Qazaqstan • 29 Mamyr, 2020

Qarýly Kúshterde 2020 oqý jyly «Áskerı qyzmettiń qaýipsizdik jyly» dep jarııalandy

44 ret kórsetildi

Qorǵanys mınıstrliginiń alqa otyrysy áskerı basshylyqtyń, Qorǵanys mınıstrligi men Bas shtabtyń qurylymdyq bólimsheleri basshylarynyń, brıgada, polkter, avıasııalyq bazalar, qoımalar komandırleriniń, jergilikti áskerı basqarý organdarynyń, áskerı oqý oryndarynyń, áskerı polısııa organdary men serjanttyq quram bastyqtarynyń qatysýymen selektorlyq rejımde ótti, dep habarlady mınıstrliktiń baspasóz qyzmeti.

Alqa keńesin asha otyryp, Qorǵanys mınıstri oqý jylynyń qysqy kezeńiniń qorytyndysy boıynsha áskerlerdi daıarlaý, jaýyngerlik kezekshilik, áskerı tártip, quqyqtyq tártip pen áskerler qyzmeti, áskerı qyzmettiń qaýipsizdigi jáne materıaldyq-tehnıkalyq qamtamasyz etý jaı-kúıi máselelerin atap ótti. Tıisti baıandamany Qorǵanys mınıstriniń birinshi orynbasary-Bas shtab bastyǵy general-leıtenant Murat Bektanov tanystyrdy.

Oqytý erekshe jaǵdaıda, atap aıtqanda Qazaqstannyń barlyq aýmaǵy boıynsha tótenshe jaǵdaı rejıminde ótkizildi. Qarýly Kúshter bólimsheleri búkil el boıynsha myńdaǵan shaqyrym joldar men obektilerge dezınfeksııa júrgizdi, blok-beketterde qyzmet atqardy, patrýldeý júrgizdi, júzdegen otandastardy evakýasııalady jáne shet elden gýmanıtarlyq kómek ákeldi.

Qorǵanys mınıstri general-leıtenant Nurlan Ermekbaev Tótenshe jaǵdaı rejımi alynǵanymen, vırýstyń taralý qaýpi áli de joǵary ekenin eske saldy.

Búgingi kúni Qarýly Kúshter dezınfeksııalaý jumystaryn júrgizýdi jalǵastyrýda. Sanıtarlyq-epıdemııaǵa qarsy is-sharalardy qamtamasyz etý boıynsha jergilikti atqarýshy organdarǵa kómek kórsetý maqsatynda shuǵyl túrde 16 sanıtarlyq óńdeý toby quryldy, al 2020 jyldyń 25 mamyrynan bastap áskerde arnaıy óńdeý qurama jasaqtarynyń bólimderi men bólimsheleriniń ınfeksııamen kúresýiniń ekinshi kezeńi bastalǵany týraly jarııalandy.

Qarýly Kúshterdiń koronavırýstyq ınfeksııaǵa qarsy kúres sharalaryna aýqymdy qatysýyna qaramastan, jaýyngerlik daıarlyq sabaqtary jalǵasýda.

Qorǵanys vedomstvo basshysy Bas shtabqa ásker túrleri men tekteri, óńirlik qolbasshylyqtardyń, quramalar men áskerı bólimderdiń ofıser operatorlarynyń biliktiligin arttyrý kýrstaryn ótkizý tájirıbesin jalǵastyrýdy tapsyrdy. Áskerı basqarý organdarynyń daıyndyǵyn taldaý ofıserlerdiń daıyndyq deńgeıine bul oń áser etetinin kórsetti. Jedel daıarlyq is-sharalaryn ótkizýdi kóbeıtýdiń arqasynda jaqsy nátıje qamtamasyz etilgen.

Áskerı qyzmetshilerdi oqytý úshin jańashyldyq engizilýde. Áskerlerdiń kúndelikti tirshiliginen alynǵan naqty oqıǵalar negizinde qalyptasqan jaǵdaılyq keıster qarasytyrylǵan, oqý modýlderi ázirlendi.

Oqý modýlderi Qarýly Kúshterdiń bólimderi men bólimshelerine baǵyttalatyn bolady. Bul áskerı qyzmetshilerdi memlekettik-quqyqtyq, kásibı daıarlyq jáne jeke qurammen aqparattyq-tárbıe jumysy júıesinde oqytýdyń osyndaı formatyn paıdalanýǵa múmkindik beredi.

Qarýly Kúshterdi sıfrlandyrý, áskerlerdi basqarý júıesin avtomattandyrý jáne olardy qazirgi zamanǵy qarý-jaraq pen áskerı tehnıkamen jaraqtandyrý jónindegi jumys erekshe baqylaýda.

Alqa otyrysy barysynda áskerı polısııa bas basqarmasynyń bastyǵy polkovnık Baýyrjan Lekerov qysqy oqý kezeńdegi áskerı qyzmet qaýipsizdigi basqarmasynyń jumysyn qorytyndylady.

2020 oqý jyly «Áskerı qyzmettiń qaýipsizdik jyly» dep jarııalandy. Mınıstr ınfraqurylym obektilerin áskerı qyzmet qaýipsizdigi táýekelderiniń bar bolýy turǵysynan tekserýdi jalǵastyrýdy, sonymen qatar «táýekelderdi basqarýdy» engizýdi tapsyrdy.

