Oıyl topyraǵy qaı kezde de talanttarǵa kende bolǵan emes. Nebir arqaly aqyndar, alashtan án ozdyrǵan ánshiler, kúmbirlete kúı tókken kúıshiler de ótken bul óńirden. Sondaı týma talanttardyń arasynda qazaqtan shyqqan ataqty bıshi, tuńǵysh balerına, Qazaq KSR-iniń eńbek sińirgen ártisi Nursulý Tapalovanyń orny bólek.
Oıyl topyraǵy qaı kezde de talanttarǵa kende bolǵan emes. Nebir arqaly aqyndar, alashtan án ozdyrǵan ánshiler, kúmbirlete kúı tókken kúıshiler de ótken bul óńirden. Sondaı týma talanttardyń arasynda qazaqtan shyqqan ataqty bıshi, tuńǵysh balerına, Qazaq KSR-iniń eńbek sińirgen ártisi Nursulý Tapalovanyń orny bólek.
Oıyl aýdandyq mádenıet úıinde ótken bıshiniń týǵanyna 90 jyl tolýyna arnalǵan «Aıdyn kóldiń aqqýyndaı terbelgen» tarıhı-tanymdyq konferensııaǵa jerlesteriniń uıymshyldyqpen jınalýy da sondyqtan. Konferensııa shymyldyǵy Nursulý Elýbaıqyzy týraly beınebaıanmen ashyldy. Bıshiniń býynsyz bıin, jarq-jurq etken janaryndaǵy ushqyndy kórgende shynynda da, aıdyn kóldiń aqqýyndaı ásem de ádemi qımylyna tánti bolmaýyń múmkin emes. Ashyq aspan astynda myń burala bılegen bıshiniń naǵyz ulttyq naqyshqa toly qımyly men saýsaq qozǵalystary týma talanttyń sheberligin pash ete túskendeı.
Sharany kirispe sóz sóılep ashqan Oıyl aýdanynyń ákimi Mavr Abdýllın Oıyl óńirinen qazaq óneri men mádenıetine ózindik úles qosqan talaı sańlaqtardyń shyqqanyn tilge tıek ete kelip, bul oraıda búgingi urpaq úshin aty ańyzǵa aınalǵan Nursulý Tapalovanyń alar orny erekshe ekenin atap ótti. Bıshi apamyzdyń asyl rýhyna taǵzym ete otyryp, jas urpaqtyń boıynda týǵan elge degen qurmet pen maqtanysh sezimin uıataý, halyqtyń salt-dástúrlerin saqtap jalǵastyrý úshin daryndarymyzdy, týma talanttarymyzdy, týmysy bólek tulǵalarymyzdy eldiń jadynda jańǵyrtyp otyrý paryzymyz bolmaq, dedi ol.
Konferensııada Qazaqstan Respýblıkasynyń mádenıet qaıratkeri, oblystyq tarıhı-ólketaný mýzeıiniń qyzmetkeri Rysty Dosova qazaqtyń tuńǵysh balerınasy Nursulý Tapalovanyń ómiri jáne shyǵarmashylyǵy týraly baıandama jasady. Onyń aıtýynsha, Nursulý Tapalova 1923 jyly qyrkúıek aıynda Oıyl aýdanynda ómirge kelgen. Ol 11 jasqa tolǵanda elge issaparmen kelip júrgen akademık Ahmet Jubanovtyń nazaryna iligip, Almatyǵa jol tartady.
– Balaýsa qyz memlekettik opera jáne balet teatrynan bir-aq shyǵady. Ol birden belgili baletmeıster A.Aleksandrovtyń aıaly alaqanyna túsedi. Ustazy oǵan Máskeý, Lenıngrad qalalaryndaǵy horeografııalyq ýchılıshelerdiń ulttyq bı bólimine barýǵa keńes beredi. Biraq, Nursulý Tapalova qazaqtyń opera jáne balet teatrynda qalady. Jas bıshi ózin bıikten kórsete biledi. Keıin bı padıshasy Sharanyń rólderin Nursulýǵa tapsyratyndaı dárejege jetedi. 1938 jylǵa deıin kardobalet bıshisi, keıin balet bıshisi bolǵan talant ıesi qaıtalanbas beıneler somdap, kórermen kóńilin baýrap aldy, – deı kelip, baıandamashy kezinde onyń ataqty Galına Ýlanovamen birge «Baqshasaraı burqaǵynda» Zaremanyń rólin oınaǵanyn da jerlesteriniń esine salyp ótti.
Nursulý Tapalova dúnıege, baılyqqa qyzyqpaǵan, qarapaıym ómir keshken. Baıandamashy Rysty Dosova Nursulý Tapalovanyń qudaı qosqan qosaǵy, qazaq boksynyń atasy Shoqyr Bóltekuly, qyzdary Aısulý jáne Toty týraly da oı órbitti. Ol sondaı-aq, bıshiniń ómiri men shyǵarmashylyǵy týraly derekter jınaýǵa, tutynǵan zattaryn oblystyq tarıhı jáne ólketaný mýzeıine ákelýge demeýshilik jasaǵan «Nobel» baspahanasynyń dırektory Nurlan Jumaǵalıevtiń azamattyǵyn atap ótti. Kásipker azamat Nursulý Tapalova atyndaǵy bıshiler baıqaýyn uıymdastyrýǵa da muryndyq bolyp júr eken. Eńbek ardageri Saǵymbaı Qaýmesov óziniń jastaý kezinde býynsyz bıshiniń konserttik brıgadamen kelip, óner kórsetkenin eske aldy. Ol sol joly bir konserttiń ózinde on bes-on alty ulttyń bıin bılep, ónerimen oıyldyqtardy tánti etkenin jetkizdi. Konferensııany «Ásem» úlgili bı ansambli myń buralǵan bımen kórkemdep, ánshi Jańylsyn Bısenǵalıeva Ilııa Jaqanovtyń «Oıyl tolqyny» ánimen ajarlady.
Elden erte ketip, talanttar shoǵyryna qosylǵan bıshini oıyldyqtar osylaı saǵyna eske aldy.
Satybaldy SÁÝIRBAI,
«Egemen Qazaqstan».
Aqtóbe oblysy,
Oıyl aýdany.
