Kezdesýdi ujymnyń meńgerýshisi, saıası ǵylymynyń doktory, professor Gúlmıra Sultanbaeva ashyp, kafedra túlekterin quttyqtady. QazUÝ rektory akademık Ǵalymqaıyr Mutanov arnaıy beıne quttyqtaý joldady. Fakýltet dekany Saǵatbek Medeýbek túlekterge jyly lebizin bildirdi. Ál-Farabıdiń «Adamdar tek birlese, bir-birine kómektesý arqyly ǵana baqytqa jete alady», - degen naqyl sózinde qanshama tereń oı, parasatty ıdeıa bar. Rektor túlekterdi ǵulamanyń osy ıdeıasy aıasynda bir-birin qoldaı otyryp, ýnıversıtet pen qoǵam damýyna úles qosýǵa shaqyrdy.
Máselen, túlekterdiń qoldaýymen kafedra bazasynda sońǵy oqý jyldarynda ashylǵan «Qazaqstan», «Egemen Qazaqstan», J.Kenjalın atyndaǵy Baspasóz jáne jańa medıa oqý-shyǵarmashylyq zerthanalar seriktes jumys berýshi uıymdardyń qoldaýymen oqý tehnıkalyq múmkindikterdiń alańyna aınaldy.
Kezdesý barysynda Qazaqstan Respýblıkasy Konstıtýsııalyq Keńesiniń tóraǵasy, QazUÝ Túlekter qaýymdastyǵynyń prezıdenti, zań ǵylymdarynyń doktory, professor Qaırat Mámıdiń «Tálimgerlik: árkim ıe bola alatyn múmkindikter» jobasy tanystyryldy.
Kafedranyń osy oraıda oqý-tehnıkalyq bazasyn jańalaýdan bastap oqý úrdisine, bilim berý baǵdarlamalary, medıa naryqqa beıimdeýge deıingi túlektermen oryndalǵan aýqymdy jobalary ataldy. «Egemen Qazaqstan» gazetiniń Almatydaǵy tilshiler qosyny, «Qazaqstan» ulttyq arnasynyń Almaty redaksııasy men «Qazaq gazetteri» JShS bazasynda Baspasóz jáne elektrondy BAQ kafedrasynyń fılıaldary ashylýy oqý úrdisiniń medıa óndiriske beıimdelýine jol ashty.
Kafedranyń ár jyldardaǵy bitirýshi túleginiń QazUÝ stýdentine tálimger bolý bastamasyn qoldaǵan Joǵarǵy Sot tóraǵasynyń keńesshisi Nurlan Qalqa: «Qaırat Ábdirazaquly usynǵan jobasyn maǵan oı salyp otyr. Biz bul baǵyttaǵy seriktestiktiń úsh naqty qadamyn aıtsaq. Birinshisi, bıylǵy jyly tálimger bolý bastamasyna quqyqtyq jýrnalıstıka salasyna maman daıarlaýǵa úles qosamyz. Ekinshi bastamamyz, baspasóz qyzmeti mamandaryn sot salasynda daıarlaý qajet. Stýdentterdiń sottardyń baspasóz qyzmetterinde tájirıbeden ótýine kómek berý isin jolǵa qoısaq. Joǵary kýrs stýdentteriniń aýdandyq, oblystyq sottarda tájrıbeden ótýin uıymdastyramyz. Úshinshisi, quqyqtyq salaǵa ıkemi bar stýdentterge arnap, onlaın sheberlik synyptaryn turaqty uıymdastyramyz»,- dep birqatar usynysty atap ótti. Jýrnalıstıkada mamandaný máselesine de toqtaldy. Sport ne quqyq salasyn alsaq. Máselen, sot salasyn tereńdetin jazǵan, bárimizge jaqsy tanys ádildikti, ádilettilikti jýrnalıstıkanyń basty qaǵıdasyna aınaldyrǵan, zań kúshine muqtaj jandarǵa keńes bergen Nurı Mýftahtyń sheberligin aıtýǵa bolady. Aleksandr Tasbolat – zańnyń búge-shúgesine deıin zerttep, bir salaǵa mamandanǵan tanymal jýrnalıst. Zań baptaryn ne termınderin jaı jazyp, qoımaı halyqqa túsindirip, bılik pen qoǵamnyń arasyndaǵy quqyqtyń dáneker boldy.
Kafedra tarapynan Gúlmıra Serikbaıqyzy atalǵan usynystar boıynsha oqý josparynda Jýrnalıstıkanyń quqyqtyq negizderi bazalyq pán retinde oqytylyp otyrǵanyn, salalyq jaǵynan tereńdetip oqytatyn baǵdarlama ázirlenetinin atap ótti. Joǵarǵy sottyń baspasóz qyzmetimen talqylanǵan «Quqyqtyń jýrnalıstıka anyqtamalyǵyn» baspaǵa jiberý qajettigi aıtyldy. Jýrnalısterge kúndelikti zań, quqyq, etıka salasynda kezdesetin termınder men prosesterdi BAQ materıaldarynda qoldanýǵa arnalǵan ádistemelik qural qajet. Quqyqtyq medıa salasyndaǵy úkimettik jáne úkimettik emes uıymdardyń usynysy negizinde fakýltette stýdenttik medıa klınıkasy ashylsa, salalyq mamandar daıarlaýǵa yqpaly artar edi deıdi qatysýshylar.
Fakýltettiń 5 jyldyqtan bastap 45 jyldyq túlekterine deıin birneshe býyn ókilderi qatysqan sharada dástúrli medıadan bastap sıfrlyq medıa naryqtyń talaptaryna saı mamandar daıarlaýǵa túlekterdiń úlesi qaraldy. Atap aıtqanda, tanymal jýrnalıst, qoǵam qaıratkeri 45 jyldyq túlekter atynan Saýytbek Abdrahmanov, top medıa menedjer Armanjan Baıtasovtyń beıne tilekterimen qatar, sharaǵa 15 jyldyq túlekter, esimi elge tanys jýrnalıster Rınat Kertaev, Gúlnaz Álimgereı, Meıirjan Áýelbekuly, Mıras Muqash, PhD doktorlar Jumaǵalı Esenbek pen Alma Saılaýqyzy qatysyp, arnaıy shákirtaqy taǵaıyndady. «Kazakh TV» arnasy aqparattyq baǵdarlamalar bóliminiń shyǵarýshy redaktory Mánshúk Shymyrbaı, jýrnalıst, Jetisý ýnıversıtetiniń oqytýshysy Nazym Dýtbaeva, «Qazaq radıosynyń» júrgizýshisi Gúlbaǵysh Bostan sharanyń spıkerleri retinde kafedra stýdentteriniń tálimgeri atanyp, jýrnalıstik daǵdylaryn damytý isine úles qospaq.
«Habar» AQ» 25 jyldyǵy, «Qazaq radıolary» JShS 100 jyldyǵy, «QazAqparat» Halyqaralyq aqparattyq agenttigi» Aksıonerlik qoǵamy 100 jyldyǵy qarsańynda kafedra men jumys berýshi seriktes uıymdar arasyndaǵy sharalardyń josparlary talqylanýda.