Maýsym aıynda jeke quramnyń tamaqtaný obektileriniń sanıtarlyq-epıdemıologııalyq jaǵdaıy tekseriledi.

Osy máseleler kontekstinde saqtaý obektilerindegi órtke qarsy jáne dıversııaǵa qarsy qaýipsizdik úshin jaǵdaı jasaýǵa, qarý men oq-dárilerdi qaýipsiz saqtaýǵa, arsenaldardyń, bazalar men qoımalardyń ınfraqurylymyn jetildirýge jáne damytýǵa úlken kóńil bólinedi. Bul jumys ázirlengen keshendi josparǵa sáıkes jalǵasýda.

Qysqy kezeńde áskerlerdi materıaldyq-tehnıkalyq qamtamasyz etý týraly baıandamada Qorǵanys mınıstriniń orynbasary general-maıor Baqyt Qurmanbaev aǵymdaǵy jyldyń sońyna deıin Qarýly kúshterge 343 birlik jańa qarý-jaraq pen áskerı tehnıka túsetinin aıtty. 176 birlik qarý men tehnıkany jóndeý jáne jańǵyrtý josparlanýda, 27 mıllıonnan astam artıllerııalyq jáne atys oq-dárilerin kádege jaratý kózdelgen.

Qarýly Kúshterdiń jaýyngerlik daıyndyǵy men kúndelikti is-sharalaryn oryndaýdy qamtamasyz etý, Tótenshe jaǵdaı rejımin saqtaý, TJ saldaryn joıý úshin Arys qalasyna 3 211 birlik qarý-jaraq pen áskerı tehnıka tartyldy.

Qazaqstanda qalyptasqan jalpy ekonomıkalyq jaǵdaıda Qarýly Kúshter bıýdjet qarajatyn, motoresýrsty jáne oq-dárilerdi únemdi jumsaý qajet.

QR Qorǵanys mınıstriniń orynbasary general-leıtenant Tımýr Dándibaev sybaılas jemqorlyqqa qarsy is-qımyl jónindegi jumysty qorytyndylaı kele, 2019 jyly QR Qarýly Kúshterindegi sybaılas jemqorlyq qylmystarynyń sany 2018 jylmen salystyrǵanda 65%-ǵa tómendegenin habarlady. 

Senim telefondary, jasyryn saýalnamalar, azamattardy qabyldaýdy júzege asyratyn «Adaldyq alańy» jobalyq keńsesiniń jumys isteýimen áskerı ortada sybaılas jemqorlyqqa qarsy mádenıetti jappaı qalyptastyrý jalǵastyrylýda. Ol jerde sybaılas jemqorlyq táýekelderi anyqtaý jáne olardy tómendetý boıynsha sharalar pysyqtalýda. Qorǵanys mınıstrliginiń saıtynda arnaıy sybaılas jemqorlyqqa qarsy jańa aıdar jandandyryldy.

QR Sybaılas jemqorlyqqa qarsy is-qımyl agenttigimen yntymaqtastyq týraly memorandým sheńberinde aqparat almasý, sybaılas jemqorlyq quqyq buzýshylyqtardy birlesip anyqtaý jáne aldyn alý jumystary júrgizilýde. Memorandým aıasynda 2020 jyldyń qańtar-sáýir aılarynda sybaılas jemqorlyqtyń aldyn alýǵa baǵyttalǵan 2967 is-shara ótkizildi: 2137 jeke áńgimelesý, áskerı bólimderde 710 sabaq, 47 keńes, 39 dóńgelek ústel, 34 BAQ-ta jarııalanym.

Jergilikti áskerı basqarý organdarynda sybaılas jemqorlyqty boldyrmaý úshin memlekettik qyzmetter tizilimine áskerı qyzmetke shaqyrýdy keıinge qaldyrý jáne odan bosatý týraly usynys engizildi. Bul qyzmetter «Azamattarǵa arnalǵan úkimet» memlekettik korporasııasynyń qatysýynsyz elektrondyq úkimet portaly arqyly «E-lısenzııalaý» kómegimen kórsetiledi dep kútilýde.

Alqa otyrysynyń qorytyndysy boıynsha Qorǵanys mınıstri 2020 jylǵy 4 mamyrda shassıdiń aldyńǵy tireýinsiz S-295 áskerı-kóliktik ushaǵyn qondyrǵan áskerı qyzmetshilerge memlekettik nagradalardy tapsyrdy. Áýe kemesi ekıpajynyń saýatty is-qımylynyń arqasynda «Jetigen» áýeaılaǵyna shassıdiń aldyńǵy tireýinsiz qondyrǵan olar, jeke quramnyń ómiri men densaýlyǵyn ǵana emes, sonymen qatar áýe kemesiniń jaramdylyǵyn da saqtaı aldy.

Qazaqstan Respýblıkasy Prezıdenti - Qarýly Kúshterdiń Joǵarǵy Bas qolbasshysynyń Jarlyǵymen Áýe kemesiniń komandıri maıor Jeńis Zaınýldınov jáne komandırdiń kómekshisi kapıtan Ablaı Ibraev II dárejeli «Aıbyn» ordenimen, bort-ınjener maıor Kárim Pahırdınov jáne bort-mehanık praporshık Igor Karabes «Jaýyngerlik erligi úshin» medaldarymen marapattaldy.

Sońǵy jańalyqtar

Almaty mańynda jer silkindi

Aımaqtar • Keshe

Uqsas jańalyqtar