Qazaqstan • 03 Maýsym, 2020

Týrızmniń turalaǵan tustary kóp

14 ret kórsetildi

COVID-19 pandemııasy saldarynan týrızm salasy taqyr taıanyp tur. Álemdik týrızmge tıgen aýyr soqqynyń salqyny bizge de áser etti. Bul jolǵy daǵdarys saldarynan týrkompanııalardyń qyzmeti 50-80%-ǵa qysqarǵan. Tótenshe jaǵdaı kezinde quny 2,7 mlrd teńgeden asatyn 5,5 myń adamnyń joldamasy qaıtaryldy. Týyndaǵan negizgi máseleniń biri - avıabıletterdiń aıyppulsyz qaıtarylýyna qatysty. Bul máselege azamattyq avıasııa salasynyń ýákiletti organdary aralasyp, bıletter aıyppulsyz tolyq kólemde qaıtarylatyn boldy.

Taıaýda qazaqstandyq baspasóz klýbynyń onlaın-konferensııasy ótip, jıynda atalǵan saladaǵy túıitkildi máselelermen qatar, onyń sheshý joldary, baǵa turaqtylyǵy jáne memleket pen týrızm sektorynyń baılanysy jaıynda áńgime órbigen edi. Ashyq alańda Qazaqstan týrıstik qaýymdastyǵynyń basshysy Rashıda Shaıkenova birqatar máseleniń basyn qaıyrdy. Onyń aıtýynsha, koronavırýs pandemııasy saldarynan shekteý sharalary engizilgennen keıin týrızm salasynyń shyǵyndary 100% -ǵa jetti. Týrızmdegi turaqsyzdyq tótenshe jaǵdaı týyndaǵanǵa deıin byltyrǵy jyldyń jeltoqsan aıynda bastalǵan. Bul kezde Ýhanda epıdemııa endi beleń ala bastaǵan bolatyn. Qaýymdastyq basshysy el aýmaǵyna kirý, shetelge shyǵý, ishki týrızm salalary aıtarlyqtaı qıyndyqty bastan ótkergenin, shekteýden soń kompanııalardyń barlyǵy derlik qaıtadan jumysyn jandandyra almaıtynyn aıtady.

Buǵan deıin Prezıdent janyndaǵy Ortalyq kommýnıkasııalar qyzmeti alańynda ótken jıynda Mádenıet jáne sport mınıstrligi týrızm ındýstrııasy komıtetiniń tóraǵasy Dastan Ryspekov bas sanıtarlyq dárigerdiń №37 qaýlysyna sáıkes eńbek ujymynda epıdemııaǵa qarsy rejimniń algorıtmderin saqtaı otyryp, týroperatorlar men týragenttikterdiń qyzmetine ruqsat berilgenin habarlaǵan edi. Sonymen qatar, 1 maýsymnan bastap shıpajaılyq-kýrorttyq mekemeler, demalys úıleri jáne týrıstik bazalar sııaqty týrıstik qyzmettiń basqa da obektileriniń jumys algorıtmi bekitildi. Bul rette basseın, jaǵajaı jáne oıyn-saýyq aımaqtarynyń jumysyna qoıylatyn talaptar da kúsheıtiledi. Naqty talaptar bekitilgenimen áli de bolsa, birizge túspegen máseleler bar. R. Shaıkenovanyń aıtýynsha, qazaqstandyqtar kýrort pen sanatorıge barǵan kezde sanıtarlyq dárigerler koronavırýsty anyqtaıtyn PTR-testtiń (polımerazdy tizbektik reaksııa) anyqtamasy bolýyn talap etedi. Bul anyqtama jeti kúnge jaramdy. 

̶  Kópshilik bir aptadan astam ýaqytqa demalýǵa barady. Baryp-qaıtý ýaqytyn da esepteý kerek. Demalýshylar testi qaı jerde tapsyrady? Demalatyn aımaqta ótetin bolsa, bul jerdegi daıyndyq máselesi qalaı bolmaq? Eger demalýshylar ózderi test tapsyratyn bolǵan jaǵdaıda, bir adam úshin test quny - 15 500  teńgeni quraıdy. Bútin bir otbasyna bul aıtarlyqtaı salmaq salmaıdy ma?, ̶ deıdi Qaýymdastyq basshysy. Onyń aıtýynsha, shetelde damalatyndardyń aǵyny aıtarlyqtaı kóp bola qoımaıdy. Buǵan álemde oryn alǵan ekonomıkalyq daǵdarys keri áser etip otyr. Sondyqtan ishki týrızmdi damytýǵa aıtarlyqtaı múmkindik bar, áleýet te jetkilikti.

Eldegi týrızm salasyndaǵy sarapshylar salanyń qalpyna kelýi úshin 1 jyldan astam ýaqyt kerek ekenin aıtady. Eger jazǵy maýsymda demalys oryndary tolyqtaı jumys istep, kelýshilerdiń qarasy 50%-dan asatyn bolsa, jalpy ishki týrızmniń qalypqa kelýi 30% tóńireginde bolmaq.

 

Sońǵy jańalyqtar

Atyraýda ury úsh jyldan keıin ustaldy

Aımaqtar • Búgin, 16:06

Almaty qalasynda jer silkindi

Ekologııa • Búgin, 11:00

Sora ekken turǵyn tergelýde

Aımaqtar • Keshe

Uqsas jańalyqtar