AQTО́BELIK JASTARDYŃ BAǴALY BASTAMASY

“Nur Otan” HDP oblystyq fılıaly “Jas Otan” jastar qanatynyń músheleri men qaladaǵy jo­ǵary oqý oryndarynyń stýdent-jastary “Aýyl­dyń gúldenýi – Qazaqstannyń gúldenýi” atty aksııa ótkizýge bastama kóterdi. Baǵaly bastamany oblys jastary biraýyzdan qoldady. Munyń ózi Elbasy Nursultan Nazarbaevtyń “Jańa onjyldyq – jańa ekonomıkalyq órleý – Qazaqstannyń jańa múm­kin­dikteri” atty bıylǵy Joldaýynda “Jastar – bizdiń bolashaǵymyzdyń negizi”, – dep atap ótkenindeı, ús­timizdegi jylǵy 26 sáýirden 30 tamyzǵa deıin ótetin ak­sııa barysynda jastar qalany ǵana emes, aýyl­dar­dy abattandyrady, kógaldandyrady, kórikten­dire­di, ózen ańǵarlaryn, kól jaǵalaýlaryn, jol boılaryn qoqystardan, turmystyq qaldyqtardan tazartady. Bul jumystarǵa orta mektepterdiń 8-11 synyp jáne kolledjder men lıseılerdiń 45 myń oqýshysy, stýdentterdiń qurylys jáne “Jasyl el” otrıadtarynyń 5 myń jasaǵy, qala kásiporyndary men aýdan ortalyqtaryndaǵy 20 myń jumysshy jastar tartylady. Stýdentterdiń qurylys jasaqtary mádenı-áleýmettik nysandardy kúrdeli jáne aǵymdaǵy jóndeýmen aınalysady. Bul aksııanyń basty maqsaty – oblys jas­tarynyń óz eline paıdaly ister atqarýyn, salamatty ómir saltyn, olardyń boılarynda otan-súıgishtik qasıetter qalyptastyrý, eńbekke tárbıeleý. Aksııany ótkizý jónindegi oblystyq, qalalyq jáne on eki aýdandyq shtab qurylyp, jumys isteýde. Sondaı-aq, olardyń jumysyn jergilikti jerde úılestirip otyratyn 148 komandalyq pýnkt jáne 300-den astam otrıad, 1800 oqýshy toby quryldy. Olar atqarylatyn jumys kólemin, oryndalý mer­zi­min anyqtady, otrıadtardyń tizimin jasady. Ak­sııa­ǵa qatysýshylar oblys boıynsha jalpy aýmaǵy 379,9 gek­tar gúlzarlar men saıabaqtardy kóriktendiredi, 781,1 gektar ózen ańǵarlaryn, 775,7 shaqyrym jol boıyn qoqystan tazartady, 200 myń túp kóshet otyr­ǵyzady, 10 940,5 tonna turmystyq qatty qaldyq­tardy tasyp shyǵarady dep kútilýde. Osy kezeńde 200-den astam sport alańy men stadıon jóndelip, jańadan salynady. Jaz boıy 381 eldi meken, 2314 kóshe abattandyrylady. Bul jumystarǵa qazirdiń ózinde oblystyq bıýdjetten 500 mln. teńge qarjy bólingen. Bul qarjy kólemi alda kóbeıe túspek. Oblystyq, qalalyq jáne aýdandyq shtabtar jumys jasaıtyn nysandar men kógaldan­dy­rylatyn oryndardy, tazartylatyn aýmaqtardy anyqtaý úderisteri aıaqtalyp keledi. Jastardyń birden jumysqa kirisip ketýi úshin qazirden bastap qam jasalýda. Olar bir úlgidegi jumys kıimimen, tamaqpen qamtamasyz etiledi, atqarǵan jumys kólemine qaraı eńbekaqy alady. Qazirdiń ózinde “TransMostGrýpp”,“Stroıdetal” jaýapkershiligi shekteýli seriktestikteri, “Kompanııa-Emshan” zańdy tulǵalar birlestigi sııaqty irgeli kásiporyndar stýdent-jastarmen kezdesip, olardy ózderinde jumys isteýge qabyldaýǵa ázirligin baıqatty. Sondaı-aq, aksııa kezinde belsendi jumys istegen jastardy marapattaý úshin oblys ákimdigi 50 avto­kólik, 1000 noýtbýk bólip otyr. Bul jastardy ekpin­di eńbek etýge yntalandyrady. Baǵaly bastamany júzege asyrý barysynda jastar óz jerine degen súıispenshilikke tárbıelenip, oǵan qurmetpen qaraý­ǵa úırenedi, ózgelerge óz isterimen ónege bolady. Bul bastamany elimizde alǵash ret Aqtóbe oblysynyń jastary qolǵa alyp otyr. Al aqtóbelik jastardyń baǵaly bastamasy elimizdiń túkpir-túkpirinde qoldaý tabatynyna senim mol. Satybaldy SÁÝIRBAI. Aqtóbe oblysy.