Elordadaǵy «Qazmedıaortalyǵy» ǵımaratynda «Qazaqstandyq medıa salanyń damý bolashaǵy» taqyrybynda dóńgelek ústel ótti. Sanıtarlyq-epıdemıologııalyq rejımniń saldarynan selektorlyq jaǵdaıda ótken jıynǵa medıa sala ókilderi, Nur-Sultan jáne Almaty ákimdikteri ǵımarattarynan, sondaı-aq Almaty qalasyndaǵy «Qazteleradıo» keńsesinen ǵalymdar men zııaly qaýym beınebaılanys arqyly qosyldy.
Spıkerler Aqparat jáne qoǵamdyq damý mınıstri Aıda Balaeva, Parlament Májilisiniń depýtaty Darhan Myńbaı, «QAZAQSTAN» RTRK AQ Basqarma tóraǵasy Lázzat Tanysbaı, «Qazaq ádebıeti» gazetiniń bas redaktory Dáýren Qýat, Salem Social Media bas dırektory Aleksandr Aksıýtıs, Súleımen Demırel ýnıversıtetiniń Áleýmettik ǵylymdar kafedrasynyń meńgerýshisi Madııar Saýdabaev boldy. Dóńgelek ústeldiń tizginshisi retinde belgili jýrnalıst, QR Parlamenti Senatynyń depýtaty Nurtóre Júsip sóz sóıledi.
A. Balaeva «keshegi tótenshe jaǵdaı kezinde qıyndyqtardy jeńe otyryp, bizdiń tilshilerimiz ben mamandarymyz dárigerlermen, polıseılermen jáne áskerı qyzmetshilermen qatar ózderiniń azamattyq pozısııasyn ózgertpeı, aldyńǵy qatarda bolyp, qoǵamdy jedel jáne shynaıy aqparatpen qamtamasyz etti», - deı kelip, tótenshe jaǵdaı kezinde kórsetken azamattyq erligi úshin barsha baspasóz qyzmetkerlerine alǵysyn bildirdi.
Jıyn barysynda mınıstr A.Balaeva daǵdarystan keıingi kezeńdegi BAQ-ty qoldaý sharalaryna, otandyq BAQ-tyń básekege qabilettiligin arttyrýǵa, joǵary bilikti kadrlardy daıarlaýǵa (onyń ishinde salalyq jýrnalıstıkada), memlekettik aqparattyq tapsyrysty qaıta qalyptastyrý sekildi birqatar mańyzdy máselelerdi kóterdi.
Parlament Májilisiniń depýtaty D. Myńbaı naqty jáne durys aqparatty mol tırajben taratý úshin aqparattyq súzgi qurý qajettigin atap ótti. Sondaı-aq, onyń pikirinshe, jýrnalıster men blogerlerdiń biliktiligin arttyryp otyrý úshin, aqparattyq jańashyldyqtardan qalys qalmaýǵa múmkindik beretin kóp salaly trenıngter qurý qajet.
«Qazaq ádebıeti» gazetiniń bas redaktory Dáýren Qýat koronavırýs indetinen qazirgi ýaqytta merzimdi baspasózdiń aýyr daǵdarysqa ushyraǵanyn tilge tıek etti. Onyń aıtýynsha, baspahanalardyń jumysy toqtady, baspa ónimderin ótkizý naryǵy buǵattaldy, ekinshi jartyjyldyqqa jazylý sozyldy, taratý (atap aıtqanda, «Qazposhta») jáne t. b. jumys istemeı qaldy.
Baıandamadan keıin otandyq BAQ-tardyń problemalary men perspektıvalary, qazaqstandyq jýrnalıstıkanyń álsiz jáne kúshti jaqtary, onyń tabysty memleket qurýdaǵy maqsaty men róli talqylandy. Naqty sıpattaǵy (salalyq jýrnalıstıkanyń sapasy, materıaldardyń durys emestigi), sondaı-aq jahandyq (memleket ıdeologııasyn qalyptastyrýdaǵy jýrnalıstıkanyń róli, onyń bılik pen qoǵam arasyndaǵy medıatorlyq qyzmeti jáne t.b.) máseleler kóterildi.
«Mádenıet» jýrnalynyń bas redaktory, jazýshy Dýlat Isabekov «baspasózdiń sany qansha kóp bolǵanmen, bir-birinen aýmaıtyn materıal jarııalaıdy» degen syn aıtty.
Jazýshy Tólen Ábdik qazirgi basylymdarda saýatsyzdyq bylaı tursyn, Konstıtýsııaǵa qarsy jarııalymdar jıi kezdesetinin jáne buǵan tózýge bolmaıtynyn atap ótti.
Medıa menedjer Qanat Saharııanov óńirlik ákimdikter BAQ-ta jáne áleýmettik jelilerde bıýdjet qarajaty esebinen óz jumysyn nasıhattamaýy tıis ekenin aıtty.
Dóńgelek ústeldiń jumysyn qorytyndylaı kele, A.Balaeva is-sharaǵa qatysýshylar kótergen barlyq problemalyq máseleler eskeriletinin, taldanatynyn jáne olar boıynsha naqty sheshimder algorıtmi jasalatynyn atap ótti.
«Jemisti jumystaryńyz úshin alǵys aıtamyn. Aqparat jáne qoǵamdyq damý mınıstrligi janyndaǵy dóńgelek ústel dástúrli túrde jalǵasatyn bolady. Biz tek aqparatqa qatysty ǵana emes, qoǵamdy tolǵandyratyn basqa da máselelerdi talqylaıtyn bolamyz», - dedi mınıstr.
