Búginde buǵan deıin el Prezıdentiniń qolynan Ishki ister mınıstrligine qarasty joǵary oqý oryndarynyń dıplomy men alǵashqy arnaýly ataǵyn alǵan órender elimizdiń barlyq aımaqtarynda jemisti qyzmet atqaryp júr. Solardyń biri – Nur-Sultan qalasy Saryarqa aýdandyq Polısııa basqarmasynyń tergeýshisi Nazgúl Qojamjarova.
«2015 jyly Ishki ister mınıstrligine qarasty B.Beısenov atyndaǵy Qaraǵandy akademııasynyń tabaldyryǵyn attap, 2019 jyly ony úzdik dıplommen, sotqa deıingi tergep-tekserý mamandyǵy boıynsha bitirdim. Eń alǵashqy arnaýly ataǵymyzdy Memleket basshysy Qasym-Jomart Toqaevtyń qolynan aldym. Bul úlken ómirge qadam basqaly turǵan maǵan erekshe áser etti», deıdi Nazgúl.
Bizdiń keıipkerimiz bul mamandyqty bala kezinde tańdaǵan eken.
«Ákem de Ishki ister departamentinde qyzmet etti, qazir zeınette. Ákeme uqsaǵym kelip, osy salada jumys isteýdi mektep qabyrǵasynda júrgen kezden josparladym. Qaraǵandy akademııasyna oqýǵa túsip, oqytýshylarymyzdyń bergen bilimin boıǵa sińirýge tyrystym. Osylaısha úzdikter arasynan kórindim. Qatelespesem, 2019 jyly akademııany 208 túlek bitirdik. Solardyń ishinde 8-i úzdik dıplom aldy. Álbette, dıplom men alǵashqy shenimizdi Prezıdenttiń ózi tabystaıtynyn estigende qatty qýandym. Bul – oqýyńnyń, birneshe jyldyq eńbegiń men izdenisińniń jemisi. Prezıdenttiń qasynda turý, onyń aldynda sóıleý men úshin umytylmas sát boldy. Onyń ústine Memlekettik rámizder kúni Tý kóterý rásimine qatysyp, jalaýymyz jelbirep turǵanda mańyzdy qujat alý maǵan úlken jaýapkershilik júktegendeı boldy. Sol jerde bolǵan árbir túlektiń elimizge degen súıispenshiligi arta túskenine senimdimin.
Árıne teorııa men tájirıbeniń aıyrmashylyǵyn jumysqa kelip túsindim. Qaraǵandy akademııasynyń bir jaqsy tusy, oqytýshylardyń kóbi tergeýshi bolyp jumys istegen praktık mamandar. Jumystyń ońaıy bolmaıdy ǵoı. Alaıda bizdiń salanyń da óz qyzyǵy bar. Qazir elime adal qyzmet etsem, osy salanyń damýyna úles qossam, áli de talaı arnaýly ataqtarǵa qol jetkizsem dep oılaımyn», deıdi ol.
Nazgúl Qojamjarovanyń negizgi maqsattarynyń biri – keleshekte Qazaqstan polıseıleriniń mártebesin kóterýge, oń ımıdjin qalyptastyrýǵa kúsh salý.
Al qazir Nur-Sultan qalasynda qyzmet etetin polısııa ınspektory Rýslan Ilıasov 2 jyl buryn dál osy Memlekettik rámizder kúni sol kezdegi Ishki ister mınıstri Qalmuhanbet Qasymovtan alǵashqy arnaýly ataǵyn alypty.
«Dıplomymdy astanaǵa baryp alatynymyzdy estigende erekshe sezimde boldym. Qatty qýandym. Sodan, bas qalaǵa kelip saltanatty jıynda mınıstrden arnaýly ataq aldym. Elordaǵa ata-anam da birge kelip, barlyǵy qýanyshyma ortaqtasty. Shynymen, ómirdegi mańyzdy kúnińniń memleket úshin mańyzdy merekelerdiń biri – Memlekettiń rámizder kúnimen sáıkes kelýi, onyń ústine úlgi alatyn úlken tulǵalardyń sol rásimde aq tilegin estýiń aıryqsha sezimge bólemeı qoımaıdy eken.
Men bala kezimnen polısııa bolsam dep armandadym. Arman qýyp Qostanaıdaǵy Shyraqbek Qabylbaev atyndaǵy Qostanaı akademııasyna Ákimshilik quqyq mamandyǵyna oqýǵa tústim. Akademııany qyzyl dıplomǵa aıaqtaımyn degen maqsatym boldy. Sátin salyp, ol armanyma da jettim», deıdi Rýslan.
Rýslan Ilıasov ózine júktelgen mindetti abyroımen atqaryp júrgen mamandardyń qatarynda. Ol úzdik dıplom ıegerlerine jumys ornyn tańdaý quqyǵy beriletinin paıdalanyp, Nur-Sultan qalasy Esil aýdandyq Polısııa basqarmasy Jergilikti polısııa qyzmeti bólimine jumysqa turady.
«2018 jyldan bıylǵa deıin ýchaskelik polısııa ınspektory bolyp qyzmet ettim, aǵa leıtenant atandym. Biz otbasydaǵy janjaldan bastap, úlken qylmystarmen jumys isteımiz. Munyń bári – eldegi jaǵdaıdyń kórinisi. Polısııa tek qylmysty áshkerelep qoımaı, onymen kúresý, qylmystyń aldyn alý joldaryn izdeıdi. Sondyqtan óz salamnyń úzdik mamany bolýǵa tyrysyp júrmin», deıdi jas maman.
Úzdik túlekterge arnaýly ataqtardy 4 maýsymda tabystaý uzaq jyldardan beri jalǵasyp kele jatqan dástúrli is-shara. Osynaý mereke kúni Prezıdenttiń, sondaı-aq sala basshysynyń aq tilegin estip, úlken ómirge joldama alǵan jas mamandardyń elimiz úshin aıanbaı qyzmet ete beretinine senimimiz mol.
