Parlament • 01 Maýsym, 2020

Senatorlar áskerı jaǵdaı máselelerine qatysty zań jobasyn talqylady

20 ret kórsetildi

Senattyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine soǵys jaǵdaıy máseleleri boıynsha ózgerister men tolyqtyrýlar engizý týraly» zań jobasy qaraldy. Bul týraly Senattyń baspasóz qyzmeti habarlady.

Otyrysta negizgi baıandamany Qazaqstan Respýblıkasy Qorǵanys mınıstriniń birinshi orynbasary – Qarýly Kúshter Bas shtabynyń bastyǵy Murat Bektanov, al qosymsha baıandamany Senat depýtaty, komıtet múshesi Nurjan Nursıpatov jasady.

Zań jobasynyń negizgi maqsaty – soǵys jaǵdaıynda memleket fýnksııalarynyń tetikterin boljaldy áskerı qaýip-qaterlerdi jáne jańa zamanǵy áskerı qaqtyǵystar formasy men tásilderiniń ózgerýin esepke ala otyryp jetildirý.

Senator N. Nursıpatovtyń sózinshe «Zań jobasynyń basty jańalyǵy óńirlerde qorǵanys keńesterin qurý bolyp sanalady, bul, óz kezeginde, jergilikti atqarýshy organdardyń jaýapkershiligin arttyrady. Sonymen qatar, joǵary oqý oryndarynda aqyly negizde zapastaǵy serjanttardy daıarlaý kózdelgen, bul jumyldyrý rezervin nyǵaıtý qajettiliginen týyndap otyr».

Zań jobasy Eńbek kodeksine, «Jumyldyrý daıyndyǵy men jumyldyrý týraly», «Memlekettik qupııa týraly», «Soǵys jaǵdaıy týraly», «Qazaqstan Respýblıkasynyń Qorǵanysy jáne Qarýly Kúshteri týraly», «Bilim týraly» jáne «Áskerı qyzmet jáne áskerı qyzmetshilerdiń mártebesi týraly» zańdarǵa túzetý engizýdi  kózdeıdi.

Qujat Palata qaraýyna joldandy.

Sondaı-aq, keńeıtilgen otyrysta senatorlar el Qarýly Kúshteriniń odan ári damý máselesin jan-jaqty talqylady. Onyń barysynda áskerı bilim júıesin jáne áskerı ǵylymdy, kadr daıarlaýdy jetildirý, áskerı tártip pen quqyqtyq tártip jaǵdaıy, áskerı qyzmetshilerdi áleýmettik qamtamasyz etý jáne Qarýly Kúshterdiń bitimgerlik qyzmeti týraly máseleler kóterildi.

Sońǵy jańalyqtar

Jetinshi maýsymnyń jetistigi

Rýhanııat • Keshe

Uqsas jańalyqtar