birlestikteri arasyndaǵy 2021-2023 jyldarǵa arnalǵan jańa Bas kelisimniń jobasyn qoǵamdyq talqylaýǵa shyǵardy. Qoǵamdyq saraptama júrgizý úshin joba barlyq bastaýysh kásipodaq uıymdary men jergilikti kásipodaqtarǵa jiberildi.

Kásipodaqtar federasııasy barlyq respýblıkalyq kásipodaqtar birlestikterine jumysshylardyń eńbek jáne ekonomıkalyq quqyqtaryn, eńbekaqy tóleý deńgeıindegi kepildikterdi qorǵaýdy qamtamasyz etýge baǵyttalǵan negizgi ustanymdardy qoldaýda birińǵaı tásilderdi birlese ázirleý týraly bastama kóterdi.

Ortalyq keńsede 2021-2023 jyldarǵa arnalǵan Qazaqstan Respýblıkasynyń Úkimeti, respýblıkalyq jumysshylar birlestikteri jáne respýblıkalyq jumys berýshiler birlestikteri arasyndaǵy Bas kelisimniń jobasyn daıyndaý boıynsha respýblıkalyq kásipodaq birlestikteri ókilderiniń qatysýymen jumys tobyn qurý týraly birlesken sheshimge qol qoıyldy. Qujatqa Kásipodaqtar federasııasynyń tóraǵasy Satybaldy Dáýletalın, «Amanat» Qazaqstannyń kásipodaqtar yntymaqtastyǵy» kásipodaqtar respýblıkalyq qaýymdastyǵynyń tóraǵasy Andreı Prıgor jáne Qazaqstannyń eńbek konfederasııasy bas hatshysynyń orynbasary Baqyt Kaparov qol qoıdy.

Kezdesýdi ashqan S. Dáýletalın Qazaqstannyń barlyq kásipodaqtarynyń respýblıkalyq birlestikteriniń aldynda ortaq mindet tur. Ol jumysshylardyń quqyqtaryn qorǵaý jáne olardyń múddelerin áleýmettik áriptestiktiń  barlyq deńgeılerinde alǵa jyljytý dep atap ótti.

«Bıylǵy  jyldyń daǵdarys jaǵdaıynda áleýmettik áriptestik júıesiniń róli obektıvti ósýde, onyń aıasynda daǵdarystyń sebepteri men aýqymy taldanyp, jańa jumys oryndaryn saqtaý jáne qurý, áleýmettik jáne eńbek salasyndaǵy kepildemeler berý, ekonomıkanyń naqty sektoryn memlekettik qoldaý sharalarynyń tıimdiligin arttyrý jáne turaqty ekonomıkalyq ósý traektorııasyna  qaıtarý boıynsha usynystar ázirlenýi kerek. Qazaqstan Respýblıkasy Úkimetiniń, jumys berýshilerdiń respýblıkalyq birlestikteri jáne jumysshylardyń respýblıkalyq birlestikteri arasyndaǵy Bas kelisim - áleýmettik áriptestiktiń barlyq júıesiniń shyńy jáne respýblıkalyq deńgeıdegi negiz salýshy qujat bolyp tabylady», - dedi Kásipodaqtar federasııasynyń basshysy.

Satybaldy Dáýletalınniń aıtýynsha, bas kelisim normalarynyń  resmıligi men kómeskiligi, túrli deńgeıdegi kelisimder men ujymdyq sharttar arasynda ózara baılanystyń bolmaýy áli de bar.

«Biz bul jaǵdaıdy ózgertýimiz qajet! Ekonomıkalyq ósý kezinde kózge aıqyn kórinbegen jaıt ekonomıkanyń tómendeýi, jumysshylar tabysynyń azaıýy kezinde múldem bolmaýy tıis», - dep atap kórsetti KRKF tóraǵasy.

