«Nur Otan» partııasynyń Soltústik Qazaqstan oblystyq fılıalynyń belsendileri osy máseleni eskerip, jol jóndeýshilerdiń jumys sapasyn tekserýdi qolǵa aldy. Munyń óte mańyzdy jáne qajetti is ekenin eskergen oblys turǵyndary oǵan qoldaý bildirýde.
Jýyrda olar Qyzyljardyń irgesindegi Beskól selosyndaǵy 22 shaqyrymdyq jol qurylysyn júrgizý sapasyn tekserdi. Bul jolǵa memlekettik bıýdjetten 800 mln teńge bólingen. Jol jóndeý tenderin Babken Martırosıan basqaratyn oblysqa belgili «Dorojnık. Ashyq aspan» JShS utyp alypty. Jumysty kúzge deıin bitirýdi qolǵa alǵan kásiporyn qazir qyzý áreketke kirisken.
Degenmen júrgizilgen joldardyń sapasyzdyǵyn «nurotandyqtar» birden baıqady. Sonyń ishinde, tekserý tobynyń múshesi Alan Jýkov joldyń tegis emestigin, álden ıreleńdep jatqanyn aıtty. «Erteń júk kólikteri júre bastaǵanda bul joldardyń sapasyz ekendigi birden kórinedi. Osynyń sebebin suraǵanymyzda bizge merdiger tapsyrys berýshiniń geodezıstiń jumysyna smetada qarajat qarastyrmaǵanyn aıtty. Al jerdiń qatty-jumsaqtyǵyn, qysymyn tek sol mamandar anyqtaıdy. Soǵan sáıkes biz qıyrshyqtasty qalyń nemese juqa tóser edik deıdi. Ondaı mamandyqtyń qorytyndysy bolmaǵandyqtan biz barlyq jolǵa asfaltty teńdeı tóseýdemiz» dep jaýap beripti.
Sóıtip, salynyp joldyń ózinen sapasyzdyq anyqtalyp jatyr. Bul máseleni «nurotandyqtar» tıisti oryndarǵa jetkizbekshi. Tek sodan durys nátıje shyqsa ıgi.
Soltústik Qazaqstan oblysy
