Polısııa ókili sıntetıkalyq esirtkige qatysty quqyqtyq sharalar engizý olardyń aınalymyna der kezinde tosqaýyl qoıýǵa múmkindik bergenin málimdedi. 2019 jyly osyndaı 408 qylmys anyqtalyp, 11 keli sıntetıkalyq psıhotroptyq zattar tárkilendi. Buǵan deıin jyl saıyn 1 keliden aspaıtyn esirtki tárkilendi, 3 esirtki zerthanasy anyqtaldy. Osy jyldyń 5 aıynda IIM qyzmetkerleri sıntetıkalyq esirtki ótkizý jáne daıyndaý boıynsha 261 qylmystyń jolyn kesti, 27 keli tyıym salynǵan zattardy tárkiledi.
Tártip saqshylary Aqtaý qalasyna sıntetıkalyq esirtkini jetkizýdi jáne ótkizýdi uıymdastyrǵysy kelgen topty quryqtady. Osyndaı qylmysy úshin Jambyl oblysynyń 3 turǵyny ustaldy. Aǵymdaǵy jyldyń sáýir aıynyń sońynda Stepnogorsk qalasynda UQK qyzmetkerlerimen birge jasyryn esirtki zerthanasy joıyldy. 3 azamat ustaldy, olardan 4,5 keli daıyn sıntetıkalyq esirtki zaty tárkilendi. Mamyr aıynda Nur-Sultan jáne Almaty qalalarynda eki esirtki zerthanasy joıyldy.
Esirtki qylmysyna qarsy is-qımyl departamentiniń ókili óz sózinde sıntetıkalyq esirtkiniń 1 grammynan 50 rettik doza jasalatynyn atap ótti. Bylaısha aıtqanda, 1 keli tyıym salynǵan dári-dármek – bul 50 myń ómirdi tunshyqtyrýǵa jetetin esirtki. Sıntetıkanyń taralýyna kommýnıkasııalyq tehnologııalar – shetelde tirkelgen áleýmettik jeliler, messendjerler men jasyryn tólem júıeleri yqpalyn tıgizýde.
Berikhan Nurǵalıev sondaı-aq bizdiń elimizde esirtkiniń qaıdan alynatyny týraly jýrnalıstiń suraǵyna jaýap berip, psıhobelsendi zattardyń aınalymyna baqylaýdy kúsheıtý týraly aıtty. Qazir baqylaýdaǵy tizimderge jańa preparattar men formýlalardy engizý tetigi jeńildetildi, bul prosess 1-2 aıda atqarylady.
Spıker brıfıng barysynda elektrondyq, kommýnıkasııalyq júıelerdi paıdalana otyryp, esirtkini ótkizý, olardy daıyndaý, tartý jáne esirtki tutyný úshin qylmystyq jaýapkershilik belgilengenin eske saldy. Bul qylmystarǵa uzaq merzimge bas bostandyǵynan aıyrý jazasy qoldanylady, ıaǵnı aýyr jáne asa aýyr qylmystar sanatyna jatqyzylǵan. Sondaı-aq, esirtkini nasıhattaý jáne jarnamalaǵandarǵa qylmystyq jaýapkershilik engizildi.
