«Almaty jurtshylyǵy Ile-Alataýy ulttyq parkin abattandyrý məselesi jóninde alańdaýshylyq bildirýde. Barlyq týyndaǵan məselelerdi sheshý úshin bizdiń vedomstvo quramyna sarapshylar, mınıstrlik ókilderi, jurtshylyq, ekobelsendiler kiretin Ulttyq parkterdi damytý jónindegi qoǵamdyq keńes qurý týraly bastama kóterdi», - dep jazdy M.Myrzaǵalıev.
Onyń aıtýynsha, keńes ınvestordyń mindettemelerin oryndaýyna, ulttyq parkterdi damytý josparyn talqylaýǵa qatysýǵa, qajet bolǵan jaǵdaıda, onyń aspektilerin iske asyrýǵa əser etýge baqylaý jasaı alady.
Mınıstr barlyq múddeli tulǵalardy keńeske qosylýǵa shaqyrdy.
«Tek birikken kezde ǵana biz tabıǵat baılyǵyn saqtaý maqsatyna qol jetkize alamyz», - dep atap ótti ol.
Ekologııa mınıstrliginiń basshysy mınıstrliktiń ulttyq parkterdi «tabıǵatqa júk túsirmeı» damytýdy kózdep otyrǵanyn eske saldy.
«Qazirde olardy damytý kezinde aýqymdy ǵımarattar salýdy qoıyp, eko-týrızmdi damytýǵa, júrginshiler jolyn salýǵa, tek jeńil nysandar salýǵa nazar aýdarý qajet. Iаǵnı qorshaǵan ortaǵa orynsyz kıligý bolmaýy tıis», - dep atap ótti M. Myrzaǵalıev.
