Halyqqa esep berý kezdesýi kezinde Ulttyq ekonomıka mınıstri Rýslan Dálenov habarlaǵandaı, salyqtyq jeńildikterdiń tek ózi ǵana ekonomıkanyń 29 sektoryndaǵy ShOB kásiporyndaryn qamtıdy.
"ShOB-ty damytý - ekonomıkany ártaraptandyrýdyń, jumyspen qamtýdyń, makroekonomıkalyq turaqtylyqtyń, sondaı-aq, halyqqa arnalǵan qyzmetter men taýarlardy óndirýdiń basty faktory. О́zderińizge belgili, qazirgi kezeńdegi karantındik shekteý sharalary ShOB-qa, ásirese shaǵyn bızneske tikeleı yqpal etti. Sondyqtan, ShOB-ty qoldaý úshin salyqtyq yntalandyrý jasalyp, kredıt berý kólemi ulǵaıtylýda. Bıznes júrgizý sharttaryn odan arǵy jeńildetý sharasy qabyldanýda", - dep atap ótti mınıstr.
Atap aıtar bolsaq, salyqtyq yntalandyrý sharasy retinde 2020 jylǵy 1 maýsymǵa deıin shaǵyn jáne orta bıznes sýbektilerin barlyq salyq pen áleýmettik tólemnen bosatý kózdelgen. Ekonomıkanyń álsiz salalaryndaǵy múlik salyǵynyń stavkasy jyl sońyna deıin joıyldy. Aýyl sharýashylyǵy ónimin óndirýshiler úshin jer salyǵynyń mólsherlemesi jyl sońyna deıin joıyldy. Áleýmettik mańyzy bar azyq-túlik ónimderin ótkizý jáne ımporttaýdaǵy QQS 2020 jylǵy 1 qazanǵa deıin 12%-ten 8%-ke deıin azaıtyldy.
Ekonomıkanyń asa zardap shekken salalary boıynsha 2020 jylǵy 1 sáýirden 1 qazanǵa deıin eńbekaqy tóleý qorynan salyqtar men áleýmettik tólemder boıynsha salyq mólsherlemesi alynyp tastaldy.
Bul jalaqydan ustalatyn jeke tabys salyǵy, mindetti zeınetaqy jarnasy, áleýmettik salyq jáne áleýmettik tólem, mindetti medısınalyq saqtandyrý jarnasy alynbaıdy degen sóz.
Jalpy alǵanda, jeńildikter shaǵyn jáne orta bıznestiń 29 túrin qamtıdy.
Sondaı-aq, mınıstr mıkro- jáne shaǵyn bıznes úshin Memleket basshysynyń ótken jyly mıkro jáne shaǵyn bıznesti úsh jylǵa (2020-2022 jyldar boıynsha) kiris salyǵynan bosatý týraly bastamasyn júzege asyrý mańyzdy qoldaý bolǵanyn aıtty.
"Nátıjesinde, 1 mln-nan astam mıkro jáne shaǵyn kásipkerlik sýbektileri 3 jyl ishinde salyqtan 382 mlrd teńge únemdeıdi", - dep atap ótti Dálenov.
Sondaı-aq, bıznesti qarjylandyrýǵa qoljetimdilikti keńeıtý jónindegi keshendi sharalar qabyldandy, sebebi, kredıtter men kepilderdiń qoljetimdiligi - "ShOB, ásirese, mıkro bıznesti damytý faktory bolyp tabylady".
"Sondyqtan, "BJK 2025" memlekettik baǵdarlamasyna "mıkro jáne shaǵyn bıznesti mıkrokredıtteý" jańa negizgi baǵyty qosylady. Qarjylandyrý 6%-ten aspaıtyn mólsherleme boıynsha sýbsıdııalaý arqyly júzege asyrylady. Qazirgi kezde mundaı kredıtter boıynsha mólsherleme joǵary. Jańa baǵyt 6%-tik mólsherlememen kredıt alýǵa múmkindik beredi. Kredıtter aınalymdaǵy quraldardy tolyqtyrýǵa - 5 mln teńgege deıin, óndiristik qajettilikke - 20 mln teńgege deıin beriletin bolady. Bul mıkrobıznes ókilderin barynsha keń kólemde qamtýǵa múmkindik beredi", - dedi Dálenov.
Sonymen qatar, kepil usyný máselesi de sheshilýde. Damý qory negizgi qaryzdyń 85%-ine deıin kepildik berýdi qamamasyz etedi. Mınıstrdiń aıtýynsha, mıkrokredıtteýdiń jańa baǵyty bir aı ishinde iske qosylady dep josparlanǵan.