«Amanat» Qazaqstannyń kásipodaqtar yntymaqtastyǵy» kásipodaqtar respýblıkalyq qaýymdastyǵynyń tóraǵasy Andreı Prıgor Bas kelisim jobasyn ázirleý úshin biryńǵaı jumys tobyn qurýdy tarıhı oqıǵa dep atady.

«Respýblıkalyq kásipodaq birlestikteri tuńǵysh ret jumysshylardyń múddelerin senimdi túrde qorǵaýǵa sheshim  qabyldady. Bul Qazaqstannyń kásipodaq qozǵalysy tarıhyndaǵy tarıhı oqıǵa », - dedi Andreı Prıgor.

Qazaqstandyq eńbek konfederasııasy da  Bas Kelisimniń jobasymen jumys isteýge kúsh biriktirýdi qoldaıdy. Bul týraly Qazaqstan eńbek konfederasııasy bas hatshysynyń orynbasary Baqyt Qaparov málimdedi.

«Bizde ortaq maqsattar bar jáne olar bizdi biriktirýi kerek. Qazaqstandyq eńbek konfederasııasy Bas kelisimde kórinis tabatyn jumysshylardyń quqyqtaryn qorǵaýdyń biryńǵaı tásilderin ázirleý boıynsha birlesken áreketterdi tolyq qoldaıdy », - dedi óz sózinde Baqyt Kaparov.

Taraptar jumys tobynyń quramyn bekitti, onyń quramyna ár respýblıkalyq kásipodaqtar birlestiginen úsh ókilden kirdi. Qazaqstan eńbek konfederasııasynyń Bas hatshysynyń ekonomıka jónindegi keńesshisi Meıram Qajyken jumys toby músheleriniń kásibıligin atap ótti.

«Men qozǵalystyń birtutas maıdan retinde bastalýyn qoldaımyn. Kásipodaqtar óziniń berik ustanymyn bildirýi tıis. Jumys tobyna ózimizge tanys, óz isiniń sheberleriniń basy biriktirildi. Barlyǵy eshbir qaıshylyqsyz ótedi», - dedi Meıram Qajyken.

Kezdesýdi qorytyndylaı kele, KRKF tóraǵasy Satybaldy Dáýletalın jańa Bas Kelisimdi jasaý buryn-sońdy bolmaǵan qıyn ekonomıkalyq jaǵdaıda júrip jatqanyn  atap ótti. Sondyqtan áleýmettik seriktestiktiń barlyq taraptary úshin jobaǵa «naqty» normalardy engizý óte mańyzdy.

«Jańa Bas kelisim barlyq taraptardyń: jumys berýshilerdiń, kásipodaqtardyń jáne Úkimettiń  múddeleriniń tepe-teńdigin qamtamasyz etetin tirek  jáne senimdi áleýmettik seriktestiktiń úlgisi bolady dep úmittenemin», - dep qorytyndylady Satybaldy Dáýletalın.

Esterińizge sala keteıik, bıyl Qazaqstan Respýblıkasynyń Úkimeti, jumysshylardyń respýblıkalyq birlestikteri jáne respýblıkalyq jumys berýshiler birlestikteri arasyndaǵy 2018-2020 jyldarǵa arnalǵan qoldanystaǵy Bas kelisimniń merzimi  aıaqtalady, sondyqtan Kásipodaqtar federasııasy naýryz aıynan bastap jańa Bas kelisimniń jobasy aıasynda tıisti jumystardy bastap ketti.

Qazaqstanda áleýmettik-eńbek qatynastary zańnamalyq normalardan basqa, Bas kelisimniń normalary men erejelerimen, 22 salalyq jáne 16 aımaqtyq kelisimdermen, 125 myńnan astam ujymdyq sharttarmen retteledi. Ujymdyq sharttar QRKF bastaýysh kásipodaq uıymdary bar kásiporyndardyń 98 paıyzynda jasaldy.

 

Sońǵy jańalyqtar

Jetinshi maýsymnyń jetistigi

Rýhanııat • Keshe

Uqsas jańalyqtar