BUU Bas Assambleıasynyń buryshtamasyna sáıkes, mereke 2002 jyly búkil álem boıynsha qyzmet atqaryp júrgen bitimgerlerdiń tıisti janqııarlyǵyna baǵa berý úshin jarııalandy. Bul kún jalpy beıbitshilik pen qaýipsizdikke qol jetkizýge baǵyttalǵan qyzmettiń nátıjelerin bildiredi.
Bitimgerler tek qana qorǵaýshylar emes, olar sonymen qatar jasampaz. Olardyń mindetterine daǵdarysty jaǵdaılardy sheshý men beıbitshilikti qoldaý kiredi.
QAZBAT qazaqstandyq bitimgershilik batalony 2002 jyly Qazaqstan Qarýly Kúshteriniń bitimgershilik mıssııalaryna qatysýy úshin quryldy. 2003 jyldyń tamyz aıynda QAZBAT ınjenerlik-saperlik jasaǵy koalısııanyń turaqtandyrý kúshteri quramynda Irakqa jiberildi. 2008 jyldyń qazan aıyna deıin birneshe rotasııa ótkizildi, Iraktaǵy bitimgershilik mıssııada 250-den astam qazaqstandyq áskerı qyzmetshi qyzmet atqardy. Olar mınaly alańdardy zalalsyzdandyryp, jarylys qaýpi bar zattardy joıdy.
Keıin Kot-d'Ivýar jáne Batys Saharadaǵy beıbitshilikti qoldaý jónindegi BUU mıssııalaryna áskerı baqylaýshylar retinde qatysty. Aıta ketý kerek, Batys Saharda áli kúnge deıin bizdiń alty bitimger qyzmet atqarady, onyń ishinde eki áıel áskerı qyzmetshi bar.
2018 jyldan bastap Qazaqstan bitimgershilik áleýetin iske asyrýdyń jańa múmkindigine ıe boldy. Tarıh betterinde alǵash ret búkil bólimshe, birinshi bitimgershilik rotasy «Lıvandaǵy BUU ýaqytsha kúshteri» mıssııasyna qatysýǵa baǵyttaldy. Búgingi tańda úshinshi bitimgershilik rotasy qyzmet atqarýda, onyń ornyna tórtinshi rota daıyndyq júrgizýde. Qazaqstandyq kontıngent Úndi batalonynyń quramynda óz jaýapkershiligi aımaǵynda mindetterdi oryndaıdy. Atap aıtqanda jergilikti jerdi patrýldeýdi, baqylaý beketterin uıymdastyrýdy, halyqqa kómek kórsetýdi júzege asyrady, sondaı-aq mıssııa shtaby ótkizetin barlyq is-sharalarǵa qatysý.
Qazaqstandyq bitimgerler ózderin naǵyz kásibı mamandar retinde kórsete bildi. Olar tamasha jaýyngerlik daıarlyqty, kez kelgen qoıylǵan mindetterdi sheshýde tózimdilik pen ázirlikti kórsetýde, bul BUU mıssııasynyń basshylyǵymen de joǵary baǵalanady.
Qazaqstandyq bitimgerler qyzmetiniń uıymyn Qorǵanys mınıstri joǵary baǵalady. Ol áskerı qyzmetshilerge beıbitshilik pen qaýipsizdikti qamtamasyz etý jolyndy qyzmetterine sáttilik, sondaı-aq, densaýlyq pen amandyq tiledi.
Qazaqstandyq bitimgerlerdiń jetistikteri áskerı qyzmetshiler mıssııa quramyna kirý úshin ótetin daıarlyqtyń sapasymen tikeleı baılanysty. Qazaqstan Qarýly Kúshterinde bitimshilerdi daıarlaýmen Qorǵanys mınıstrliginiń bitimgershilik daıarlyq ortalyǵy, mınasyzdandyrý ortalyǵy jáne áskerı medısına ortalyǵy aınalysady. Nusqaýshylar bolashaq bitimgerlerdi jan-jaqty daıyndaıdy. Áskerı qyzmetshiler psıhologııalyq testileýden, medısınalyq tekserýden ótedi, halyqaralyq standarttarǵa sáıkes aǵylshyn tili testterin jáne Qazaqstan Qurlyq áskerleriniń bitimgershilik bólimsheleriniń jaýyngerlik daıarlyq baǵdarlamasy boıynsha, teorııalyq jáne praktıkalyq daıyndyqtan tapsyrady. Mıssııadan kelgenderde óz tájirıbelerimen bólisedi.
Ulttyq bólimsheniń bitimgershilik mıssııaǵa qatysýy halyqaralyq qaýipsizdikti nyǵaıtýǵa úles qosýǵa múmkindik beredi jáne eldiń halyqaralyq qoǵamdastyqtyń jaýapty múshesi retindegi bedelin nyǵaıtýǵa qyzmet etedi.
