Onyń ishinde áleýmettik az qamtylǵan jáne kópbalaly 1100 otbasy bar. Sonymen qatar, búgingi tańda Taraz qalasy boıynsha 18,6 myń adam turǵyn úı kezegine tirkelgen. Jergilikti turǵyndardy turǵyn úımen qamtý máselesi óńirde oń sheshim taýyp keledi. Jyl basynan beri júzdegen otbasy memleket qoldaýynyń nátıjesinde baspanaly bolyp, qonys toıyn toılady. Bul úrdis aǵymdaǵy jyly da ary qaraı jalǵasyn taba beretin bolady.
Elimizdiń Memlekettik rámizder kúnine oraı, Taraz qalasyndaǵy «Araı-2» shaǵynaýdanynan páter kezeginde uzaq jyldar boıy turǵan 90 adamǵa baspana kilti tabystaldy. Atalǵan nysan «Nurly jer» memlekettik turǵyn úı baǵdarlamasy boıynsha boı kótergen. Bes qabatty eki turǵyn úı zaman talabyna saı, sapaly túrde salynǵan. Turǵyndarǵa páter kiltin tapsyrý saltanatyna Jambyl oblysynyń ákimi Berdibek Saparbaev arnaıy qatysyp, baspanaly bolǵan azamattardy qonys toıymen quttyqtady.
«Bizdiń elde qoljetimdi baspana máselesin sheshýge aıryqsha kóńil bólinýde. О́tken jyly «Nurly jer» baǵdarlamasy boıynsha 2 myńnan astam tarazdyq turǵyndar qonys toıyn toılasa, bıyl oblys ortalyǵynda 50-den astam kóppáterli turǵyn úı salý josparlanǵan. Memleket basshysynyń tapsyrmasymen ázirlengen jańa «5-10-20» baǵdarlamasy da myńdaǵan otbasylarǵa baspana alýǵa múmkindik beredi. Memlekettik rámizder kúnimen qatar kelgen qonys toılaryńyz qutty bolsyn! Shańyraqtaryńyz shattyqqa toly bolyp, bereke-birligimiz arta bersin», dedi Berdibek Saparbaev.
«Araı-2» shaǵynaýdanynda ornalasqan páterler jetim balalarǵa, múmkindigi shekteýli jandarǵa, tolyq emes jáne az qamtamasyz etilgen otbasylarǵa, sonymen qatar, áleýmettik jaǵynan halyqtyń osal tobyn quraıtyn basqa da sanattaryna jatatyn azamattarǵa berildi. Baspanaly bolǵan azamattar memlekettiń kórsetip otyrǵan qoldaýyna alǵys bildirip, páter bólmelerin aralap kórdi. «Bizge qamqorlyq kórsetkeni jáne qoldaý bildirgeni úshin memleketke kóp rahmet. Búgin biz úshin qýanyshty kún. Otbasymyzben uzaq ýaqyt boıy páter jaldap turdyq. Baspana máselesin óz betimizshe sheshýge múmkindigimiz bolmady. Memlekettik qoldaýdyń arqasynda búgin biz eki bólmeli páterge ıe boldyq», deıdi Aýǵan soǵysynyń ardageri Berik Torǵaıbekov.
Qazirgi kezde Taraz qalasynda turǵyndardy baspanamen qamtý boıynsha tıisti jumystar júrgizilýde. Búgin «Araı-2» shaǵynaýdanynan 5 qabatty 2 turǵyn úı paıdalanýǵa berilse, jyl sońyna deıin taǵy da kóptegen otbasy baspanaly bolady dep josparlanýda.
Jambyl oblysy
