Aǵash egý, ósirý, sýarý kóp qarajatty qajet etpeıdi, tek nıet, eńbek, tabıǵatqa degen janashyrlyq qajet. Ormanda biz sekildi ómir súrgińiz kelse, bul sizdiń de qolyńyzdan keledi. Joba aıasynda óz qolymyzben ósirgen jas taldardy ekologııalyq baǵyttaǵy túrli jobalarǵa tegin úlestiremiz. О́ıtkeni kommersııalyq tabys tabýdy oılamaımyz. Tek qorshaǵan orta tazaryp, jasyl jelekke janashyrlyq jasaıtyn adamdar qatary kóbeıse deımiz. Kóshetterdi de tegin berýge daıynbyz, biraq bir shartymyz bar – aǵashtardyń sýarylýy qamtamasyz etilýi tıis. Baq ósirýdegi maqsat – qorshaǵan ortany qorǵaý, ekologııalyq mádenıetti qalyptastyrý. Jasyldandyrýmen aınalysyp júrgende adamdardyń ekologııalyq mádenıeti jetkiliksiz ekenin kórdik. Adam qorshaǵan ortaǵa qamqorlyqpen qaraý kerek. Ekologııalyq mádenıetsiz jalań ádisterdi qoldaný tıimsiz. Biz aǵash otyrǵyzý barysynda mektepterde «Jerdiń bolashaǵy seniń qolyńda» ataýymen eko-sabaqtar ótkizemiz. Osy arqyly balalar bolashaq úshin alańdap, jerdi qasterleýdi, kógaldandyrýdy úırenedi.
Volonterlerge jumys jetkilikti. Men jerge baq syılaý jumysyn óz erkimmen bastadym. Osy jumysqa tabıǵat janashyry, kóshbasshy eko-ambassador retinde óńirden arnaıy taǵaıyndalǵandyqtan, ekologııa departamentiniń barlyq is-sharalaryna qatysyp júrmin. Karantın kezinde de qashyqtan oqytý jobasy arqyly eko-sabaqtardy ınternetpen jiberdik. Jeńis merekesinde «Týǵan Jer – Rodnaıa Zemlıa» jobasy aıasynda oblys ortalyǵyndaǵy Jeńis saıabaǵyna aǵash otyrǵyzyldy.
Qazir adamdar óziniń qandaı aýyr ekologııalyq ortada turyp jatqanyn túsine bermeıdi. Ár adam – jerdiń tutynýshysy. Tutynshýy retinde óz úlesin qosyp, jerdiń, aýanyń tazarýyna paıdasyn tıgizý qajet. Bizdiń basty problema – ekologııalyq mádenıettiń tómendiginde. Jasyldanǵan aımaqtar az. Onyń qataryn kóbeıtip, Jer-Anaǵa jaqsylyǵyn qaıtarýymyz kerek. Infraqurylym men ındýstrııanyń áseri, jol salý úshin onyń aınalasyndaǵy kóshetterdi kessek, jaýap retinde basqa jerden aǵash egýimiz qajet.
Kim tabıǵatty súıedi, kelińizder, jumys qoly bizge qajet. Bárimiz qorshaǵan ortany qorǵaýǵa úles qosaıyq!
Iýrıı GAShEK,
«Jerge baq syıla» qoǵamdyq qorynyń tóraǵasy
Pavlodar oblysy
