Bul Ilon Masktyń SpaceX kompanııasyn ǵarysh salasyndaǵy alǵashqy kommersııalyq kompanııaǵa aınaldyryp otyr. NASA astronavttary Daglas Herlı men Robert Benken tizgindegen Crew Dragon kemesi Florıda shtatyndaǵy Kanaveral mysynan Halyqaralyq ǵarysh stansasyna attandy. 9 mınýttan keıin Falcon-9 raketasynyń alǵashqy bóligi Atlant muhıtyndaǵy júzbeli platformaǵa qondy. Negizgi jospar boıynsha, Crew Dragon ekıpajy Halyqaralyq ǵarysh stansasyna 19 saǵattan keıin jetedi.
Ǵarysh kemesi 27 mamyrda attanýy kerek bolatyn. Degenmen aýa raıynyń qolaısyzdyǵynan josparlanǵan ýaqyttan 15 mınýt buryn sapar keıinge shegerildi. NASA-nyń aldyn ala bergen málimetine sáıkes, bul sapardyń negizgi mıssııasy – orbıtada ǵarysh kemesiniń júıesin synaý. Daglas Herlı men Robert Benken stansada shamamen 110 kúnge jýyq ýaqyt ótkizbek. Jerge oralý ýaqyty naqty belgilenbegen. Mıssııa aıaqtalǵannan keıin Crew Dragon avtomatty túrde eki astronavtpen Florıda jaǵalaýyna qaıtyp keledi.
Aıtyp ótkenimizdeı, bul – kompanııanyń alǵashqy tájirıbesi. Buǵan deıin 2019 jyly naýryzda pılotsyz keme attanǵan bolatyn. Sonymen birge SpaceX kompanııasyn atalǵan saladaǵy alǵashqy kommersııalyq uıym retinde tanytyp otyr. AQSh halqyn 9 jyldan keıin ǵaryshqa adamnyń attanýy emes, bul salaǵa jeke kompanııanyń aralasýy mazalaıtyn sııaqty. Saıasatkerler men sarapshylar ǵaryshtyń da kommersııalanǵanyn aıtyp, adamzat tarıhyndaǵy úlken ózgeris ekenin jarysa habarlaýda. Ǵarysh kemesiniń attanýyn AQSh prezıdenti Donald Tramp ta tikeleı efırde tamashalady degen habar bar.
Kompanııanyń jospary iske assa, eki aıdan keıin SpaceX bazasynda jumystar jandanbaq. Iаǵnı Ilon Mask kemelerdi júıeli túrde jiberip otyrýdy josparlap otyr. Bıylǵy tamyzǵa 4 astronavtty attandyrý josparlanǵan. Olardyń úsheýi AQSh azamaty bolsa, bireýi – japondyq. Kompanııa ıesi Ilon Mask atalǵan jańalyǵymen maqtanatynyn jasyrmady.
