Ǵylym salasynda qarjylandyrýdy 2025 jyly ishki jalpy ónimniń 1 paıyzyna deıin jetkizý – otandyq ǵylymnyń jańa satyǵa shyǵýyna, básekege qabiletti ǵylymı tujyrymdar jasap, álemdik deńgeıde jańalyqtar ashyp, rýhanı muramyzdy nyǵaıtyp, eldiń ekonomıkasyn kóterýge múmkindik bereri sózsiz.
Biz ǵylym salasyn jetkiliksiz qarjylandyrýdyń saldarynan, ǵylymǵa keletin, júıeli túrde zertteý jumystarymen aınalysatyn jas mamandardyń sanyn azaıtyp, ıaǵnı urpaqtar sabaqtastyǵynyń arasyn biraz ajyratyp alǵanymyz belgili. Qıyn kezeńderde ǵylymǵa beıim jastar jalaqynyń azdyǵy men áleýmettik turǵyda jetkilikti qamtamasyz etilmegendikten, basqa salaǵa aýysýǵa májbúr boldy. Qazir jaǵdaı basqasha, sońǵy jyldary memleket tarapynan, ǵylymǵa erekshe den qoıylyp, onyń júıeli túrde damýyna aıryqsha mán berilip otyr. Ony keshegi Ulttyq keńestiń mazmunynan kórip otyrmyz.
Búginde ǵylym salasy álemde ǵaryshtyq jyldamdyqpen damýda. Sol sebepti jyl saıyn 100 ǵalym men doktorantýrany aıaqtaǵan zertteýshilerge dúnıe júziniń jetekshi zertteý ortalyqtarynan taǵylymdamadan ótip, tájirıbe almasyp, ony ózimizde qoldanyp, jańalyq ashyp, el ıgiligine paıdalanýǵa jaǵdaı jasalmaq.
Ǵylymı izdenister ýaqyt pen qajyr-qaıratty talap etedi. Ǵalymdar naqty nátıjelerge qol jetkizý úshin, basqa máselelerge alańdamaý qajet. Prezıdentimizdiń doktoranttar stıpendııasyn 150 myń teńgege deıin ulǵaıtý jáne jas ǵalymdarǵa arnalǵan granttyq qarjylandyrýdy jalǵastyrý boıynsha tapsyrmasy myńdaǵan mamannyń áleýmettik jaǵdaıǵa jaltaqtamaı, ǵylymı izdenistermen basybaıly aınalysýyna negiz bolady.
Sondaı-aq Memleket basshysy Q.Toqaevtyń otandyq ǵylym salasyn damytýda, irgeli izdenistermen aınalysatyn ǵylymı-zertteý ınstıtýttaryn qoldaý, zerthanalardy zamanaýı quraldarmen jabdyqtaý, ǵylymdy qarjylandyrýda ulttyq ǵylymı-tehnıkalyq maqsattarǵa basymdyq berip, bar kúshti medısınalyq-bıologııalyq zertteýlerge, aýyl sharýashylyǵy ǵylymyna, «jasyl» tehnologııalarǵa, jasandy sana men qýat kózderin únemdeý sııaqty salalarǵa basymdyq berip, qarjylandyrýdy 2025 jylǵa deıin 7 esege ósirýdi tapsyrýy ǵalymdardyń bolashaqqa zor senimmen qarap, otandyq ǵylymnyń damýyna úlken serpilis berýge yqpal etedi.
Nurlan SEIDIN,
«Ǵylym ordasy» bas dırektorynyń ǵylym jónindegi orynbasary,
tarıh ǵylymdarynyń kandıdaty
ALMATY
