D.Serikbaev atyndaǵy Shyǵys Qazaqstan memlekettik tehnıkalyq ýnıversıtetinde Abaı Qunanbaıulynyń 175 jyldyǵyna oraı «Abaı ilimi – rýhanııat negizi» taqyrybynda onlaın rejımde dóńgelek ústel ótti. Sharaǵa moderator bolǵan ýnıversıtet rektory Jasulan Shaımardanov: «Abaı – ult rýhanııatynyń bastaýynda turǵan tulǵa. Bizdiń negizgi maqsatymyz – Abaı murasyn búgingi kózqaraspen qarastyryp, onyń ómirsheńdigin jas urpaqqa nasıhattaý. Artynda qalǵan ólmes murasyn kúndelikti ómirde, negizgi ustamǵa aınaldyrýymyz qajet» deı kele oqý ornynda stýdentterdiń sanasyn jańǵyrtýǵa baǵyttalǵan «Adam bol» akademııalyq jobasy, «21 ǵasyrdaǵy Abaı» kýrsy jobalaryna toqtaldy.
Onlaın kezdesýde alǵash bolyp sóz alǵan ǵalym, akademık Ǵarıfolla Esim: «Búgingi qoǵam Abaı usynǵan jolmen júrýi qajet» dedi. Jáne tehnıkalyq oqý orynda Abaı kýrsynyń oqytylýy úlken jetistik dep joǵary baǵalady. Saıası ǵylymdarynyń doktory, Sh.Ýálıhanov atyndaǵy Tarıh jáne etnologııa ınstıtýtynyń dırektory Saıyn Borbasov «Abaı men Shákárim tulǵasynyń rýhanı kelbeti týraly» taqyrybynda baıandama jasady. «Abaı men Shákárim adamnyń rýhanı kelbetine erekshe nazar aýdarǵan. Olar adamı qasıetter onyń júrek qalaýynan týady dep esepteıdi. Al adamgershilikten aýytqýlar baqaı esep pen kúnshildikten, qýlyq amaldarynan týyndaıdy. Sondyqtan, aqıqat pen ádilet úshin júrek qalaýyn tańdaý paıdaly dep kórsetedi» dep Abaı men Shákárim úndestigine nazar aýdardy. Ádebıet jáne óner ınstıtýtynyń halyqaralyq qatynastar jáne álem ádebıeti kafedrasynyń meńgerýshisi Svetlana Ananeva: «Abaıdy álemdik qoǵamdastyqta jańa Qazaqstannyń brendi retinde tanystyrý kerek. Bul - búgingi urpaqtyń mindeti. Abaı shyǵarmashylyǵy - álemdik ádebıet tarıhyndaǵy erekshe qubylys» dedi. S.Amanjolov atyndaǵy Shyǵys Qazaqstan memlekettik ýnıversıteti Abaıtaný ǵylymı-zertteý ınstıtýtynyń dırektory Aıjan Kartaeva aqynnyń ómir boıy sharq uryp izdegen – «Tolyq adam» ilimi jaıly sóz qozǵady. Shákárim atyndaǵy Semeı memlekettik ýnıversıteti Abaıtaný ınstıtýtynyń dırektory Jandos Áýbákir «Dala danyshpany» taqyrybynda baıandama oqydy. Semeı qalasynyń Abaıdyń ádebı-memorıaldyq murajaıy dırektorynyń ǵylymı jumys jónindegi orynbasary Meıramgúl Qaıranbaeva Abaı murajaıyn tanystyryp, jańasha mýzeılendirý konsepsııasyna toqtaldy.
Fılologııa ǵylymdarynyń kandıdıty Gaýhar Rahymbaeva Memleket basshysynyń Ulttyq qoǵamdyq senim keńesiniń úshinshi otyrysyndaǵy «Til úıretý barysynda, negizinen, oqý oryndaryndaǵy jastarǵa kóbirek mán beredi. Sondyqtan Til komıtetin 2021 jyldan bastap Bilim jáne ǵylym mınıstrliginiń qaramaǵyna ótkizgen jón. Bul qazaq tilin oqytý ádistemesin ázirleý jáne ony úıretý isine qatysty áleýetimizdi bir ortalyqqa shoǵyrlandyrýǵa múmkindik beredi. Sondaı-aq, mundaı qadam qoldanysqa engiziletin oqý baǵdarlamalarynyń tıimdiligin taldaý jáne monıtorıng júrgizý júıesin jasaýǵa septigin tıgizedi" degen sózin negizge ala otyryp Abaı ilimin eıdos-konspekt arqyly ózge ult ókilderine oqytýdyń tıimdiligi týraly baıandama jasady.
О́SKEMEN
