Fazyljanova Anar Muratqyzy – A. Baıtursynuly atyndaǵy Til bilimi ınstıtýtynyń dırektory bolyp taǵaıyndaldy. 2018 jyldan bastap Shaısultan Shaıahmetov atyndaǵy «Til-qazyna» Ulttyq ǵylymı-praktıkalyq ortalyǵynyń ǵalym hatshysy qyzmetin atqarǵan Anar Fazyljanova fılologııa ǵylymdarynyń kandıdaty bolyp tabylady. Ol A. Baıtursynuly atyndaǵy Til bilimi ınstıtýtynda 22 jyl jumys istep, jetekshi ǵylymı qyzmetkerden bastap ǵylymı hatshy men ınstıtýt dırektorynyń orynbasaryna deıingi barlyq satylarynan ótken.
Anar Fazyljanova – ıntonasııa, ıntonologııa, fonetıka, orfoepııa, Tarıhı fonetıka, leksıkografııa, úshtildilik, alfavıtti aýystyrý jáne memlekettik tildiń basqa da máseleleri boıynsha 200-den astam ǵylymı jarııalanymnyń avtory. Sondaı-aq, latyn grafıkasy negizindegi qazaq alfavıtiniń teorııalyq jáne praktıkalyq negizderi boıynsha vıdeoleksııalardyń sıkldaryn kópshilikke taratý jelisinde ázirlengen «Durys sóıleıik» (kitap.kz) podkastynyń avtory.
Anar Muratqyzy – jas ǵalymdarǵa arnalǵan Ǵylym men tehnıka salasyndaǵy syılyqtyń laýreaty jáne Tuńǵysh Prezıdenti Qory grantynyń ıegeri;
Másimhanuly Dúken – R. Súleımenov atyndaǵy shyǵystaný ınstıtýtynyń dırektory bolyp taǵaıyndaldy. Pekın qalasyndaǵy Ortalyq ulttar ýnıversıtetiniń túlegi, fılologııa ǵylymdarynyń doktory, professor Dúken Másimhanuly 90-shy jyldardyń basynda tarıhı otanyna oralyp, oqytýshylyq jáne ǵylymı zertteý jumystarymen aınalysty.
Dúken Másimhanuly «Qytaı týraly qyryq sóz», «Qytaısha-qazaqsha úlken sózdik», úsh tomdyq «Dúken Másimhanuly. Tańdamaly», bes tomdyq «Qytaı ádebıetinen tańdamaly úlgiler» kitaptarynyń avtory. D. Másimhanulynyń 300-den astam ǵylymı jáne ádistemelik jumystary sheteldik basylymdarda jáne elimizdiń jetekshi basylymdarynda jaryq kórdi;
Ábil Erkin Amanjoluly – Memleket tarıhy ınstıtýtynyń dırektory bolyp taǵaıyndaldy. Tarıh ǵylymdarynyń doktory, professor Erkin Amanjoluly óz eńbek jolyn oqytýshy bolyp bastaǵan. Ár jyldary Qostanaı memlekettik pedagogıkalyq ınstıtýtynyń ǵylymı jumys jáne sheteldik baılanys jónindegi prorektory, О́. Sultanǵazın atyndaǵy Qostanaı memlekettik pedagogıkalyq ýnıversıtetiniń rektory bolyp jumys istedi.
Erkin Amanjoluly – 200-den astam ǵylymı basylymdardyń, sonyń ishinde 22 monografııa, 26 oqýlyq pen oqý quraldarynyń, sonymen qatar ISI, Scopus bazalaryna kiretin jýrnaldarda jaryq kórgen 7 maqalanyń avtory. «Qazaqstan halqy Assambleıasyna 20 jyl», «Qazaqstan Respýblıkasynyń Táýelsizdigine 25 jyl», «Qazaqstan máslıhattaryna 25 jyl» mereıtoılyq medaldarymen jáne «Qazaqstan Respýblıkasynyń ǵylymyn damytýǵa sińirgen eńbegi úshin», «Bilim jáne ǵylym qyzmetkerleri kásipodaǵynyń qyzmetine sińirgen eńbegi úshin» tósbelgilerimen marapattalǵan. 2014 jyly Erkin Ábil joǵary oqý ornynyń úzdik oqytýshysy atanǵan.
