Almatynyń Iskerlik keńesi men shahardaǵy týrızmdi damytýǵa qatysty túrli jıyndarda onyń túıtkilderi týraly az aıtylmady. Máselen, almatylyqtar jyl saıyn tek qana sheteldik medısınalyq týrızmge 500 mln dollardan asa qarajat jumsaıtyn bolsa, bul múmkindikterdiń barlyǵy aınalamyzda bar ekenin naqty mysaldarmen dáıekteýge bolar edi.
Sonymen týrızmdi damytýǵa qatysty, qarajat únemdeýge de septigi bar, qala turmysy men demalysy, adamdardyń densaýlyǵyn aınalyp ótpeıtin kezekti jobanyń túsaýy kesilip otyr.
Aldaǵy kúnderi Almatyda ekologııalyq týrızm men sportty damytý maqsatynda Ile Alataýy tóskeıinde 71 shaqyrymdyq soqpaq jol jaıǵasady. Sonymen qatar taǵy 9 shaqyrymdyq sporttyq joldar abattandyrylady.
Osylaısha onlaın-brıfıngte megapolıste «Baqyt soqpaqtary» jańa jobasynyń tusaýkeseri ótti. Ideıanyń bastamashysy da iske asyratyn da – «BI Group» holdıngi. Kompanııa ókilderi ózderiniń bul jobasyn Almaty qalasynyń ákimi Baqytjan Saǵyntaevqa 2019 jyldyń kúzinde usynǵan bolatyn, tyń bastama saralana kele, ákimdik tarapynan qoldaý tapty.
Jobanyń birinshi kezeńinde 71 shaqyrymǵa jýyq toǵyz taý jolyn (Tuıyqsý, Kim Asar, Gorelnıka, Japon joly jáne t.b.) abattandyrý josparlanyp otyr. Kúrkeler qoıylady, qaýipti jerlerde – kishigirim metall kópirler men joldar jasalady, sondaı-aq bıvýaktarǵa arnalǵan oryndar jaılastyrylady. Qajet jerlerde, burylystarda marshrýttardyń kórsetkishteri men aqparattyq qalqandar ornatylady. Joba aıasynda qala turǵyndary úshin jaıaý joryqtar, sporttyq is-sharalar, bilim berý ekskýrsııalaryn uıymdastyrý qarastyrylǵan.
Oǵan qosa, Almatynyń ózinde Esentaı jáne Kishi Almaty (Terrenkýr) ózenderiniń boıyndaǵy sporttyq joldarda sport qalashyqtary jóndeledi, aýmaq abattandyrylady.
– Osydan bes jyl buryn kompanııanyń 20 jyldyǵyna oraı biz Qazaqstannyń elordasynda «Trıatlon-park» salyp, oǵan 2 mln dollar jumsadyq. Biz bul jobanyń nursultandyqtarǵa unaǵanyn kórip otyrmyz, olar jyldyń kez kelgen mezgilinde sportpen shuǵyldanady, onda buqaralyq sporttyq sharalar uıymdastyrylady. Endi mine, kompanııamyzdyń 25 jyldyǵy qarsańynda biz elimizdiń eń arý qalasyna, súıikti Almatymyzǵa da osyndaı jobany syıǵa tartqanymyz jón dep sheshtik. Biz jobany kezeńderge bóle otyryp, oǵan shamamen 1 mln dollar jumsaýdy kózdep otyrmyz: jumystardyń bir bóligi bıyl, bir bóligi – aldaǵy jyldarda oryndalatyn bolady, – deıdi BI Group holdıngi dırektorlar keńesiniń tóraǵasy Aıdyn Rahymbaev.
Uıymdastyrýshylar «Baqyt soqpaqtaryn» ekologııalyq týrızmdi damytýǵa jáne sporttyq ómir saltyn nasıhattaýǵa strategııalyq ınvestısııa retinde qarastyryp otyr. Joba qalalyq sport belsendileriniń qatysýymen, jumys toby aıasynda pysyqtalýda.
– BI Group usynǵan joba qalany damytýdyń jalpy tujyrymdamasyna óte saı keledi. Bizdiń taýlarymyz – búkil Qazaqstannyń qazynasy. Týrısterge qajetti ınfraqurylymdy abattandyryp qana qoımaı, olardyń ózine ǵana tán sulýlyǵyn saqtap qalý da óte mańyzdy. «Baqyt soqpaqtary» osy maqsattarǵa jetý jolyndaǵy mańyzdy qadam bolatynyna senimdimiz, dedi joba tusaýkeserinde Almaty qalasy ákiminiń birinshi orynbasary Erlan Qojaǵapanov.
– Álemdik týrıstik kartada Almatynyń orny anyq aıqyndalyp, aıshyqtalyp keledi. Búgingi kezeń – týrıstik ındýstrııada jahandyq ózgerister kezeńi. Post-vırýstyq kezeńde jańa baǵyttar, jańa ónimder suranysqa ıe bolady. Sarapshylar sporttyq jáne salaýatty ómir saltyna baılanysty shytyrman oqıǵaly týrızmge suranys artady dep boljap otyr. Osyǵan baılanysty kóp jyldar boıy sportshylar arasynda tanymal bolyp kele jatqan bizdiń taýlarymyz orasan zor áleýetke ıe, – dedi Almaty qalasy ákimdigi Týrızm basqarmasynyń basshysy Sábına Amankeldi.
«Sońǵy jyldary biz almatylyqtar arasynda taý sportyna degen qyzyǵýshylyqtyń kúrt artqanyn baıqap otyrmyz. Taýda sheteldik týrısterdi de jıi kezdestirýge bolady. Bizdiń taýlarymyz sportty damytýdyń halyqaralyq ortalyqtarynyń biri bolýǵa ábden laıyq», – dedi óz kezeginde alpınızm boıynsha sport sheberi Andreı Pýchının. Onyń bul tujyrymymen Qazaqstannyń elordasynda trıatlonnan marafon men jarystar ótkizýdiń belsendi de dara uıymdastyrýshysy Alekseı Sıdorenko da kelisedi.
Alekseı Sıdorenko Qazaqstandaǵy BI Marathon jáne BI Ironman halyqaralyq tanymaldylyqqa ıe ekenin alǵa tarta otyryp, jańa joba shahar ekonomıkasynyń damýyna jańa serpin beretinine senimdi ekenin bildirdi.
ALMATY
