О́z sózinde Senat Tóraǵasy Ulttyq qoǵamdyq senim keńesiniń úshinshi otyrysynda Prezıdenttiń densaýlyq saqtaý máselelerine erekshe nazar aýdarǵanyn atap
ótti.
«Memleket basshysy medısınalyq ınfraqurylymdy damytý, sanıtarlyq-epıdemııalyq qyzmetti kúsheıtý, dárigerlerdiń jalaqysyn arttyrý jóninde naqty mindetter qoıyp otyr. Prezıdentimizdiń tapsyrmasyn oryndaý aıasynda, kodeks qabyldanǵannan keıin otandyq medısınadaǵy máselelerdi oń sheshýge óz úlesin qosatyn bolady», dedi Máýlen Áshimbaev.
Sondaı-aq Tóraǵa indetpen kúreste eren eńbegimen kózge túsip, jankeshtilik tanytqan elimizdegi barsha medısına qyzmetkerlerine alǵysyn bildirdi.
Kodeks jobasyn ázirleýshilerdiń aıtýynsha, qujatta qoǵam densaýlyǵyn qorǵaýdy kúsheıtýge, ulttyń densaýlyǵyn nyǵaıtýǵa, memleket pen jumys berýshilerdiń jáne azamattardyń ortaq jaýapkershiligin kúsheıtýge, sıfrly densaýlyq saqtaý salasyn damytýǵa, medısına qyzmetkerleriniń mártebesin kóterýge arnalǵan normalar bar. Soǵan baılanysty ilespe túzetýlermen birqatar zańnamalyq aktilerge ózgerister engiziledi.
Jobanyń qabyldanýy medısınalyq qyzmetterdiń qoljetimdiligi men sapasyn qamtamasyz etýge, densaýlyq saqtaý salasyndaǵy qatynastardy tıimdi retteýge yqpal etedi.
Sonymen qatar jańadan engiziletin erejeler zańnamalyq qaıshylyqtardy azaıtýǵa jáne densaýlyq saqtaýdyń deńgeıin Ekonomıkalyq yntymaqtastyq jáne damý uıymy elderiniń standarttaryna jaqyndatýǵa múmkindik beredi.
Budan basqa, kodeks jobasynda medısınany damytýdyń ózekti máselelerin sheshýdi jáne halyqtyń densaýlyǵyn qorǵaý júıesin jaqsartý boıynsha tıimdi sharalardy kózdeıtin túzetýler qamtylyp otyr.
Otyrysqa Senat depýtattary, Densaýlyq saqtaý mınıstri Eljan Birtanov, sondaı-aq sarapshy mamandar men qoǵamnyń belsendi ókilderi qatysty.
