S.Qasmaqasovtyń sózine qaraǵanda aryz-shaǵymdardyń azaıý dınamıkasy bilinedi. Olar negizinen jekemenshik emhanalardyń qyzmetteriniń ústinen túsken. Mysaly, bir zeınetker ózine 1 mln 200 myń teńgege protez saldyrǵan. Alaıda ol bekimegen, sebebi aldymen tistiń paradentoz derti emdelýi kerek eken.
Medısınalyq qyzmetti baqylaýshy organnyń basshysy jalpy jaǵdaıdy negizinen jaqsy degenimen Soltústik Qazaqstannyń emdeý oryndarynyń jumysy kóńil kónshitpeıdi. Máselen, oblystyq balalar aýrýhanasyna aıaǵy synyp túsken 11 jasar Laýra Álim degen balaǵa alty aıda 6 ret narkozben ota jasaǵan. Balanyń aıaǵy áli de jazylmaǵan. Aýrýhananyń dárigerleri aıaq astynan onyń synyǵynan onkologııalyq derttiń «izin» kórip, ony anyqtaý úshin ata-anasyna óz kúshterińizben Reseı Federasııasynyń Omby qalasyna jetkizińder degen talap qoıǵan. Jol aqysyn, sarap jasaýdyń baǵasyn ombylyqtarǵa tóleýdiń qajettigin de tapsyrǵan. Al ózimizdiń eldegi tegin sarapqa jiberýdi olar artyq sanaǵan. Osyǵan qaraǵanda bireýlerdiń kóldeneń tabys tapqanyn qalaıtyn sııaqty. Qazaqstandyqtardy kórshi elge «qýýdyń», sóıtip tamyr-tanystaryna aqsha tapqyzýdyń joly da jasalyp qoıǵan ba dep oılaısyń...
Máselege, Májilis depýtaty Káribaı Musyrman aralasyp, Densaýlyq saqtaý mınıstri E.Birtanov pen oblys ákimi Q.Aqsaqalovqa saýal jasaǵannan keıin ǵana sanıtarlyq avıasııamen otalyq materıaldar Nur-Sultan qalasyna tegin jetkizilip, balanyń boıynda eshqandaı onkoderttiń joq ekendigi anyqtaldy.
Mine, osyndaı máseleler medısınalyq qyzmetti qatań baqylaýǵa alýdy talap etedi. Medısınalyq qyzmetterdiń sapasyn baqylaıtyn qyzmetke osyndaılarǵa da jiti nazar aýdarýy kerek-aq. Oblystyq densaýlyq saqtaý basqarmasyna birneshe aıdan beri basshy taǵaıyndalmaǵandyǵy halyqtyń densaýlyǵyna degen janashyr kózqarastyń munda azdyǵyn kórsetkendeı. Al bastyqtyń mindetin atqarýshy N.Aımanov ózine jasalǵan shaǵymdy qaramaq túgili oblystyq balalar aýrýhanasynyń bas dárigerimen sóılesýge de jaramaǵan.
Soltústik Qazaqstan oblysy
