Keshe elimizdiń Qorǵanys mınıstrliginde Májilistiń Halyqaralyq ister, qorǵanys jáne qaýipsizdik komıteti men «Nur Otan» HDP partııalyq jetekshisi saraptaý tobynyń «Qorǵanys qabileti jáne qaýipsizdik» baǵyty boıynsha kóshpeli otyrysy bolyp ótti.
Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev bastaǵan depýtattar qatysqan jıyn barysynda áskerı bilim men áskerı ǵylymdy damytýdyń keleshegi keńinen sóz boldy.
Keshe elimizdiń Qorǵanys mınıstrliginde Májilistiń Halyqaralyq ister, qorǵanys jáne qaýipsizdik komıteti men «Nur Otan» HDP partııalyq jetekshisi saraptaý tobynyń «Qorǵanys qabileti jáne qaýipsizdik» baǵyty boıynsha kóshpeli otyrysy bolyp ótti.
Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev bastaǵan depýtattar qatysqan jıyn barysynda áskerı bilim men áskerı ǵylymdy damytýdyń keleshegi keńinen sóz boldy. Atap aıtqanda, ofıser mamandardy daıyndaý júıesin jetildirý jáne Qazaqstannyń áskerı oqý oryndarynyń biryńǵaı aqparattyq-bilim jelisin damytý máseleleri talqyǵa salyndy.
Májilis depýtaty Qýanysh Sultanovtyń sózine qaraǵanda, bul komıtettiń jumys josparyna sáıkes ótkizilgen kezekti jumysshy otyrysy. Zaman úrdisi men talap-tilegine qaraı jańa tehnologııalardyń qalyptasýy zamanynda ozyq ádisterdi qoldaný jáne áskerılerdiń kásibı daıyndyǵy tóńireginde pikir almasý – ýaqyt talaby.
Komıtet tóraǵasy kóshpeli otyrysty ótkizýdiń mańyzyna arnaǵan sózinde ony álemdegi ózgeristermen baılanystyrdy. Áskerı qaýipsizdik salasynda da aıtarlyqtaı ózgerister oryn alýda. Jańa áskerı tehnıkalardyń engizilýimen qatar, qashyqtan basqarý áreketteri de keńinen qoldanyla bastaǵan. Áskerı qaýipsizdikti qamtamasyz etý salasyndaǵy ıntellektýaldy faktordyń róli arttyrylýda. Sondyqtan da jańa dáýirdiń áskerı ofıserleri men kadrlaryn daıarlaý mańyzy artyp otyr. Olaı bolsa, áskerı mamandar óte bilimdi bolýymen qatar, óz Otanyn súıe bilýi de shart.
Sondaı-aq, komıtet tóraǵasy áskerı ǵylymdy damytý salasynda áskerı tapsyrystardy ulǵaıtý ýaqyt talaby degenge erekshe toqtaldy. Materıaldyq-tehnıkalyq bazany nyǵaıtý máselesi de nazardan tys qalǵan joq. Al Májilis depýtaty Abaı Tasbolatov sóz reti kelgende patrıottyq tárbıe berýdi batyr babalarymyzdyń erlik joldaryn zertteý men zerdeleý arqyly júzege asyrýǵa bolatynymen bólisti. Depýtattyń paıymynsha, áskerı patrıottyq sezim alǵashqy áskerı daıyndyqtan, ıaǵnı mektep qabyrǵasynan bastalady. Osy rette general alǵashqy áskerı daıyndyqqa bólingen 140 saǵatty 68-ge qysqartýdyń orynsyz ekendigin aıtyp, óz qynjylysyn bildirdi.
Budan keıin sóz alǵan Májilis depýtaty Baqytjan Ertaev kýrsanttardyń 95 paıyzy qazaq tilin bilgenimen, olarǵa beriletin bilim resmı tilde jetkiziletinin ortaǵa saldy. Ol osy sózdi aıta otyryp, áskerı ustazdardyń qazirden bilimdi memlekettik tilde berýi qajettigine erekshe ekpin túsirdi. Oqytý-materıaldyq baza ýaqyt talabyna saı bolýy kerektigin eskertken general onyń qazirgi zaman syn-qaterlerine jaýap bere alatyndaı deńgeıde bolýy qajettigin de qaperge saldy. Olaı bolsa, Qazaqstan óziniń áskerı óndirisin arttyryp, áskerı ǵylymyn damytýy qajet. Ol úshin áskerıler ishki jattyǵýlarmen qatar, halyqaralyq jattyǵýlarǵa da qatysyp, ony ǵylymı zertteýlermen ushtaı túsýleri tıis.
Kóshpeli otyrys barysynda taqyrypqa saı qorǵanys qabileti jáne qaýipsizdik máseleleri jan-jaqty talqylanyp, áskerı bilim men ǵylymdy damytý jaıy keńinen sóz boldy. Kóptegen usynystar ortaǵa salyndy.
Asqar TURAPBAIULY,
«Egemen Qazaqstan».
