Dúnıege kelgen qyz balanyń salmaǵy – 3 kg, boıy – 51 sm. Náresteden birden koronavırýske taldaý alynǵan. Sábı indetten din aman. Qazir bólek palatada oqshaýlanyp, dárigerlerdiń baqylaýynda. Anasynyń da jaǵdaıy birqalypty. Jas ana ınfeksııalyq bólimde em qabyldaýda. Bul onyń ekinshi perzenti. Qaýipti dertke ushyrap, san oıǵa ketken áıel aq halatty jandarǵa alǵysyn jaýdyrýda. Otaǵa jetekshilik etken reanımotolog-dáriger Erjan Jumashev táýlik boıy osy ınfeksııalyq gospıtalda. Otbasymen alda taǵy eki apta kórispeıdi. «Koronavırýs indetine shaldyqqan naýqastarǵa ota jasaýda qorǵanysh kıimderi azdap yńǵaısyzdyq týdyrady. Qalǵany naýqastarǵa kórsetetin qalypty qyzmetimiz. Biz úshin bul áıeldiń saýyǵyp, perzentin qolyna alǵany úlken qýanysh bolady», deıdi Erjan Jumashev.
Aıta ketelik, Kentaý qalalyq aýrýhanasynyń dárigerleri osymen koronavırýske shaldyqqan ekinshi naýqasty bosandyryp aldy. Túrkistan oblysy boıynsha qaýipti indetti 358 adam juqtyrǵan. Oblys dárigerleriniń kásibı biliktiliginiń arqasynda 199 naýqas aýyr dertten aıyǵyp, úılerine oraldy.
Túrkistan oblysy
