1 maýsym - Halyqaralyq balalardy qorǵaý kúnine oraı uıymdastyrylǵan onlaın-kórmege qoryq-mýzeı qorynda saqtalǵan jas qylqalam sheberleriniń jáne 2018 jyly ótken «Astana jáne Túrkistan» jas sýretshiler baıqaýy jeńimpazdarynyń kartınalary, qasıetti qalaǵa degen súıispenshiligin qylqalammen sýrettegen daryndy jastardyń kórkem týyndylary qoıyldy.
Qoja Ahmet Iаsaýı kesenesin túrli-tústi boıaýlarmen keskindep, týǵan jerge degen ystyq yqylasyn bildirgen jas sýretshiniń biri Jamalladın Esirkep óz týyndysy týraly aıtyp berdi.
«Qoja Ahmet Iаsaýı kesenesiniń aldynda turǵan qazaqtyń handary men bılerin, ıgi jaqsylaryn sýrettep shyqtym. Adam beınesin jasaý aýyr ári úlken jaýapkershilik. Meniń armanym sýretshi bolý. Sondyqtan óz týǵan jerimdegi barsha qazaqtyń tulǵalary elimizge aq batalaryn berip turǵan sátin sezingim keldi. Kúni-túni osy kórinisti armandap, sýrettep shyqtym», - dedi Jamalladın.
Sonymen qatar Túrkistandyq jas daryndar sýret salýdan sheberlik sabaqtaryn júrgizip, elimizdiń túkpir-túkpirindegi dostaryna onlaında kartınalary týraly aıtyp berdi.
Mereke kúni balalaryn demalys aımaǵynda serýendetip júrgen ata-analar men qala qonaqtary da kórmege qoıylǵan 50-ge jýyq týyndyny tamashalady.
Aıta keteıik, «Áziret Sultan» memlekettik tarıhı-mádenı qoryq-mýzeıi jyl saıyn dástúrli túrde balalarǵa arnalǵan merekeni nazardan tys qaldyrmaı, tıisinshe túrli is-sharalarmen atap ótip keledi. Mýzeı isine, tarıhı oryndarǵa balalardyń qyzyǵýshylyǵyn arttyra otyryp tanymyn keńeıtý, shyǵarmashylyq qabiletterin damytý baǵytynda sýretshiler saıysy, balalar kórmesi, balabaqsha jáne mektep oqýshylaryna arnalǵan ekskýrsııalar uıymdastyrylyp, ártúrli táttiler men ár alýan boıaýly kitaptar syılyq retinde taratylatyn.
Bıylǵy jyly elimizdegi pandemııaǵa baılanysty jarııalanǵan saqtyq sharalaryna sáıkes kóptegen balalar is-sharaǵa arnaıy kele almasa da onlaında baılanysqa shyqty.
