20-30 adamdy ákele jatqan avtobýs júrgizýshisiniń aýzynan alkogoldiń ıisi ańqyp turǵan. Muny jolaýshylar da rastap, júrgizýshiniń tap saý adam emes ekenin sezip otyrǵandaryn aıtyp, shýlap qoıa berdi. Jaýap alý kezinde 54-jasar júrgizýshi óziniń ishimdik ishkenin moıyndaıdy.
Bul tótenshe jaǵdaı edi. Masań júrgizýshi óziniń ǵana emes salonyndaǵy barlyq jolaýshylardyń, qala berdi kóshe boıyndaǵy adamdar men kólikterge mingen jandardyń ómirine qaýip tóndirgenin túsinbegen. Jasy birazǵa kelse de ol masań kúıde kólikke múlde otyrýǵa bolmaıtynyn bilmeıtin sekildi. Mundaı júrgizýshiler buryn erkin dalada, aýyldy jerlerde turyp, keıin qalaǵa kóship kelgenderdiń arasynan ǵana shyǵýy múmkin. Ol jaǵy endi tekseris barysynda anyqtalady.
Sóıtip, Petropavldyń saqshylary zardaby asa aýyr bolyp, birneshe adamnyń ómirin qııýy múmkin bolǵan qaterdiń aldyn aldy. Bul iste olarǵa jerlesterine nemquraılylyq kórsetpegen kóshedegi azamattar kómektesti. Eger olardyń dabyly bolmasa bálkı avtobýs JKO kezinde bir-aq toqtatylar edi. Al onyń zardabyn kózge elestetýdiń ózi qorqynyshty.
Qazir polısııa atalǵan fakty boıynsha Ákimshilik quqyq buzýshylyq kodeksiniń 608-babymen materıaldar toltyrylyp, prosessýaldyq sheshim qabyldaý úshin Petropavl qalasynyń mamandandyrylǵan ákimshilik sotyna joldady. Bul bappen júrgizýshi 15 táýlikke deıin ákimshilik qamaýǵa alynýy, sondaı-aq jeti jylǵa júrgizýshi kýáliginen aıyrylýy múmkin.
Sondaı-aq, osyndaı júrgizýshiniń jumysqa shyǵýyna jol bergen avtobýs ıesine qatysty ákimshilik yqpal etý sharalaryn qabyldaý úshin ákimshilik quqyq buzýshylyq materıaldar Ákimshilik polısııa bólimine jiberildi.
Polısııa departamenti bastyǵynyń birinshi orynbasary, polısııa polkovnıgi Qanat Aıtbaevtyń aıtýynsha, júrgizýshiniń masań kúıde bolǵany týraly polısııaǵa shuǵyl habarlaǵan jolaýshylardyń qyraǵylyǵy atalǵan faktiniń qaıǵyly jaǵdaımen aıaqtalýyn boldyrmaǵan. Sol úshin polkovnık dabyl qaqqan turǵyndarǵa alǵys aıtatynyn jetkizdi.
PETROPAVL
