Rýhanııat • 04 Maýsym, 2020

«Ánurandy qosyla shyrqaımyz»

7 ret kórsetildi

Jeńimpaz sportshylar úshin qaı jarystyń da eń júrek terbeter kezi týǵan eliniń Ánuranyn aıtqyzyp, beıtanys elde ózine ǵana tanys ári ystyq áýendi qosyla shyrqap turǵan sáti bolar, bálkim. Degenmen talaıdyń arasynan top jaryp, jalaýymyzdy jelbiretip, qolyn júrek tusyna qoıyp, «al, mine» dep shyrqaı jónelýge daıyn turǵan sátte tehnıkalyq aqaýlardyń sebebimen gımn shatastyrylyp ne múlde ortasynan kesilip, sportshylarymyz jeńistiń eń bir lázzatty sátin sezine almaı qalǵan jaǵdaı kezdesip qalady.

Italııada 2014 jyly voleıbol­dan áıelder arasyndaǵy ótken álem chempıonatynda Qazaqstan men Nıderland quramalary kezdesýiniń aldynda Verona qala­syna jınalǵandar eli­mizdiń eski Ánuranyn tyńdady. 2015 jyly Groznyıda ótken Reseı pre­zı­den­ti­niń kýbogynda Ilıa Ilın rekord jańartyp, marapattaý rásiminde eski Gımn qoıylǵan bola­tyn. Jeńimpaz sportshymyz jańa Gımndi qosýdy talap etip, osylaısha sol jarysta eski de, jańa da mem­le­ket­tik ánurandar tyńdalyp edi.

Ánurannyń shatastyryp qoıylý jaǵ­daılarynan bólek, múlde úzilip qalǵan kezder de bolǵan. Byltyr sý sporty túrlerinen ótken Azııa chempıonatynda (Úndistan) sý doby boıynsha Qazaqstan jastar quramasyndaǵy qyzdardyń oryn­da­ýyn­daǵy Gımn talaıdy súı­sin­dirip, qoǵamda biraz talqy­lanǵan edi.

Sý doby boıynsha Qazaqstan ulttyq quramasynyń múshesi, «Aısha bıbi» komandasynyń oıyn­shy­sy, Úndistanda ótken Azııa chempıonatynda Ánuranymyzdy oryndaǵan qyzdardyń biri – Mádına Rahmanova sol kezdegi tehnıkalyq aqaý ózderin jigerlendire túskenin aıtady. «Jarys bastalar aldynda Qytaıdyń memlekettik gımni oryndalyp, kezek bizge kelgende Ánuranymyz alǵashqy sekýndtarda-aq toqtap qaldy, biraq biz ony sátimen jalǵastyryp ákettik. Komandadaǵy qyzdardyń barlyǵy – patrıottar. Sondyqtan bul jerde tań qalatyn eshteńe joq dep oılaımyn. Gımndi jatqa bilý – árbir azamattyń mindeti. Biz de Qazaqstan azamattary retinde memlekettik Ánurandy jaqsy bilemiz. Gımndi ózimiz oryndap, odan saıyn jigerlene tústik. Bul qytaılyq komandany tize búktirip, jeńiske jetýimizge negizgi sebep bol­ǵandaı», deıdi sportshy.

Mádınanyń aıtýynsha, ár oıyn aldynda bapkerleri el namy­sy qyzdardyń qolynda ekenin, son­dyq­tan baryn salýǵa tyrysý kerek­tigin aıtyp, nusqaý beredi. «Bap­kerler jarysta 100 paıyz ózi­miz­di kórsetýimiz keregin jıi aıtady. Qol­dan keletinniń bárin jarys­ta kórsetińder deıdi. Muny jarystyń bar­lyq kezeńine qatysty dep túsi­ne­miz. Sondyqtan Ánuran shyr­qal­ǵanda da, barymyzdy salyp, týǵan je­rimizge qurmetimizdi kórsetkimiz kel­di», deıdi Madına.

«Sportshynyń gımndi bilýi – bapkerden» ekenin 2009 jyldan 2018 jylǵa deıin bokstan Qazaqstan ult­tyq quramasynyń bas bapkeri bol­ǵan Myrzaǵalı Aıtjannyń pi­ki­­ri dáleldeı túskendeı. Talaı chem­­­­pıondy jattyqtyrǵan maman ár jat­­tyǵýdy Gımnmen bas­taı­­ty­nyn aıtty. «О́zim ulttyq qu­ra­maǵa bapker bolǵan kezde boks­shy­­l­­ardyń jat­tyǵýyn mindetti túrde Ánuran shyrqaýmen bas­ta­ta­tynmyn. 12 aıdyń 9 aıyn oqý-jat­tyǵý jıyndaryn­da ótkize­ti­nimiz málim, sol kezde kúnde ta­ńer­­teń bir sportshy bastap, qal­ǵa­ny qostap Ánuran aıtylady. Qazaqstan baıraǵyn talaı ret kókke kótergen, álem chempıonatynyń úsh dúrkin júldegeri, Olımpııa oıyn­da­rynyń qola medalin eki márte enshilegen Ivan Dychko da, Olımpııa oıyn­darynyń kúmis júldegeri, Azııa chempıony Vasılıı Levıt te jat­ty­ǵýda Gımn aıtyp júrdi. Ár sport­shy­nyń, bapkerdiń Gımndi bilýi kerek degen oıdamyn. Bul da bir udaıy eskere júretin talap. Basqa sport túrlerin bilmeımin, alaıda bul dástúr basqa boksshylar arasynda da jalǵasyn tapqanyn estidim. Ulttyq quramadaǵy sportshylar búginde árbir jattyǵý kúnin memlekettiń Ánuranymen bastaıdy eken», deıdi belgili bapker.

Sońǵy jańalyqtar

Ury alysqa uzamady

Aımaqtar • Keshe

Uqsas jańalyqtar