Jahandyq bási bıik básekelerden álem jáne Azııa birinshiligi, Azııa oıyndary jáne taǵy basqa da halyqaralyq dodalardy aıtpaǵannyń ózinde, elimizdiń sportshylary tórt jylda bir keletin Olımpııa oıyndarynda Ánuranymyz 16 márte shyrqalyp, 54 ret týymyz kókte jelbiredi. Qazaqstan Gımni eń alǵash 1994 jyly Norvegııanyń Lıllehammer qalasynda ótken XIX qysqy Olımpııa oıyndarynda shyrqaldy. Bul elimizdiń táýelsiz el retindegi qatysqan birinshi Olımpıadasy edi. Kókshetaý oblysynyń týmasy Vladımır Smırnov bir ózi Qazaq eliniń Ánuranyn shyrqatyp qana qoımaı, taǵy úsh márte týymyzdy bıikke kóterdi. Aq Olımpıadaǵa jınalǵan 62 memlekettiń ókilderi birinshi ret Qazaqstannyń Ánuranyn tyńdap, kók baıraǵymyzǵa kýá boldy. Keıingi jyldary kók muz, aq qardaǵy oıyndarda týymyz 5 ret qana bıikte jelbiredi. 1998 jyly Naganoda Lıýdmıla Prokasheva men Vladımır Smırnov júldegerler qatarynan kórindi. 2010 jyly Vankýverde Elena Hrýstaleva kúmis, 2014 jyly Sochıde Denıs Ten jáne 2018 jyly Phenchhanda Iýlııa Galysheva tuǵyrdyń úshinshi satysynan kórinip, Kók Tý áýede qalyqtady.
Jazǵy Olımpıadalarda Ánuranymyz shyrqalmaı, Kók Týymyzdyń kóterilmeı qalǵan kezi bolǵan joq. Máselen, 1996 jyly muhıttyń arǵy betinde uıymdastyrylǵan Atlantadaǵy jazǵy Olımpııa oıyndary men keıingi Rıo Olımpıadasyna deıingi aralyqta Ánuranymyz 15 ret álemniń tórt qurlyǵynda áýelegen eken. Atap aıtar bolsaq, AQSh tórinde balýan Iýrıı Melnıchenko, bessaıysshy Aleksandr Parygın men «Balqash jolbarysy» degen laqap atqa ıe bylǵary qolǵap sheberi Vasılıı Jırov, ǵasyrlar toǵysyndaǵy Sıdneı Olımpıadasynda marqum Bekzat Sattarhanov, Ermahan Ibraımov jáne jelaıaq Olga Shıshıgınanyń arqasynda Ánuranymyz jasyl qurlyqta shyrqaldy. 2004 jyly Grekııanyń bas shahary – Afınada ótken Olımpıadada boksshy Baqtııar Artaevtyń qurmetine Qazaqstannyń Ánurany oryndaldy.
2008 jylǵy Beıjińdegi jazǵy Olımpııa oıyndarynda sózin Elbasy Nursultan Nazarbaev pen Jumeken Nájimedenov, ánin vals koroli Shámshi Qaldaıaqov jazǵan Táýelsiz Qazaqstan tarıhyndaǵy ekinshi Ánurannyń Olımpıada tórinde tuńǵysh ret shyrqalýyna Baqyt Sársekbaev sebepker. Tula boıyńdy shymyrlatyp, erekshe qýat beretin Ánuranymyzdyń áýeni shyrqalǵanda Qytaı kóshelerinde qazaq jankúıerleriniń qýanyshynda shek joq edi. Osy dodada aýyr atlet Ilıa Ilın de top jaryp, Qazaqstannyń kók baıraǵyn jelbiretken-di. Alaıda Halyqaralyq Olımpıada komıteti Ilındi dopıng qoldandy dep aıyptap, altyn medalin keri qaıtaryp alǵan boltyn.
2012 jylǵy Londonda alaýy tutanǵan XXX jazǵy Olımpııa oıyndarynda qazaqstandyq sportshylar 7 márte tuǵyrdyń bıik satysynan kóringen-di. Jarystyń alǵashqy kúninde velosportshy Aleksandr Vınokýrov Olımpıada chempıony atanyp, barsha Qazaq jurtyn qýantqany esimizde. Jarys jolyna shyqqan aýyr atletterimiz Zýlfııa Chınshanlo, Maııa Maneza, Svetlana Podobedova jáne Ilıa Ilın el qorjynyna altyn júlde salyp, ánuranymyzdy áýeletken. Biraq taǵy da sol dopıng máselesi kóterilip, HOK Londonda bas júlde alǵan ziltemirshilerimizdiń nátıjelerin joqqa shyǵaryp, eńsemizdi túsirgeni ras. Degenmen kez kelgen jarysta orǵyp ta, qarǵyp ta sekirip júlde alatyn Olga Rypakova bul joly da júrisinen jańylmaı, Londonda Kók Týymyzdy bıikke kóterdi. Al Olımpıadanyń sońǵy kúninde boksshy Serik Sápıev jarys qojaıyny Freddı Evanstan altyn júldeni julyp alyp, Qazaq eliniń abyroıyn Tumandy Albıonda asqaqtatty.
2016 jyly Rıo tórinde ótken Olımpııa oıyndarynda da úsh sportshymyz dara shyqty. Brazılııada elimizdiń kók baıraǵyn eń birinshi júzý sportynyń ókili Dmıtrıı Balandın jelbiretip, Ánuranymyz áýeledi. Onyń izin ala Nıdjat Ragımov júregine qolyn qoıyp, Ánuranymyzdy arenaǵa jınalǵan barsha jurtpen birge shyrqap turyp qýanyshtan kóz jasyn tyıa almady. Odan keıin Ánurandy asqaqtatyp, Kók Týymyzdy dańqty boksshy Danııar Eleýsinov kóterdi. Marapattaý rásiminde Ánurandy tebirene shyrqaǵan Eleýsinovtiń qýanyshy Alash jankúıerleriniń qýanyshyna ulasqan-dy.
Jazǵy Olımpııa oıyndarynda baıraǵymyzdy eki ret jelbiretken oǵlandarymyz da jeterlik. Máselen, boksshylardan Bolat Jumadilov Atlanta (1996) men Sıdneıde (2000), Ádilbek Nııazymbetov London (2012) men Rıo (2016), nysana kózdeýden Sergeı Belıaev (Atlanta) Olımpıadasynda eki ret kúmis júlde, al Ivan Dychko 2012 jáne 2016 jyl qola medal oljalap, eki Olımpıadada týymyzdy kótergen. Al taǵy eki sańlaǵymyz, ıaǵnı boksshy Ermahan Ibraımov (1996, qola) pen velosport ókili Aleksandr Vınokýrov (2000, kúmis) tórtjyldyqtyń basty dodasynda alǵash týymyzdy bıikte kóterdi. Tórt jyldan keıin E.Ibraımov Sıdneıde, 12 jyldan soń Vınokýrov Londonda Ánuranymyzdy Olımpıada arenasynda shyrqatqan-dy. Budan bólek, taǵy 37 sportshymyz Qazaqstannyń Kók Týyn Olımpıadada jelbiretkenin aıta keteıik.
Árıne Qazaq eliniń oǵlandary kelesi jyly Japon elinde ótetin jazǵy Olımpııa oıyndarynda da Kók Týymyzdy bıikte samǵatyp, ásem Ánuranymyzdyń áýenin Kúnshyǵys elinde de shyrqatady dep senemiz.
