Ol astyq satyp alýǵa Qazaqstanǵa kelgen sheteldik bıznesmenderdiń karantın kezinde aýdan aýmaǵynda erkin júrip-turýyna múmkindik týdyratyny úshin osynsha qarajat talap etken.
SQO Polısııa departamentiniń qyzmetkerleri aldynda Sybaılas jemqorlyqqa qarsy kúres agenttiginiń aımaqtyq basshysy Ernar Baıanǵazın paraqordyń barlyq qylmystyq áreketin aıtyp berdi. Astyq alýǵa kelgen sheteldikter blokbekette ustalyp, ákimshilik hattama toltyrylýy úshin sotqa jiberiledi. Al astyǵyn ótkizýge asyqqan jergilikti fermer olardyń tez bosatylýyna kómektesýdi surap kúdiktige júginedi. Kúdikti bul iske qulshyna kirispek bolady, alaıda ol úshin 300 myń teńge berýdi talap etedi. Alýshydan aırylyp qalmaýdy kózdegen fermer oǵan kelisedi. Sonymen qatar sheteldikterdiń aýdan aýmaǵynda erkin júrip-turýyn qamtamasyz etýin suraıdy. Paraqor buǵan da kelisip, alaıda ol úshin taǵy bir mıllıon teńgeni qosymsha berýge májbúrleıdi jáne bul aqshanyń jartysyn joǵaryǵa beretinin aıtady. Fermer osynyń bárin aıtyp, Sybaılas jemqorlyqqa qarsy kúres agenttigine shaǵym túsiredi. Paraqor aqshany alý kezinde ustaldy.
Jýyrda Petropavl qalalyq soty paraqordy 3,5 jylǵa bas erkinen aıyrý týraly úkim shyǵardy. Ol qylmystyq jazasyn qaýipsizdigi orta deńgeıdegi túzetý ornynda atqaratyn boldy. Sonymen birge ómir-baqı memlekettik qyzmette isteý quqynan aıryldy. Árıne, paraqordyń áli oblystyq sotqa shaǵymdaný quqy bar, biraq mundaı ister buzyla qoımaıdy.
Soltústik Qazaqstan oblysy
