iKOMEK ortalyǵy óz ujymyna elordanyń damýyna beı-jaı qaramaıtyn jaýapty qyzmetkerlerdi izdeıdi.
«Operatordyń mindetterine elorda tynys-tirshiliginiń máseleleri boıynsha qala turǵyndarynan kelip túsetin ótinishterdi qabyldaý, konsýltasııa berý, aqparattyq júıege tirkeý kiredi», – delingen iKOMEK PR qyzmetiniń habarlamasynda.
iKOMEK-te aıtylǵandaı, operator jumysy tolyqtaı sıfrlandyrylǵan jáne basshylyq onlaın rejımde operatorlardyń ónimdiligin qadaǵalaı alady. Osylaısha, qala turǵyndaryna qyzmet kórsetýdiń joǵary sapasy qamtamasyz etiledi. Orta eseppen operatorlar saǵatyna 30-ǵa jýyq ótinish qabyldaıdy.
«Koronavırýs ınfeksııasynyń pandemııasy álemdi aıtarlyqtaı ózgertti. Búginde álemniń Facebook, Amazon, Alibaba, Microsoft jáne t.b. iri kompanııalary qashyqtan jumys isteýge kóshti. Bizde qyzmetkerlerdi qashyqtan jumysqa tartý arqyly turǵyndarǵa sapaly qyzmet kórsetý múmkindigi bar. Memleket basshysy Qasym-Jomart Toqaevtyń jumyssyzdardy belsendi túrde jumysqa ornalastyrý týraly tapsyrmasy aıasynda biz iKOMEK109 biryńǵaı baılanys ortalyǵyna operatorlar qabyldaıtynymyzdy jarııaladyq», – deıdi iKOMEK qalalyq ortalyǵynyń basshysy Jannat Dúbirova.
iKOMEK kadrlyq qyzmetiniń mamandary atap ótkendeı, biryńǵaı baılanys ortalyǵy 24/7 rejıminde jumys jasaıdy. Operatorlar úshin «ıkemdi jumys kestesi» bekitilgen. Osylaısha, úmitkerler úshin barynsha yńǵaıly jumys kestesin qarastyrý múmkindigi bar.
«Úmitkerlerdiń tehnıkalyq jabdyqtalý deńgeıin erekshe atap ótkim keledi. Ol: turaqty ınternet, derbes kompıýter nemese noýtbýk, mıkrofony bar garnıtýra jáne jumys kezinde tynyshtyqty qamtamasyz etý», – dedi Jannat Dúbirova.
Tolyǵyraq aqparat alý úshin kelesi baılanys derekteri boıynsha júginýge bolady: +7 7172 917 222; m.tanzharyk@ikomekastana.kz.
