Qalanyń Jasyl ekonomıka basqarmasynyń málimeti boıynsha 2019 jyly #JasylAlmaty aksııasy aıasynda 135 myń jasyl jelek otyrǵyzylǵan. Kóshetter kópshilik jınalatyn aýmaqtarǵa, onyń ishinde mektepterdiń, aýrýhanalardyń aınalasyna, Bolaı taýy (Mohnatka), Kóktóbeniń bókterlerine, Atakenttiń, Atletter aýyly men «Alataý» teatrynyń alańdaryna egildi.
Salystyrmaly turǵydan qarasaq, megapolıstegi eń jasyl eldi meken Medeý aýdanynda 472 myńnan astam aǵash bar eken. Al, Naýryzbaı jáne Alataý aýdandarynda shamamen 202 myń jáne 179 myń aǵash ósip tur. Jasyldandyrý boıynsha ekinshi oryndy Túrksib aýdany ıelengen, munda aǵash sany 431,5 myń túp. Úzdik úshtiktiń ishine Bostandyq aýdany da kiredi. Mamandar mundaǵy 380 myń túp aǵashty sanap shyqty. Áýezov aýdanyndaǵy aǵashtar sany 100 myńǵa kem, ıaǵnı 255 myńǵa jýyq. Jetisý aýdanynda 220 myńnan astam, al Almaly aýdanynda 213 myń aǵash bar.
Osy arada aǵashtar otyrǵyzylý kórsetkishine kópshilik oryndar ǵana iligip otyrǵanyn aıta ketelik. Bul quramǵa jeke aýmaqtardaǵy, zırattardaǵy, respýblıkalyq mańyzy bar jerlerdegi jasyl jelek qosylmaǵan.
Qalada barlyǵy 2 000 352 aǵash bar. Olardyń ishinde saýyǵyp, japyraqtaryn keńge jaıǵandary 1,8 mln nemese 76,5 paıyz. Sondyqtan aǵashtardy zııankesterden qorǵaý jáne saýyqtyrý úshin óńdeý jumystary júrýde. Preparattar aǵash japyraqtaryn kemiretin jáne soryp tastaıtyn zııankes qurttardan qorǵaýda. Bul óńdegish zattar – uzaq merzimdi ári qorshaǵan ortaǵa qaýipsiz.
«Jasyl jelekti óńdeý jumystary qorǵaýdyń bıologııalyq, qajet bolǵan jaǵdaıda hımııalyq ádispen iske asýda. О́ńdeý júrgizer aldynda 5-7 kún ishinde zııankesterdiń damý fenologııasyna, túrli zııankesterden taralýyna monıtorıng júrgiziledi», - deıdi qalanyń Jasyl ekonomıka basqarmasynyń ókilderi.
Jasyl jelekti óńdeý jumystary 23.00-den 5.30-ǵa deıin júrgiziledi. Búgin Almatynyń jasyl qoryn óńdeýdiń II kezeńi bastalady.
ALMATY
