Memleket basshylyǵy janarmaıdyń balamaly túrine kóshirýdi tapsyrǵan bolatyn. Buǵan deıin ınvestısııa máseleleri boıynsha keńeste ákimdik elektroavtobýs óndirýmen aınalysatyn kompanııanyń jobasyn maquldady. Jeke ınvestor óz qarjysyna elordaǵa elektroavtobýs ákeledi.
Qala ákimdigi 100 elektroavtobýs satyp alyp, olar bıyldan bastap jelige shyqty. Dybyssyz elektr avtobýstarynyń artyqshylyǵy – olar ekologııalyq jáne paıdalanǵanda kóp shyǵyndy qajet etpeıdi.
«Bul avtobýstardy paıdalaný avtoparkter tek janarmaıdan dızelmen salystyrǵanda 80%-ǵa deıin únemdeıtinin kórsetti. Sondaı-aq maı aýystyrý jáne basqa da qajettilikter bolmaǵandyqtan, eksplýatasııalyq shyǵyndardyń 80% azaıǵanyn baıqadyq. Eger dızeldik otynǵa shyǵyndar táýligine 22-25 myńdy qurasa, elektrlik shyǵyndar 4-5 ese az. Konstrýksııa avtobýstardy kúnine bir ret, tek túngi ýaqytta qýattaıdy, al kúndiz oǵan qajettilik joq», - dedi «City Transportation Systems» kompanııasynyń basqarma tóraǵasy Bekmyrza Igenberdınov.
Jańa elektravtobýstar avtoparkterdi aıtarlyqtaı jańartyp, avtobýstardyń júrý ýaqyty men aıaldamada kútý ýaqytyn azaıtýǵa múmkindik beredi. Budan bólek, elorda ákimi turǵyndar jol aqysyna qatysty másele kóterdi. «Qys mezgilinde balalardy jol aqysyn tólemegeni úshin avtobýstan túsirip ketken kezder boldy. Eger bala mektepten nemese úıirmeden qaıtatyn kezde, ásirese otbasyda birneshe bala bolsa jolaqysyn tóleý qıynǵa soǵatyn».
Elorda ákimi Altaı Kólginovtiń tapsyrmasyna sáıkes, 28 naýryzdan bastap qalalyq, qala mańyna qatynaıtyn jáne ekspress baǵdarlarda 18 jasqa deıingi balalar úshin jol aqysy tegin boldy (Tek jolaýshylar kóligin belgilep, olardyń júrý kestesin yńǵaıly etip jasaý úshin kólik kartasy qajet). Buǵan qosa qoǵamdyq kólikte jasy boıynsha zeınetkerler, UOS ardagerleri, múgedekter, múgedekterdi alyp júretin tulǵalar, kópbalaly otbasylar tegin júredi. Avtobýsta tegin júrý úshin atalǵan sanattaǵy azamattarda ataýly jeńildik kartasy bolýy kerek.
Elorda avtobýstarynda elektrondy tólem qabyldanady. Qoǵamdyq kólikter 100% júıemen qamtylǵan, sondaı-aq pılottyq joba retinde Face Pay júıesi paıdalanylady. Avtobýstaǵy kameralar adamdardy bet-beınesi arqyly tanıdy, jolaqy avtomatty túrde alynady.
